與格

與格（粵音：jyu5 gaak3；拉丁文：cāsus datīvus），卽名詞第三變法，又叫名詞第三座，係名詞一格，通常擺喺動詞之後。簡化講，語法格係指名詞要視乎佢喺語句入便扮演咩角色嚟變樣，而與格就係指緊名詞「扮演接受物品或者幫助」嗰時要變嘅樣。用粵語做例，陳仔俾支筆細輝呢句說話之中，細輝個位，係接受緊物品，就係與格嘅位置。

好似粵語噉嘅漢語偏向分析語，本身近乎毫無詞形變化，但係好似英文等嘅歐洲語言就有：例如英文喺一般情況下，男性嘅第三人稱代名詞係 he（近似粵音：hi1）而假如語句中嘅男性佢扮演主格角色（簡單講即係做出動詞所指行動嗰一方）就要以 he 嘅形態出現，不過假如句中嘅男性佢係接受緊物品，就要變成 him 與格，例如想講你俾本書佢噉嘅意思：

錯誤例子：You give he a book.

正確例子：You give him a book.

此處 him 就由原格 he 轉成與格 him。就算講嘢嘅人唔正確噉使用與格，聽嘅人都有可能 get 到佢想講乜，但係講出嗰句說話就會錯語法。有啲語言（例如梵文同埋希臘文）甚至係語序唔緊要，靠格嘅變化確定意思。

基本概念

内文：語法格

睇埋：名詞同間接賓語

首先睇吓英文。廿一世紀初嘅英文已經演變到冇咩格詞形變化，得返代名詞等少數嘅詞語會有格方面嘅詞形變化：

1. He bites the dog.

   → 粵譯：「佢咬隻狗。」

2. The dog bites him.

   → 粵譯：「隻狗咬佢。」

响句一當中，He（男性佢）係咬人嗰方，係句子主語而句二當中嘅 him（男性佢）係被咬嗰方，係句子賓語。即係話英文入便嘅男性佢要按照「做緊句子主語定賓語」而變樣－做主語嗰陣隻詞要變做 he 而做賓語嗰陣隻詞要變做 him 噉。諸如拉丁文、德文或者俄羅斯文仲有更複雜嘅格變化；對於呢啲語言，可以想像「做主語做賓語隻詞會唔同樣」嘅情況，唔只用於 he 同 she 等嘅代名詞，仲會普遍噉用喺所有名詞身上。

與格（歐文簡寫 dat）係語法格一種，用嚟標記動詞嘅間接賓語，簡單講係「接受物品或者幫助嗰一方」嘅名詞。諸如英文同德文等嘅日耳曼語言，以至捷克文同俄羅斯文等嘅多種斯拉夫語言，都有與格方面嘅語法規則。

話與格係「表達隻名詞扮演接收物品或幫助」嘅意思，查實係有少少簡化咗。喺某啲語言中，與格可以扮演其他角色。例子可以睇吓喺印度斯坦話之中，與格有時可以用嚟標記語句嘅主語。

語言實例

好似粵語噉嘅漢語，傾向冇乜詞形變化。但係印歐語言（東至印度、西至歐洲嘅一個大語系）就有豐富嘅語法格系統，好多時都會有與格變化。

例如日耳曼語族噉。日耳曼語族係印歐語系下嘅分支，成員主要分佈喺歐洲嘅西北部，有原始日耳曼語言呢個遠古嘅共同祖先，包括英文、德文、荷蘭文、瑞典文同挪威文等嘅語言同方言，就算到咗廿一世紀初，呢啲話都或多或少噉保存咗語法格，包括與格。以日耳曼語言嚟講，英文被指係喺語法格系統上比較簡化嘅。現代英文已經喪失咗大部分嘅語法格變化，但係依然保留咗少少與格結構，呢點可見於佢哋啲代名詞之中。例句：

I	gave	her	a book	yesterday	.
S	V	IO	DO
代詞	過去式動詞	與格代詞	名詞短語	副詞
我	俾咗	女性佢	一本書	尋日

成句嘢係話句中我尋日將一本書俾咗 she（女性佢）所指嘅個體。喺呢句入便，her 就係與格嘅代名詞，女性佢由 she 變咗做 her 表示呢個代詞指緊「動作嘅接受者」。呢種語法規則反映英文雖然冇咩正式嘅格變化，但概念上仍然用緊與格。相比之下，例如德文就更完整噉保留咗嘅語法格系統。德文嘅語法格系統包括咗包括主格、屬格、與格同賓格四種，會體現喺名詞、冠詞同埋形容詞嘅變化之上。例句：

Ich	gebe	dem Mann	ein Buch	.
S	V	IO	DO
代詞	現在式動詞	與格名詞短語	賓格名詞短語
我	俾	嗰個男人	一本書

當中 dem Mann 結合 dem（與格陽性嘅指定冠詞）同埋 Mann（名詞指男人），顯示本書係交俾個男人嘅。假如句句子嘅主語係個男人（譬如佢係送書而非收書嗰方）嘅話 dem Mann 就要變成 der Mann，當中 der 係主格陽性嘅指定冠詞。

Der	Mann	schenkt	seiner	Frau	ein	Buch	.
S		V	IO		DO
主格名詞短語		動詞	名詞短語		名詞短語
個	男人	送俾 / 贈送	佢嘅	老婆	一本	書

睇埋

• 變格