Тумо

Тумo (лат. Quercus robur) — лышташан кугу пушеҥге, кӱкшытшӧ 40 м наре лиеш, а тӱҥжын диаметрже – 1,5 м. Тудо моткоч пеҥгылде пуан.

Лышташ вургыжо кӱчык, шӱм сӱретым ушештарыше тӱҥан, мутык пылышан да чара. Лышташыже кужака, мӧҥгешла чуяка да лопка мучашан. Тӱҥысӧ шӱмжӧ кутыньла келгын шелышталт пытыше.

Тумо Российын Европейский ужашыштыже иман-лышташан да лышташан чодыраште кушкеш. Сибирьыште тудо ок куш. Эрвел чекше Урал курык марте шуэш, кечывалвел чекше – Кавказ ден Крымын курыкан районлаже. Российын йӱдйымал чодыраштыже тудым от уж. Йӱдвел чекшылан 58-ше параллель шотлалтеш. Но Финляндийыште ты чек эше йӱдвелнырак улеш.

Марий Элыште тумер изирак отро семын Марий-Виче кӱкшакан кечывалвел ужашыштыже вашлиялтеш, шукырак тудо Юл да тудын игеҥерлаж воктенсе олыклаште, тыгак Юлын курыкан пурла серыштыже.