Batum

Batum
ბათუმი *(Batumi)*
Lidnanznam;	Flag;
Valdkund	Gruzii
Eläjiden lugu (2023)	179,185 ristitud
Pind	64,94 km²
Pämez'	Arčil Čikovani; (kül'mku 2021—,; არჩილ ჩიქოვანი)
Telefonkod	+995−422
Aigvö	UTC+4

Batum (gruz.: ბათუმი Batumi [ˈbatʰumi]) om Gruzijan kahtenz' lidn eläjiden lugun mödhe, meriport da kurort Mustmeren randal. Se om Adžarijan administrativižeks keskuseks, valdkundan turistine keskuz.

Istorii

Eländpunkt mainitase ezmäižen kerdan 4. voz'sadal EME kuti Batus (amuižgrek.: Βαθύς) Aristotel'-filosofan tedotöiš. Keskaigal i vhesai 1878 nimitihe lidnad Batomi. Sid' lidn oli mülünu Venäman imperijha, nimituz oli Batum gruzijan kelel vhesai 1936. Vl 1883 raudte ühtenzoiti lidnad Bakunke da sen kivivoin löundmižsijidenke. Batum sai oficiališt lidnan statusad vl 1888.

Batum šingotase omblendtegimištol (kengäd, sobad), sömtegimištol (čai, kofein, tabak) i zell'fabrikal. Kivivoiterminal i konteinerterminal ratas meriportas.

Geografijan andmused

Lidn sijadase Mustmeren Batuman lahten mererandaližel alangištol, 2..3 m ü.m.t. keskmäižel korktusel. Matkad Turkanman röunhasai om 20 km suvhe.

Klimat om subtropine neps, no päivoikaz päpaloin. Voden keskmäine lämuz om +14,4 C°, kezakun-sügüz'kun +20,1..+23,2 C°, vilukun-uhokun +5,4..+6,8 C°. Il'man lämuden maksimum om +40,8 C° (heinku). Lämuden absolütine minimum om −8,2 C° (uhoku), lumi katab mad kaks' nedalid vodes. Kezaaigan minimum om +8,1 C° (kezaku), tal'vaigan maksimum om +28,3 C° (tal'vku). Ei voi panda halad semendkus-redukus. Paneb sadegid 2519 mm vodes, enamba sügüz'kus-tal'vkus (278..330 mm kus), vähemba sulakus-semendkus (90..92 mm kus).

Tobmuz

Batum jagase seičemeks nimitadud ümbrikoks vspäi 2008.

Edeline lidnan pämez' om Laša Komahidze (ლაშა კომახიძე, kül'mku 2017 — heinku 2020).

Eläjad

Vn 2014 Gruzijan rahvahanlugemižen mödhe lidnan eläjiden lugu oli 152 839 ristitud. Kaik 163 440 eläjad oli lidnas vl 2018. Kaikiš suremb lidnan ristitišt om nügüd'. Lidnan pind oli 19 km² vhesai 2012. Vn 1989 lidnan ristitišt (136 930 eläjad) poleni vodele 2002 (121 806 rist.).

Rahvahad (2014): gruzijalaižed (adžarialaižed) — 93,4 %, armenijalaižed — 3,0 %, venänikad — 1,9 %, ukrainalaižed — 0,4 %, toižed rahvahad — 1,3 %.

Seičemen uskondan pühäpertid oma avaitud lidnas, enamba kaiked ortodoksižen hristanuskondan.

Tetabad ristitud

Valerii Meladze (sünd. 1965) — Venäman pajatai.

Irdkosketused

Lidnan Nevondkundan sait (batumicc.ge). (gruz.) (angl.)
Lidnan merijan sait (batumi.gov.ge). (gruz.)

Batum Vikiaitas