حجاب میری پہچان

عورت کو سب سے زیادہ عزت اسلام نے دی - اور جب عورتوں پر پردے کا حکم آیا تو سب عورتوں نے اس حکم کی تعمیل کی -
کیونکہ ایمان نام ہی اطاعت کا ہے -
 وہ عورتیں جو آج بھی اللہ کے حکم پر عمل پیرا ہیں انہیں خود کو خوش نصیب سمجھنا چاہیے کہ وہ اللہ کے حکم کو مان رہی ہیں -
جیسے ہر قیمتی چیز کو ڈھانپا جاتا ہے اس کی حفاظت کی جاتی ہے ویسے ہی عورت کو ایک قیمتی آبگینے کی مانند سمجھتے ہوئے اسے اپنی حفاظت کا کہا گیا-کیونکہ عورت کا مطلب ہی چھپائی جانے والی چیز ہے -
اس لئے پردہ کرنا کوئی عیب نہیں بلکہ اپنے رب کے حکم کو ماننے کے ساتھ آپ خود کو بھی دوسروں کی غلیظ نظروں سے بچا سکتی ہیں - آجکل یہ تاثر دیا جاتا ہے کہ حجاب پہن  کر  آپ کام نہیں کر سکتے جب کہ بہت سے شعبوں میں خواتین باپردہ رہ کر بھی خود کو بہتر طریقے سے منوا رہی ہیں -
کیونکہ حجاب  کسی بھی کام میں رکاوٹ کا باعث نہیں بلکہ عورت کی پہچان ہے - بھارت میں جہاں تعلیمی اداروں میں بچیوں پر پابندی عائد کر دی گئ کہ وہ حجاب کے بنا ان اداروں میں آئیں ورنہ انہیں تعلیمی سلسلے کو جاری نہیں رکھنے دیا جائے گا-ایک شجاعت کی علمبردار بچی مسکان نے ان انتہا پسندوں کو بتا دیا کہ سر صرف رب کائنات کے سامنے ہی جھکا جا سکتا ہے -
اس نے اپنی ہمت اور حوصلے سے پوری دنیا کو بتا دیا وہ ایک مسلم بچی ہے جو اپنی زینت کو کبھی دوسروں کے سامنے آشکار نہیں کرے گی کیونکہ وہ بہت قیمتی ہے اور اپنی حیا کی چادر کو وہ کبھی نہیں اتارے گی- پختہ عزم اور حوصلے کے ساتھ اپنے تعلیمی سلسلے کو بھی جاری رکھے گی بلکہ اسی بلند حوصلے کو لئے وہ دشمن کے سامنے ہمیشہ ڈٹی رہے گی - وہ اکیلی نہیں بلکہ تمام لوگ اس کے ساتھ ہیں -
اس کی اس جرات کو سب سلام پیش کرتے ہیں - جو اپنے حق کے لئے دشمن کے سامنے ڈٹ گئ - اور دشمن کو بتا دیا اسے کمزور نہ سمجھا جائے - اس نے اپنی پہچان کو کبھی فراموش نہیں کرنا بلکہ ساتھ لے کے چلنا ہے-کیونکہ پردہ مسلم عورت کی پہچان اور حیا کی علامت ہے -