馴養

狗同羊都係人類早期馴養嘅動物。

馴養（粵拼：seon4 joeng5；英文：domestication），粵文又叫馴化（粵拼：seon4 faa3），係指一種生物物種長時間噉畀人類控制同使用，譬如農作物、家禽、家畜同寵物，啲人攞種生物嚟生產嘢食同衫，又或者幫手運輸、看門口甚至係消閒娛樂；而呢個過程影響咗種生物嘅進化，令佢哋進化到有某啲「馴養咗嘅生物普遍有」嘅特徵。

例如貓同狗等都係馴養咗嘅動物，同人共處咗幾千年，進化到有「普遍唔怕人」呢樣特徵，會肯俾人埋身同摸佢哋－相比之下，野生動物普遍都唔會肯俾人埋身。

動物

以下係人類馴養咗嘅動物物種：

• 貓：古代嘅人養貓嚟捉同殺老鼠同雀仔等會偷人類糧食嘅動物，養吓養吓啲貓愈嚟愈馴。
• 狗：古代嘅人會養狗嚟看門口、牧羊同幫手打獵呀噉，養吓養吓啲狗甚至仲識得睇人眉頭眼額。
• 蜜蜂：古代嘅人會養蜜蜂嚟生產蜜糖。
• 蠶蟲：古代嘅人會養蠶蟲嚟生產絲綢。

... 等等。

睇埋

• 人工選擇
• 寵物