幫母

幫母（粵拼：bong1 mou5；中古漢語拼音：pang）係中古漢語嘅聲母，屬脣音嘅幫組，係全清聲母。呢個聲母接韻母時，無開合口之分，同四個等都可以接。

其例字如下（中古漢語拼音採用古韻羅馬字）：

一等	波pua、寶paux、半puanh、北pok
二等	邦prung、板pranx、霸prah、百prak
三等	風piung、反pyanx、付pyoh、法pyap、彪py、鄙piix、變pienh、筆pit
四等	邊pen、匾penx、閉peh、壁pek

擬音

因爲大多數嘅漢語族語言、域外方音、對音中，幫母大多發[p]，所以學界一致同意將佢擬音爲[p]。

各學者擬音

聲母	古韻羅馬字	高本漢	李方桂	陸志韋	王力	周法高	李榮	邵榮芬	蒲立本	董同龢	鄭張尚芳	潘悟雲	《廣韻》字數
幫	p	p	p	p(pʷ)	p	p	p	p	p	p	p	p	861

上古來源

大部分學者都認爲幫母字來自上古漢語嘅[p]輔音，呢個音喺上古音到中古音嘅演變好穩定。

分類

唐守溫三十字母	宋三十六字母	陳澧	曾運乾	白滌洲	李榮	周法高
不	幫、非	幫、方	博、方	博、方	幫	幫

反切上字

《廣韻》度，屬幫母嘅反切上字有24個。

• 重唇：邊布補伯百北博巴卑並鄙必彼兵筆陂畀逋比
• 輕唇：方封分府甫

演變

喺相當多漢語族語言中，脣音三等字嘅一部份（有學者認爲係合口字，有學者認爲係主要元音爲後元音，或者由於某啲介音）轉變爲脣齒音。音韻學上稱呢啲字爲輕脣音，而仍保持雙脣音發音嘅字爲重脣音。喺三十六字母中，《切韻》系統中幫母嘅重脣音仍稱幫母，而輕脣音稱非母（fei1 mou5；中古漢語拼音：pyoi）。

喺粵語嘅演變

早期中古漢語（切韻音系）中，脣音只有幫組，到後期嘅三十六字母階段，脣音分出重脣同輕脣，粵語就係繼承自三十六字母階段嘅發音。

重脣音中，到現代粵語繼續係古音形態，對應嘅粵拼係b [p]，對聲調嘅影響係：幫母字派入聲調中嘅陰聲調。

輕脣音中，佢喺三十六字母屬非母，對應嘅粵拼係f [f]，對聲調嘅影響係：非母字派入聲調中嘅陰聲調。

切韻嘅幫母變非母有條演化式：p+i, y+a, o, u = f。i, y即係三等介音（唔分開合口），佢嘅韻腹一旦係a, o, u，佢嘅聲母就會轉爲f。不過亦有例外，「不」字嘅讀音係滯古嘅，因爲佢喺官話中常用，傳入粵語，就繼續係重脣狀態。另外某啲非母字，喺粵語白讀音保留重脣讀法，如甫，文讀fu2，白讀pou2。

下面係一啲例字嘅古今音對比，第一欄例字，第二欄中古音（切韻），第三欄現代粵音：

波	非	不	半	巴	八	表	北	風	反
pua	pyoi	pyot	puanh	pra	pret	pieux	pok	piung	pyanx
bo1	fei1	bat1	bun3	baa1	baat3	biu2	bak1	fung1	faan2

調返轉頭，現代粵語中嘅b聲母來源自中古音嘅幫、並二母，f聲母來源自中古音嘅幫、滂、並、溪、曉五母。

喺吳語嘅演變

切韻嘅幫母喺吳語嘅演變同粵語一樣，重脣幫母、輕脣非母繼續係古音狀態，幫母對應嘅係吳拼係p [p]，非母對應嘅吳拼係f [f]。

喺普通話嘅演變

切韻嘅幫母喺普通話嘅演變同粵語一樣，重脣幫母、輕脣非母繼續係古音狀態，幫母對應嘅普拼係b [p]，非母對應嘅普拼係f [f]。

喺日文嘅演變

喺日文，無論吳音定漢音，幫母字唔分輕重脣，一律變は行（[h]／[ɸ]），但促音化後轉爲重脣音ぱ行（[p]），比如詞「日本」，唔促音，就讀にほん（Nihon），促音化就讀にっぽん（Nippon）。

喺韓文嘅演變

喺韓文，佢嘅聲母冇輕脣化，切韻嘅幫母一律繼續係重脣音，但喺送氣方面，有啲係ㅂ（[p]），有啲係ㅍ（[pʰ]），冇乜規律。如方讀방（bang），風讀풍（pung）。

喺越南文嘅演變

喺越南文，重脣嘅幫母會濁化成b（[ɓ]），但聲調喺陰聲調，如波讀ba；輕脣嘅非母保留古音形態，讀ph（[f]），如非讀phi；而重紐四等字轉t（[t]），如比（中古漢語pjiix）讀tỷ。

睇埋

早期中古漢語（切韻音）聲母

	全清	次清	全濁	次濁	全清	全濁
脣音	幫	滂	並	明
舌音	端	透	定	泥
	知	徹	澄	娘
				來
齒音	精	清	從		心	邪
	莊	初	崇		生	俟
	章	昌	常	日	書	船
牙音	見	溪	羣	疑
喉音	影			云、以	曉	匣