Wahab Riaz

کرکٹ صرف صلاحیت کا کھیل نہیں ہے بلکہ اچھی کارکردگی دکھانے کیلئے قسمت کا اچھا ہونا بھی بہت ضروری ہے ۔جب قسمت ساتھ نہ دے رہی ہو تو پھر اچھا کھیلنے کے باوجود بھی اچھی کارکردگی سامنے نہیں آتی۔وہاب ریاض کا معاملہ بھی ایسا ہی ہے جو پانچ برسوں میں قسمت کے کئی اْتار چڑھاؤ دیکھ چکا ہے۔ماضی میں ہر مرتبہ ٹریننگ کیمپوں کا حصہ بننے کے بعد مایوسی کے عالم میں گھر کی راہ لینے والے وہاب ریاض2008ء میں پاکستان کی طرف سے ون ڈے ڈیبیو کرنے میں کامیاب ہوا اور شیخوپورہ میں پہلی مرتبہ پاکستان کی گرین کیپ سر پر سجاتے ہوئے 8اوورز میں 19رنز دیکر 2 وکٹیں لیں جسکے بعدکیرئیر کے صرف چوتھے میچ میں بھارت کے خلاف 9اوورز میں 86رنز کے جرمانے نے اْسے سلیکٹرز کی نظروں سے گرا دیا۔دو سال قومی ٹیم سے باہر رہنے کے بعد 2010ء کے دورہ انگلینڈ میں وہاب کی واپسی ہوئی تو فاسٹ باؤلر نے ٹیسٹ ڈیبیو پر پانچ وکٹوں کا کارنامہ انجام دے کر ایک مرتبہ پھر خود کو قومی ٹیم کا مستقل رکن بنوالیا کیونکہ سپاٹ فکسنگ کیس میں دو فاسٹ باؤلرز سے محروم ہونے کے بعد وہاب کی اہمیت میں اضافہ ہوگیا تھا۔ 2010ء کا سال وہاب کیلئے بہترین ثابت ہوا جسے اگلے برس ورلڈ کپ کیلئے بھی منتخب ہونے کا موقع مل گیا۔ سیمی فائنل جیسے اہم میچ میں بھارت کیخلاف 5/46کی کارکردگی نے ’’وکی‘‘ کو راتوں رات شہرت کی بلندیوں پر پہنچا دیا اور پاکستان کے اس نئے سٹار نے آنے والے مہینوں میں تینوں فارمیٹس میں عمدہ کارکردگی کا مظاہرہ کیا۔2012-13ء کے قومی سیزن میں وہاب ریاض نے 9/59کی کیرئیر بیسٹ بالنگ سمیت 52کھلاڑیوں کو برطرف کیااوردو ٹی20ٹورنامنٹس میں 5.71کے اکانومی ریٹ اور 16.06کی اوسط کے ساتھ 16وکٹیں اپنے نام کیں جو ٹاپ کلاس پرفارمنس تھی، وہاب ریاض اس وقت قومی ٹیم کی پیس بیٹری کا اہم حصہ ہیں اور ان سے نہ صرف ٹیم بلکہ شائقین کو بھی بہت سی امیدیں وابستہ ہیں۔