هالويين
| ||||
|---|---|---|---|---|
  | ||||
| نوعه | ثقافي | |||
| اليوم السنوي | 31 اكتوبر | |||
تعديل  |
||||
هالويين أو هالوءين ( بالانجليزى : Halloween أو Hallowe'en ) هو احتفال سنوى فى امريكا و بلاد تانيه زى كندا و انجلترا و ايرلاندا بيتعمل فى 31 اكتوبر و بتحصل فيه نشاطات " رعب " بيقوم بيها المحتفلين زى لبس الهدوم التنكريه و الأقنعه المخيفه و حكاية الحكايات المرعبه و الفرجه على الافلام اللى بتخوف.
الاحتفال بالهالويين فى العصر الحديث بتتقابل فيه التقاليد الوثنيه و التقاليد المسيحيه بخرافات السحارات و اجتمعاتهم فى " السبت Sabbat " .
بالنسبه للروم الكاتوليك يوم 1 نوفمبر هو يوم عيد " كل القديسين All Saints' Day" اللى بيحتفلوا بيه بكل القديسين و الشهدا المعروفين و المش معروفين. عيد القديسين ده كان معروف فى الازمنه القديمه باسم " هالوماس Hallowmas ". " هالو Hallow " من كلمة " هولى Holy" يعنى مقدس. " ايف Eve " معناها امسية ما قبل العيد او الاحتفال ، و عشان كده الليله اللى بتسبق الاحتفال بعيد كل القديسين اسمها " هالوماس ايف Hallowmas Eve " او بتختصر لـ " ا-ين E'en " ، و من هنا جت كلمة " هالؤيين Hallowe'en ".
فى مناطق من العالم احتفالات العصور الوثنيه المرتبطه ببداية الشتا كانت تقريباً فى نفس وقت عيد كل القديسين. فى الاحتفالات دى كانت بتتحكى قصص عن العفاريت و كانت الناس بتلبس هدوم تنكريه. فى العاده قصص العفاريت بعد كده بقت بتتحكى مع قصص " سبت السحارات " ، و بعدين مع مرور السنين اختلطت النوعيتين ببعض و ما بقتش بتتحكى منفصله. عشان كده فيه ناس كتيره بتفتكر ان الهالويين له علاقه قديمه بتاريخ السحر لكن ده مش صح لان الهالويين و السحر ما اختلطوش ببعض غير بعد سنين طويله بعد ما خلصت عصور هيستيريا السحارات.
مصادر
[تعديل]- Daniel Cohen, Witchcraft, Superstition & Ghostly Magic, Grosset & Dunlap, New York, 1971
- The New Encyclopædia Britannica, Micropædia,H.H. Berton Publisher,1973-1974
- The New Encyclopædia Britannica, Macropædia,H.H. Berton Publisher,1973-1974
