Antibes
Antibes Antíbol (Provensaals) | |
|---|---|
Stad | |
 Antibes in die winter, met die Vooralpe in die agtergrond | |
 Wapen | |
  Antibes | |
| Koördinate: 43°43′51″N 7°07′26″O / 43.73083°N 7.12389°O | |
| Land |  Frankryk |
| Gewes |  Provence-Alpes-Côte d'Azur |
| Département |  Alpes-Maritimes |
| Arrondissement | Grasse |
| Kanton | Setel van 3 kantonne: Antibes-1, Antibes-2, Antibes-3 |
| Stigting | 340 v.C. |
| Regering | |
| • Burgemeester | Jean Leonetti |
| Oppervlak | |
| • Totaal | 26,48 km2 (10,22 vk. myl) |
| Hoogte | 0–163 m (0–535 ft) |
| Bevolking | |
| • Totaal | 73 438 |
| • Digtheid | 2 800/km2 (7 200/vk. myl) |
| Tydsone | UTC+01:00 (MET) |
| • Somertyd | UTC+02:00 (MEST) |
| Poskode | 06004/06600 |
| Skakelkodes | 06004 |
| Webwerf | antibesjuanlespins.com |
Antibes is 'n stad in die département Alpes-Maritimes in die suidooste van Frankryk, geleë aan die voet van die Alpe en langs die Côte d'Azur of Franse Riviera, tussen Cannes in die ooste en Nice in die weste, met sowat 73 000 inwoners. Gedurende die somermaande huisves die stad daarnaas sowat 200 000 toeriste.[1] Die stad is naby die grootpad Autoroute 8 ("La Provençale"), die spoorweg tussen Marseille en Monaco en die lughawe van Nice geleë.
Antibes het saam met die strandoord Juan-les-Pins, een van sy kwartiere wat oorspronklik 'n klein vissershawe was, en sy see- en jaghawe Port Vauban (die grootste jaghawe in Europa) in die vroeë 20ste eeu tot 'n gewilde toeristebestemming ontwikkel. Antibes – een van die oudste nedersettings langs die Côte d'Azur – staan veral bekend vir sy historiese middestad wat 'n deur goed bewaarde 16de eeuse stadsmuur en versterkings omring word. Die stervormige vesting Fort Carré is tans 'n gewilde uitsigpunt bo-oor die jaghawe met sy luukse en megajagte.
Die beboste skiereiland Kaap Antibes (Cap d'Antibes) skei Antibes van Juan-les-Pins, 'n elegante strandoord wat vir sy naglewe en sy musiekfees Jazz à Juan bekendstaan.
Geskiedenis
[wysig | wysig bron]Antibes is omstreeks 340 v.C. deur Griekse koloniste gestig. Die moderne Franse stadsnaam naam is afgelei van die Griekse Antipolis ("die stad teenoor" Nice). In die Romeinse tydperk het Antipolis die status van municipium (Romeinse stad) verwerf.
Tussen 400 en 1244 was Antibes die setel van 'n biskop wat vervolgens na Grasse verskuif is. In 1481 is Antibes as 'n deel van die graafskap Provence by Frankryk ingelyf en het 'n belangrike strategiese rol as grensstad met Savoie gespeel. In die 17de eeu is die stad en sy hawe deur die argitek Vauban versterk. Napoleon I Bonaparte het ná sy terugkeer van die eiland Elba in die stadswyk Golfe-Juan voet aan wal gesit. Die vakansieoord Juan-les-Pins is in 1882 gestig. Dit was een van die gasheerstede tydens die FIFA Sokker-Wêreldbekertoernooi in 1938.
Besienswaardighede
[wysig | wysig bron]
Die historiese middestad van Antibes met sy stadsmuur en versterkings is, saam met die strande van Juan-les-Pins en die jaghawe die belangrikste besienswaardighede. Die Musée Picasso in die Château Grimaldi vertoon kunswerke van Pablo Picasso wat tydens sy verblyf in Antibes ontstaan het – keramiek, sketse, tekeninge en skilderye. Sy ligging vlak by die Middellandse See maak van hierdie museum een van die mooiste instellings van sy soort in Frankryk.
Verwysings
[wysig | wysig bron]Eksterne skakels
[wysig | wysig bron]
Wikimedia Commons het meer media in die kategorie Antibes.- (en) Toerisme-inligting oor Antibes op Wikivoyage
- (fr) Amptelike webwerf
