明母

明母（粵拼：ming4 mou5；中古漢語拼音：mieng）係中古漢語聲母，屬脣音嘅幫組，係次濁聲母。呢個聲母接韻母時，無開合口之分，同四個等都可以接。

其例字如下（中古漢語拼音採用古韻羅馬字）：

一等	毛mau、母mux、妹muaih、沒muot
二等	埋mrai、猛mrangx、慢mranh、麥mrek
三等	謀miu、尾myoix、問myonh、目miuk、名mjeng、美miix、繆myh、滅mjet
四等	眠men、酩mengx、麪menh、覓mek

擬音

因爲大多數嘅漢語族語言、域外方音、對音中，滂母大多發[m]，所以學界一致同意將佢擬音爲[m]。

各學者擬音

聲母	古韻羅馬字	高本漢	李方桂	陸志韋	王力	周法高	李榮	邵榮芬	蒲立本	董同龢	鄭張尚芳	潘悟雲	《廣韻》字數
明	m	m	m	m(mʷ)	m	m	m	m	m	m	m	m	1109

上古來源

大部分學者都認爲明母字來自上古漢語嘅[m]輔音，呢個音喺上古音到中古音嘅演變好穩定。

分類

唐守溫三十字母	宋三十六字母	陳澧	曾運乾	白滌洲	李榮	周法高
明	明、微	明、微	莫、武	莫、武	明	明

演變

喺相當多漢語族語言中，脣音三等字嘅一部份（有學者認爲係合口字，有學者認爲係主要元音爲後元音，或者由於某啲介音）轉變爲脣齒音。音韻學上稱呢啲字爲輕脣音，而仍保持雙脣音發音嘅字爲重脣音。喺三十六字母中，《切韻》系統中幫母嘅重脣音仍稱幫母，而輕脣音稱微母（mei4 mou5；中古漢語拼音：myoi）。同幫、滂、並三母比較，明母輕脣化嘅字比較少，例如北京音系中東韻三等、鍾韻同尤韻字，喺幫、滂、並母讀輕脣，而明母爲重脣。而喺粵語中，雖然幫、滂、並母有輕脣字，明母全部爲重脣。

喺粵語嘅演變

早期中古漢語（切韻音系）中，脣音只有幫組，到後期嘅三十六字母階段，脣音分出重脣同輕脣，粵語基本上繼承自三十六字母階段嘅發音，但係明母例外。

重脣音中，明母繼續係古音狀態，對應嘅粵拼係m。對聲調嘅影響係，明母字派入聲調中嘅陽聲調。有少部分明母字，如彌、瀰等，轉爲鼻音n。

輕脣音中，佢喺三十六字母屬微母，喺粵語微母冇分化出來，繼續係讀明母。聲調嘅影響同明母一樣。

下面係一啲例字嘅古今音對比，第一欄例字，第二欄中古音（切韻），第三欄現代粵音：

無	未	文	民	明	莫	問	武	馬	物
myo	myoih	myon	mjin	mieng	mak	myonh	myox	mrax	myot
mou4	mei6	man4	man4	ming4	mok6	man6	mou5	maa5	mat6

調返轉頭，現代粵語中嘅m聲母全部來源自中古音嘅明母。

喺吳語嘅演變

切韻嘅明母喺吳語中分兩種，重脣明母繼續係古音狀態，對應嘅吳拼係m／[m]；輕脣微母喺文讀脫鼻音，同奉母合流，對應嘅吳拼係v／[v]，而白讀繼續係重唇嘅m。如物字，動物嘅物讀文讀，讀veh，物事嘅物讀白讀，讀meh。

切韻嘅明母變微母有條演化式：m+i, y+a, o = mv。i, y即係三等介音（唔分開合口），佢嘅韻腹一旦係a, o，佢嘅聲母就會轉爲mv。

喺普通話嘅演變

切韻嘅明母喺普通話嘅演變同吳語一樣，重脣明母繼續係古音狀態，對應嘅普拼係m，輕脣微母繼續向前演化，由v變w。

喺日文嘅演變

喺日文，明母唔分輕重脣，喺吳音係ま行（[m]），喺漢音係ば行（[b]）。

喺韓文嘅演變

喺韓文，佢嘅聲母無輕脣化，同粵語一樣都係讀ㅁ（[m]）

喺越南文嘅演變

喺越南文，佢嘅情況同吳語一樣，明母繼續係m（[m]），微母字轉爲v（[v]），喺聲調上，平聲喺陰平，仄聲喺陽聲調。重紐四等字轉d（[dʑ]），如民（中古漢語mjin）讀dân。

睇埋

早期中古漢語（切韻音）聲母

	全清	次清	全濁	次濁	全清	全濁
脣音	幫	滂	並	明
舌音	端	透	定	泥
	知	徹	澄	娘
				來
齒音	精	清	從		心	邪
	莊	初	崇		生	俟
	章	昌	常	日	書	船
牙音	見	溪	羣	疑
喉音	影			云、以	曉	匣