مقبوضہ جموںوکشمیر میں جاری اسرائیلی طرز کی آباد کاری کے بھارتی ہتھکنڈوں مذمت

سری نگر(اُردو پوائنٹ اخبارتازہ ترین - این این آئی۔ 09 جنوری2025ء)بھارت کے غیر قانونی زیر قبضہ جموںوکشمیر میں کل جماعتی حریت کانفرنس کی اکائی تنظیموں نے اسرائیلی طرز کی آباد کاری کے بھارتی ہتھکنڈوں کی شدید مذمت کرتے ہوئے کہا ہے کہ مودی حکومت نے کشمیریوں کی تحریک آزادی کو دبانے کیلئے انکے گھروں ، زمینوں اور دیگر املاک پر قبضے کا ایک منظم سلسلہ شروع کر رکھا ہے۔

کشمیرمیڈیاسروس کے مطابق کل جماعتی حریت کانفرنس کی اکائی تنظیموں تحریک حریت جموں و کشمیر، مسلم لیگ، ڈیموکریٹک فریڈم پارٹی نے سرینگر میں اپنے بیانات میں کہا کہ مودی حکومت مقبوضہ جموںوکشمیر میں بالکل اسی پالیسی پر عمل پیرا ہے جو اسرائیل نے فلسطین میں اپنا رکھی ہے ۔ انہوں نے کہا کہ کشمیریوں کو اپنے گھروں ، زمینوں ، ملازمتوں سے محروم کر کے اپنے ہی وطن میں اجنبی بنایا جا رہا ہے۔

(جاری ہے)

انہوںنے کہا کہ کشمیریوں کو معاشی طورپر مفلوک الحال بنانے کیلئے انہیں نوکریوں سے برطرف کیا جا رہا ہے اور انکی جگہ غیر کشمیریوں کو تعینات کر کے ہندو توا یجنڈے کو آگے بڑھانے کی کوشش کی جا رہی ہے۔ انہوں نے کہا کہ بھارت جموںوکشمیر پر اپنے غیر قانونی قبضے کو مستحکم کرنے کیلئے بڑے پیمانے پر استعماری ہتھکنڈے استعمال کر رہا ہے ۔ انہوںنے کہا کہ اگست2019کے غیر قانونی بھارتی اقدامات کا واحد مقصد ہی جموںوکشمیر میں آبادی کے تناسب کو تبدیل کرنا تھا۔

انہوںنے کہا کہ کشمیریوں سے انکی شناخت چھینی جا رہی ہے اور انکے وسائل کو بے دریغ لوٹ مار کی جا رہی ہے۔حریت تنظیموں نے اقوام متحدہ اور انسانی حقوق کی تنظیموں پر زور دیا کہ وہ مقبوضہ علاقے میں جای غیر قانونی بھارتی اقدامات اور نہتے لوگوں پر اسکے مظالم کا نوٹس لیں اور تنازعہ کشمیر کے حل کیلئے کردار ادا کریں۔ انہوںنے کہا کہ کشمیری بھارتی جبر و استبداد کے باوجود حق خوداردیت کے حصول کی منصفانہ جدوجہد کو اسکے منطقی انجام تک پہنچانے کے لیے پرعزم ہیں۔