Arcunjan

**Arcunjan**
	; ;
Pozision
	45°30′N 11°32′E
Stato	Itàłia
Rejon	Vèneto
Provinsa	Vicensa
Popołasion
Totałe	7 674 (2023)
Densità	184,6 hab./km²
Zènaro
Zeografia
Àrea	41,57 km²
Altitùdene	60 m
Rente a	Barbaran Mosan ; Zovensedo ; Altaviła Vizentina ; Castegnero ; Nanto ; Bréndoła ; Longare ; Vicensa
Dati istòreghi
Dì festivo	Festa patronałe(7 de otobre)
Patrono	Santa Justina
Còdazi de identifegasion
Còdaze postałe	36057
Còdaze de matricołasion	VI
Fuzo oràrio	UTC+1 ; UTC+2
Prefiso tełefònego	0444
ID ISTAT	024006
Còdaze catastałe de Itàlia	A377
Sito web	comune.arcugnano.vi.it

Arcunjan^[2], (nome uficial in italian Arcugnagno) el xe un comun de 7 899 aneme de ła provincia de Vicensa, el se estende su un teritorio colinare e valivo che el fa parte del conprensorio dei Cołi Bereghi. Le visende storeghe le segue i fati de Vicensa da la cuale xe senpre dipexo el teritorio, no solo che economicamente.

Natura

El teritorio dei coli el ga poche sorxive, mentre inte le vali che se verxe a nord capita spese volte che vegna xo brentane de acua inte le stajon frede. De un gran lago che coverxeva le vali de Fimon almanco fin a la prima metà del Cuatrosento, ciamà lago de Lòngara, xe restà solo che un lagheto, el lago de Fimon par l'apunto, ancò ciapà drento a diversi progeti pien de radeghi sul so futuro, dopo diversi interventi sbałià, anca inte i ultimi tenpi, che ga fato peso el tacon del sbrego.

Economia

L'economia la xe senpre sta soratuto de canpagna: la vixela, el pi raro olivo, i àlbari da fruto, i xe sta a la base de la susistensa de le pòpolasion de colina; par cuei che viveva in vale, invese, i canpi e la pesca xera pi inportanti. La fin del sfrutamento de la cavatura de la torba e del legname, atività che le ga caraterixà el teritorio fin ai ani de l'industrialixasion masicia, ga dà de novo un aparensa verde e morbio a ste coline dolsi e cola forma slungà, co pianori d'altura dixegnà da spiàsi coltivà. Ancò el turismo el xe poco svilupà, a parte la gita de doménega al lago e el turismo par magnare, grasie ai diversi ristoranti e tratorie che ghe xe.

Storia

Le testimonianse de prexensa umana in ste tere le va indrio a la preistoria; difati i resti de palafite e canoe che xe sta trovà i xe ncora deso conservà inte el muxeo archeoloxego de Vicensa e i fa capire come che la vita a chèi tenpi la fuse ligà a la prexensa de un gran lago ciamà lago de Lòngara, sugà su, par diverse raxon, xa a la fin del Cuatrosento.

Aministrasion comunale

Sindisi de Arcunjan da la fin de la seconda guera al dì de uncò:

Attalo Gianfranceschi (1946-1948)
Mario Rigodanzo (1948-1950)
Gildo Donello (1950-1951)
Cesare Monti (1951-1956)
Giuseppe Fracasso (1956-1959)
Giuseppe Dal Lago (1959-1960)
Mariano Galla (1960-1970)^[3]
Giuseppe Sabbatini (1970-1975)
Giacinto Ruaro (1975-1979)
Aldo Donello (1979-1980)
Gianfranco Toniolo (1980-1985)
Giancarlo Zuin (1985-1990)
Vittorio Zolla (1990-1995)^[4]
Paolo Pellizzari (1995-2004)^[3]
Vittorio Zolla (2004-2009)^[5]
Paolo Gozzi (2009 - in carga)

Evolusion demografega

Abitanti censii

Arte e Architetura

Architeture rełijoze

Cexa parochiale de Santa Justina

Parochiale de Arcunjan, 1826. A partir dal 1824 scuminsia la ristruturasion de la vecia cexa del caoliogo; la vien ingrandia par starghe drio al cresare de la comunidà. Le forme xe neoclaseghe; la fasada la xe de conpoxision lineare e esensiale: un gran tinpano co decorasion dentada che buta in fora tien su ai vertisi tre statue; soto el tinpano cuatro lesene in copia, in stile ionico barochexante, ligae da do festoni de fruta in piera a altorilievo, che le divide la fasada in tre canpi verticali, in mexo postà sora el portale tinpanà ghe xe un tondo fato come un roxon orbo; soto tuti e do i festoni ghe xe do spasi decorativi retangolari orbi da la cornixa lisia, andove al posto dei cantoni ghe xe de le convesità dal saor rococò; soto altri do spasi incornixà retangolari de diverse misure. La parte drento xe a navata ùgnola retangolare, l'abside xe a pianta mistilinea trapesoidale, la cupola absidale, a sesto ribasà, no se pol vederla da fora, tre altari barochi decorà a tarsia de marmo. El sagrà de la cexa xe alto rispeto la strada e se va su par na scalinada. La xe sta restaurà inte el 2001.

