Nomen nudum

Die frase nomen nudum (meervoud: nomina nuda) is ’n Latynse term wat "naakte naam" beteken. Dit word in taksonomie gebruik, veral in dier- en plantname. Dit word soms kursief geskryf, na gelang van ’n publikasie se styl.

Dit word gebruik vir ’n naam wat soos die wetenskaplike naam van ’n organisme lyk, en wat moontlik aanvanklik bedoel was om een te wees, maar nie een is omdat dit (nog) nie amptelik beskryf en gepubliseer is nie. Dit word dus nie amptelik as ’n wetenskaplike naam beskou nie.

’n Ander wetenskaplike kan dus ’n naam publiseer wat presies dieselfde gespel word wanneer hy ’n organisme amptelik beskryf, en die naam word dan amptelik ’n wetenskaplike naam.