Conchuncions consecutivas en aragonés

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

As conchuncions consecutivas en aragonés se fan servir pa expresar consecuencias d'o que s'ha dito. Tamién reciben a denominación d'ilativas.

Son conchuncions consecutivas u ilativas en aragonés conque, pos/pus, y a forma medieval doncas.

Conchunción conque

Ye cheneral en aragonés. Eixemplos d'uso:

• conque esta ye la nuestra vida. (cheso).
• conque marchó t'allí a cazar o bobón. (aragonés d'o Viello Sobrarbe).
• conque astí tiens las uellas, que yo enta Graus me'n iré. (baixo-ribagorzano de Graus).

Conchunción doncas

Ye propia de l'aragonés medieval y ye un cognato d'as formas presents en catalan (doncs), occitán y francés (donc). Cuan va chunto con si (si doncas), presenta un valor diferent a lo consecutivo. A l'igual que a conchunción car fue substituyida por a conchunción pos/pus, que presenta un uso mes amplo. O significau de doncas representa o significau de pos/pus cuan se puet dicir tamién por tanto, en conclusión.

En os "Fueros d'Aragón" podemos veyer un valor consecutivo:

...mas encara grieu danno de nuestra tierra no temen demandar usuras de usuras. Doncas nos, non q(ue)rie(n)tes, por p(ro)ueito de los x(r)i(sti)anos & por lures cueitas otrosi enserrar a los iudios lice(n)cia de p(re)star lures aueres...

Conchunción pos/pus

Deriva d'o latín POST y en aragonés se presentan as formas pos, pus y pues. Muitas vegadas ye un elemento prescindible en a oración composada, que da un recurso de continuidat.

Con matiz clarament consecutivo lo veyemos en eixemplos como:

• ...aturem, pues, el bestiar y mo'n vaigam a dormir (baixo-ribagorzano de Graus).

Con caracter continuativo lo trobamos en:

• pus, qué ye mes vuestro? (meyo-ribagorzano de Campo).
• Voi Chuanón, pus que fas per ací? (benasqués de Sesué).
• Vai, pos tal y quiento (aragonés d'o Viello Sobrarbe).
• pues no n'han tirau poca, de carne (aragonés tellano).
• pues si no i has estau, ves-ie (aragonés tellano).

Se considera que esta conchunción representa un castellanismo en aragonés que ha substituyiu a la conchunción consecutiva doncas y a la conchunción causal car, manimenos ya trobamos pues en libros medievals como o "Libro d'el Trasoro". Si pos/pus tien o significau de porque corresponde a la conchunción causal medieval car y no a la conchunción consecutiva medieval doncas.

Conchunción y con valor consecutivo

A conchunción y, por un regular copulativa, puet tener a vegadas una función consecutiva, como por eixemplo:

• L'otro día en compró allí uno d'Erés y s'ha muerto (semontanés d'Ayerbe).

Bibliografía

• (es) Chabier Lozano Sierra: Aspectos Lingüisticos de Tella. Aragonés de Sobrarbe (Huesca). Gara d'Edizions - Prensas Universitarias de Zaragoza - Institución Fernando el Católico. 2010
• (es) Francho Nagore: Gramática de la Lengua Aragonesa. Zaragoza. Mira Editores. 1989.
• (es) Xavier Tomás Arias: El aragonés del Biello Sobrarbe. Instituto de Estudios Altoaragoneses, 1999.