Bushra Ansari

بشری انصاری کی شخصیت کے کئی روپ ہیں یہ بیک وقت فنکارہ، سنگر، میزبان، کامیڈین اور ڈرامہ نگار کے طور پر پہچانی جاتی ہیں۔ بشریٰ انصاری نے ایک چائیلڈ پرفارمنس کے طور پر اپنے کیرئیر کا آغاز کیا اور گزشتہ چار دہائیوں سے ٹیلی ویژن سکرین پر مختلف انداز میں اپنے فن کا جادو جگا رہی ہیں۔پاکستانی شو بز ورلڈ میں بشریٰ انصاری سے زیادہ بھرپور اور طویل کیرئیر کسی کے حصے میں نہیں آیا۔ ان کا ہر انداز منفرد اور ہر روپ جداگانہ ہے۔سنجیدہ ایکٹنگ، مذاحیہ، گلوکاری ،ر میزبانی اور اب ڈرامہ نگاری ۔ انہوں نے ہر میدان میں اپنا لوہا منوایا ہے اور اس میں کوئی شک نہیں کہ وہ خدا داد صلاحیتوں کی مالک ہیں۔ لیکن یہ کریڈٹ بھی انہی کو جاتا ہے کہ انہوں نے ان صلاحیتوں کو بہترین طریقے سے استعمال کر کے وہ مقام حاصل کیا ہے جہاں تک پہنچنے کا کوئی تصور بھی نہیں کر سکتا۔بشریٰ انصاری نامور ادیب اور صحافی احمد بشیر کی بیٹی ہیں وہ کراچی میں پیدا ہوئیں۔ لیڈی گریفن سکول لاہور سے ابتدائی تعلیم حاصل کرنے کے بعد لاہور کالج فار ویمن سے انٹرمیڈیت کیا۔ جبکہ بی اے کی ڈگری وقار النساء کالج فار ویمن سے حاصل کی ۔ بشریٰ انصاری کی شادی 1978ء میں ٹیلی ویژن کے پروڈیوسر اقبال انصاری سے ہوئی ۔جس سے ان کی دو بیٹیاں ہوئیں۔انتہائی مصروف اور مشہور فنکارہ ہونے کے باوجود انہوں نے ایک بیوی اور ماں کا رول پوری ذمہ داری سے ادا کیا۔ بشریٰ اپنی فرصت کے تمام اوقات اپنی فیملی کے ساتھ گزارتی ہیں۔بشریٰ انصاری کو اپنے کیرئیر کے دوران بے شمار ایوارڈز اور اعزازات ملے ہیں۔ جن میں پرائیڈ آف پرفارمنس بطور خاص قابل ذکر ہیں۔ انہیں صابق صدر پرویز مشرف نے اپنے دور میں صدارتی ایوارڈ اور صابق وزیراعظم بے نظیر بھٹو نے ویمن اچیومنٹ ایوارڈ دیا تھا۔ بشریٰ انصاری پی ٹی وی ایوارڈ کے علاوہ کئی مرتبہ لکس سٹائل ایوارڈ بھی جیت چکی ہیں۔ بشریٰ انصاری کے پی ٹی وی کے مشہور شوز میں ففٹی ففٹی، شو ٹائم، رنگ ترنگ، لُوز ٹاک، ڈولی کی آئے گی بارات، میرا نصیب، عینی کی آئے گی بارات، میرے درد کو جو زبان ملے، آنگن ٹیڑھا، کلیاں، ایمرجنسی وارڈ وغیرہ شامل ہیں نیز بشریٰ انصاری نے جیو فلمز کی ابھی تو میں جوان ہوں میں بھی ایک دلچسپ رول پلے کیا ہے۔