Nihonium

Nihonium (vörlööpig ok ünner den Naam Ununtrium bekannt) is dat künstlich tüügte cheemsch Element mit dat Atomteken Nh un de Atomtall 113. Entstahn weer dat Element dör Alphaverfall vun dat Element Ununpentium. Vun de cheemsch Egenschoppen vun lichtere Elementen warrt annahmen, dat Ununtrium en week, sülvern un hoochreaktiv Metall is, meist so as dat Natrium.

Historie

De Opdecken vun Nihonium un Moscovium schall in’n Sommer 2003 in Dubna an’t Vereenigte Institut för Karnforschen stattfunnen hebben un weer an’n 1. Februar 2004 dör en mischt Koppel vun russ’sch Wetenschopplers ut Dubna un US-amerikaansch Wetenschopplers vun’t Lawrence Livermore National Laboratory künnig maakt. Da Element weer dorna tüügt dör Bescheten vun ²⁴³Am mit ⁴⁸Ca.

An’n 28. September 2004 hett en Grupp vun japaansch Wetenschopplers an’t RIKEN bericht, dat se ok vörankamen weern bi't künnstlich Tüügen vun dat Element Nihonium.^[1]^[2]

Dat Vereenigte Institut för Karnforschen hett in’n Mai 2006 noch mol de Herstellen vun dat Element un den Nawies op en anner Oort künnig maakt, neemlich över en cheemsch Nawies vun de Verfalls-Endprodukten vun Nihonium.

Naam

De Naam Ununtrium weer de vörlöpige Naam na de IUPAC, na de latienschen Wöör för een (unus) un dree (tri). Bito weer ok de Naam Eka-Thallium bruukt, wat so veel heet as „een ünner Thallium“ – na de Laag in’t Periodensystem. Siet den 30. Dezember 2015 is de Opdecken vun dat Element offiziell acht. Dat japaansche RIKEN-Institut is dat Recht tospraken worrn, en Naam to vergeven.^[3] De Naam Nihonium is an’n 8. Juni 2016 mit Betog op Nihon (Japan) vörslahn worrn, un weer an’n 30. November 2016 denn offiziell publiek maakt.^[4]