سندھ ہائی کورٹ،این ای238دھاندلی کیس ،الیکشن کمیشن و دیگر کو نوٹس جاری ،19اپریل تک جواب طلب

کراچی(اُردو پوائنٹ اخبارتازہ ترین - این این آئی۔ 21 مارچ2024ء) سندھ ہائیکورٹ میں قائم الیکشن ٹریبونل میں این اے 238 کے امیدوار پی ٹی آئی سندھ کے صدر حلیم عادل شیخ کی جانب سے دائر پٹیشن پر سماعت ہوئی، حلیم عادل شیخ کے وکیل سینئر قانون دان بیرسٹر علی طاہر نے دلائل لیتے ہوئے کہاکہ ووٹنگ کا عمل ختم ہونے کے بعد کنسولٹیڈیٹ فارم بنانے کے وقت امیدوار کو نہیں بلایا گیا ہمارے الیکشن ایجنٹ کو بھی نکال دیا گیا تھا الیکشن کمیشن نے ہمارے فارم 45 ویب سائٹ پر اپ لوڈ کرنے کے بعد ہٹا دئیے ہیں الیکشن کمیشن کو ہدایت کی جائے فارم 45 فوری اپ لوڈ کیے جائیں تاکہ مزید جعل سازی نا کی جا سکے۔

الیکشن ٹربیونل نے الیکشن کمیشن آف پاکستان و دیگر کو نوٹس جاری کرتے ہوئے 19 اپریل تک فریقین سے جواب طلب کرلیا۔

(جاری ہے)

پی ٹی آئی سندھ کے صدر حلیم عادل شیخ نے میڈیا سے گفتگوکرتے ہوئے کہا سندھ ہائی کورٹ میں الیکشن کمیشن کے خلاف ہماری توہین عدالت کی پٹیشن بھی زیر سماعت ہے ٹریبونل میں آج ہماری 2024 کی پہلی پٹیشن پر سماعت ہوئی ہے عدالتوں سے امید ہے انصاف ہوگا۔

حلیم عادل شیخ نے کہا پی ٹی آئی کے ساتھ زیادتیوں کا جو قصہ رجیم چینج سے شروع ہوا تھا ابھی تک جاری ہے گزشتہ روز پی ڈی ایم کے گاڈ فادر ڈونلڈ لو کی جو بے عزتی ہوئی وہ پوری دنیا نے دیکھی اب ثابت ہوگیا ہے جس نے بھی عمران خان کے خلاف سازش کی وہ رسوا ہوکر بے نقاب ہوا ہے۔ امریکا میں مقیم پاکستانیوں کو سلام پیش کرتا ہوں جنہوں نے عمران خان کا مقدمہ لڑا گزشتہ روز نہ چاہتے بھی ڈونلڈ لو کو بھی ماننا پڑا کہ الیکشن میں دھاندلی ہوئی ہے، پوری دنیا نے دیکھا کس طرح پاکستان میں الیکشن 2024 میں دھاندلی کی گئی ہے۔

حلیم عادل شیخ نے کہا موجودہ حکومت پی پی ،ن لیگ اور ایم کیو ایم کی قبر ثابت ہوگی، عمران خان نے بھی کہا ہے یہ حکومت چار پانچ ماہ سے زیادہ نہیں چلے گی حکومت میں موجود تمام پارٹیاں اپنے گناہوں، دھاندلی کے بوج تلے دب جائیں گے،حلیم عادل شیخ نے کہا ماہ رمضان میں مہنگائی عروج پر ہے دو وقت کی روٹی کھانا بھی غریب عوام کے لئے مسئلہ بن گیا ہے سحری افطاری کے لئے عوام پریشان ہے پہلے 16 ماہ کی حکومت میں مہنگائی میں ریکارڈ اضافہ کیا گیا اب دوبارہ ان لوگوں کو حکومت میں لایا گیا ہے ہم کسی کو بھی معاف نہیں کریں گے آخری وقت تک انکا پیچھا کریں گے۔

پوری دنیا کو پتہ لگ گیا ہے کہ پاکستانیوں کے ساتھ کتنی بڑی زیادتی ہوئی ہے ہم بھی پاکستانی عوام کی جنگ لڑ رہے ہیں۔حلیم عادل شیخ نے کہا سندھ میں کچے کے ڈاکوئوں کو مارنے کا لائسنس مل چکا ہے کیوں کہ سندھ میں ان کے سرپرستوں کی حکومت آچکی ہے، جب سے پیپلزپارٹی کی سندھ میں حکومت بنی ہے کچے کے علاقے نوگو ایریا بن گئے ہیں۔ کچے میں ایک استاد کو قتل کر دیا گیا، کدھر ہیں آئی جی سندھ کہاں ہیں وزیر داخلہ وفاق کہاں ہے اس وقت عوام کی جان و مال محفوظ نہیں رہا ہے۔

ہم 2023 سے شور مچا رہے تھے کچے میں ڈاکو راج ہے، آج بھی کچے میں راکیٹ لانچر کی ٹرینگ دی جارہی ہے، کیئر ٹیکر وزیراعلی بھی دھاڑی لگا کر چلے گئے معصوم مرتے رہے تھے نگران حکمران بھی دھاڑی لگاتے رہے اور چلے گئے۔ حلیم عادل شیخ نے کہا کراچی میں اسٹریٹ کرائم میں بے حد اضافہ ہوا ہے دہشتگرد کھلے عام کاروائیاں کر رہے ہیں اس کا کون زمہ دار ہی رواں برس پچاس شہری کرمنل کے ہاتھوں جان کی بازی ہار چکے ہیں شہر کراچی میں نوجوانوں کی نسل کشی ہورہی ہے کراچی کے عوام کو اکیل نہیں چھوڑیں گے ۔

حلیم عادل شیخ نے کہا ہمیں دہشتگرد اور ڈاکو سمجھا گیا تھا ، کل جسٹس صاحب نے کہہ دیا کہ یہ دہشتگرد نہیں ہیں، ہم سے اگر جان چھوٹ گئے ہو تو پولیس جائے ڈاکوئوں کے خلاف کارروائی کرے، اور عوام کے جان و مال کی محافظ بنے۔انہوں نے کہاکہ 8 فروری کو ہونے والے الیکشن میں اپنے پسند کا رزلٹ بنایا گیا پیپلزپارٹی کے سندھ حکومت نے ٹرانسفر پوسٹنگ کر کے پرانہ دھندہ شروع کر دیا ہے عوام کے وسائل کو دونوں ہاتھوں سے لوٹا جارہا ہے۔

حلیم عادل شیخ نے کہا قوم نے ہمیں مینڈیٹ دیا ہے انشا اللہ چھینا ہوا مینڈیٹ واپس لیں گے سندھ سے ہماری 22 قومی اور 38 صوبائی اسمبلی کی نشتیں جیتی ہوئی تھی جو جعلسازی کر کے چھینی گئی ہیں۔پی ٹی آئی رہنما نے کہاکہ 21 اپریل 2024 کو شہر کراچی میں مینڈیٹ کے چوری کے خلاف جلسہ کریں گے باقاعدہ ہم نے انتظامیہ کو درخواست لکھ دی ہے انشا اللہ عوام کی عدالت میں ملین مارچ ہوگا اور انشا اللہ عدالتوں سے امید ہے عمران خان بھی جلد رہا ہونگے، جس کی کوئی بنیادی ہی نہیں تھی وہ سارے جھوٹئے کیسز ختم ہوتے جارہے ہیں۔