記憶嘅神經底質

一個人腦嘅立體模型；紅色嗰兩嚿就係海馬體。

同第啲認知功能一樣，記憶都係由個腦嘅掌控嘅。

記憶痕跡

内文：記憶痕跡

記憶痕跡（engram / memory trace）係指個腦入面以某啲物理型式將記憶儲喺腦同第啲神經組織嗰度：理論上，一個腦係個認知系統，曉由外界吸收資訊（感知），呢啲資訊會引致個腦裏面有電同化學訊號等嘅變化（心智表徵），而假設心腦同一論（mind-brain identity）係真確嘅－假設心理現象完全係由神經系統嗰啲物理過程主宰嘅，一件記憶嘅形成理應會造成個腦嘅一啲微細嘅物理變化，而搵出點樣由個腦嘅物理變化（記憶痕跡）睇出有乜記憶產生喺認知科學上係個重要嘅課題。

廿一世紀初嘅神經科學界經已確立咗，記憶痕跡並唔係存在於一個單一腦區嘅：神經科學界做咗好多實驗，例如係特登破壞一隻大鼠嘅某個腦區，再睇吓呢個操作會點樣影響受試動物嘅記憶能力；結果發現，搵唔到有任何一個腦區係「一旦呢個區破壞咗，就會冇嗮啲記憶」嘅；有多個腦區都會幫手做記憶方面嘅作業，包括咗海馬體、杏仁核、紋狀體同乳頭狀體呀噉。好似係杏仁核噉，杏仁核有份幫手學一啲情緒性嘅記憶，即係一啲令個人零舍開心或者感受到第啲強烈情緒嘅記憶。除咗噉，各個記憶相關腦區唔單止會個別噉扮演重要嘅記憶功能，而且仲會合作做某啲記憶功能。而長期記憶嘅儲藏係廣泛分佈喺成個腦嗰度嘅。

人腦由左邊（左圖）同前邊（右圖）睇嘅樣；
紅色嗰兩嚿就係杏仁核。

病變研究

對病變嘅研究特別幫到手了解腦係點做記憶功能嘅：研究者會搵一啲腦某啲部位有病變嘅病人返嚟，又或者搵啲動物（常見嘅有大鼠同馬騮）返嚟人工噉破壞佢哋腦嘅某啲部位；跟住研究者會比較吓個腦某啲部位受損嘅個體同健全嘅個體喺記憶上嘅表現有乜嘢分別，靠噉嚟推斷受損嗰個部位喺記憶上擔當咗啲乜嘢角色；例如係研究發現，假設第啲因素不變，一件記憶愈係令到個個體感受到強烈情緒，個個體就愈有可能會記得佢，呢個就係所謂嘅記憶提升效應（memory enhancement effect），而呢種效應喺杏仁核受損嘅病人身上會睇唔到，透過呢份研究，科學家就知道杏仁核幫咗手學習情緒性嘅記憶。

喺病變研究當中，喺動物身上做嘅研究零舍重要：

• 「專登破壞受試者個腦某啲部位，再研究佢」呢家嘢喺人類身上做嘅話會有道德上嘅問題，所以如果要喺人類身上做病變研究，科學家淨係可以去搵腦病變嘅病人。
• 但齋靠研究病人嘅話又會有知識上嘅問題－腦病變並唔係一種好常見嘅病，而且人腦病變起上嚟好多時病變又唔會淨係影響單一腦區，搵有多個腦區病變嘅病人做研究嘅話，又會搞到研究者冇辦法釐清病變嘅腦區當中邊個先係對嗰種記憶功能重要嗰個，所以好多時都搵唔到啱用嘅病人。

喺動物身上做研究令到心理學家同神經科學家有得索性特登破壞受試者個腦某啲部位，再睇吓邊個邊個腦區受損會有乜嘢影響－令到研究者比較易搵到所需嘅受試者。

睇埋

• 神經底質