記憶誤差

記憶誤差（英文：memory error）係指記憶上嘅誤差，喺正常健康嘅人當中都時不時發生，涉及個人（例如）回想一件事嗰陣搞錯啲細節，甚至乎「回想」起一啲根本冇發生過嘅事。

進化基礎

就噉睇，記憶誤差好似係一件壞事，進化上理應對隻生物不利，但有學者認為記憶誤差可能係進化上嘅一種適應。記憶係由個腦建構（construct）嘅，一個長期記憶喺回想同再鞏固嘅途中會或多或少噉走樣，而呢樣嘢似乎係「人曉得想像未來」嘅必然結果：現實係，未來通常會同過去有些少相似，但好少可會完全一樣；如果一個系統（腦）識得運用過去嘅經驗嚟模擬想像未來發生嘅事嘅話，噉佢就實要係識得有彈性噉將幾個過去經驗揼散，將呢啲經驗嘅某啲元素抽取出嚟，再重組成一個想像中嘅未來－即係話理論上，個腦應該係一個建構性系統，而唔係一個淨係識得重造過去經驗嘅再生產性系統（reproductive system），如果個腦淨係識完美複製過去記憶嘅話，人可能會變到冇能力憑過去經驗想像未來－所以一個有少量記憶誤差嘅腦可能喺進化上係一種有利嘅構造。