Conservatisme
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
Conservatisme is 'n politische ideologie die 't historisch óntstangene es oetgangspuntj nump. Emes dae conservatief is hech mieë waerd aan netuurlik gegreudje gewuuendje es aan nuuj, door feilbaar individue bedachdje, radicaal ideologieje. De gróndj woort gelag doren Ierse filosoof Edmund Burke.
Me geitj ouch vanne stèlregel det de miens feilbaar is en eder verangering doordach mót waeren oetgeveurdj. Dit allein es 't nuuedig bliek te zeen. Conservatieve luuj zeen dus neet persé taengen eder verangering, meh veural taenge verangeringe puur veur te verangere. Conservatisme haet dus ouch 'nen aafkieër van radicaal struiminge, ómdet dees in häör dinke neet zat oug höbbe veur dees feilbaarheid vanne miens.
Inne praktiek straeve conservatieve nao zoea min meugelik staotsinterventie (in taengestèlling toet 't socialisme), ómdet me ouch deze staot feilbaar ach. Angerziedsj zal me ouch zich aafzètte taenge te väöl individualisme (in taengestèlling toet 't liberalisme en 't libertarisme), ómdet ouch individue feilbaar zeen. Conservatisme haet dus ideologische raakvlakke mit 't solidarisme. Effectief höbbe väöl conservatieve bewaegingen 'n solidaristische sociaal politiek.
Conservatieve stèlle det de miens noeadzaak haet aan vaste puntje veur neet oet 't oug te verlere wo me zitj en hange ze meistes mit 't traditionalisme, wobie respèk veur waerd en norme centraal steitj.