Drento, a dreta de l'altar maxor se cata un Cristo Patiens del XV secolo sirca, a basorilievo de anonimo in piera scura de Nanto. El mostra un Cristo flaxelà, xà incoronà de spine che vien su col busto da na cornixa, e afiancà da do cherubini, i brasi conserti verso i polsi incroxà so la pansa. La figura la xe sarà inte el concavo da un sguso de capa; fa da cornixa torno a la dolente figura un arco decorà co senplisi motivi modulari. Le lesene drento le xe ornà a motivi fitomorfisi, in baso al sentro un buxo cuadro el mostra el tabernacolo.

Fora de ła cexa se cata el canpanile, scuminsià inte el 1838 e finìo inte el 1845 el xe alto 45 metri, el ga na baxe a prisma de piramide, el fusto xe a sesion cuadrangolare, sormontà da na cela canpanaria a cuatro lusi a arco, decorà a ogni canton da lesene ioniche; el vertise xe coronà da na guja che sormonta na "cupola a seola" in stile alpin, tegnù su da un tanburo otagonale co sfexe verte cuadrangolari, riva in sima co na croxe in fero co bandiereta che riporta l'acronimo IHS. Restaurà inte el 2005

Parochiale de Perarolo

La Tore canpanaria la xe del 1911, in stile neogotego e a pianta otagonale, progetà da Vittorio Barichella. Colpia da un fulmine ai inisi dei ani Otanta del Novesento la xe sta ricostruìa co le forme presendenti.

Cexa de Santa Malgarita dei Bereghi

Del XIV secolo, postà drio la Dorsale dei Bereghi, la xe alta su la Vale de la Fontega; la xe na costrusion picola a na navata absidà co strutura a capana. Su la fasada un picolo òcio, come un roxon, el sovrasta l'entrada prinsipale.

Drento se cata un siclo de afreschi del XV secolo atribuidi a Batista da Vicensa. I raprexenta i dodexe apostoli piturà inte el cadin absidale, co i atributi iconografisi par jutarne l'identificasion; al sentro, drento na cornixa a mandola, se vede un Cristo Pantocratore, ai lati i sinboli xoomorfisi dei evanzełisti. So'l muro verticale che ciapa drento l'arco absidale ghe xe na Anunciasion e, inte un picolo tondo sora la ciave de volta, xe rafigurà el Pare Eterno; de fianco de l'entrada laterale xe difisile lexare l'altra figura de vescovo. La diresion verso la vale de Sant'Agostin faria pensare a la rapresentasion de st'ultimo. La conposision la ricorda un poco la staxi de la pitura bixantina, anca se se sente le influensa dei gioteschi.

Cexa de Santa Maria de la Neve e de San Roco

Del XVI secolo. Le forme de fora de la ciesa de ancò le xe soratuto sincuexentesche. Ma el sacelo ghe xe xa, secondo documenti, a la fin del Doxento. Prima dedicà a la Madona de la Neve (documenti del 1418-1443), dopo la pèste "manxoniana" del 1630, la xe sta dedicà de novo a San Roco, che xe el santo de le vitime de le epidemie. La cexa la xe sircondà da un mureto, che ciapa drento el vecio simitèrio, e la xe dominà da un picolo canpanile intradoso.

Oratòrio de la Madona de la Pase

Del 1700, senplice capela da la fasada un poco verticalixà incoronà da un fronton triangolare, andove che xe iscrito un fregio che rafigura na stela a oto punte, e da tre statue. Na scalinada curta la mena a la porta d'ingreso incornixà a architrave, l'abside la xe a pianta semisircolare.

Oratòrio de la Sacra Fameja

Del 1752, rente Vila Calvi, in suto stile rococò, da le forme lineari e asè giometreghe, el ga sol davanti un tinpano andove che xe inscrito un fregio elitego decorà da cornixe a forma de reciare; in mexo xe posta' na finestra co la cornixa a linee miste, asè anticlasica, che la sta sora un portale elegante dal tinpano spacà, che inscrive na decorasion a capa de piera in rilievo. La parte interna la xe rovinà dal crolo del plafon, inte el muro contrario al davanti ghe xe un altare tardobaroco.

Oratòrio de San Gaetan

Del 1790, rente la Contrada Saco', in stile neoclasego tacà a un altro edificio, e col pian rialsà doparà come atico. Resta solo che i muri perimetrali e la fasada de fora, parchè ancò la xe la portineria de un albergo.

Oratòrio de San Piero

Del 1706, rente la Contrada Zanchi, picolo bigiù baroco, inte la acesion clasichexante visentina, l'aula la ze cuadrangolare, decorà da racuante statue in piera de Vicensa o dei Bereghi. La fasada la ga un tinpano a linee miste rotondà e apiatio sol vertise, coronà da tre statue postà simetricamente, in mexo al muro se verxe un roxone trilobà che riciama el strafòjo, che lasa intravedere drento un grupo scultoreo ciamà el "Prexepio". El portale xe sormontà da un tinpano a arco spacà, co in mexo un grupo scultoreo.

Drento se cata el "Prexepio", òpara del 1706 de Jacomo Cassetti, la conpoxision la se fa evidente so le cuinte teatrali dà da la posixion rialsà, inte la controfasada inte el spasio del roxon trilobà. In mèxo la Madona orante in xanocion la varda Jexù deposto sol àlbio, a la sanca xe sentà Sant'Ixepo, intanto che cuatro pastori drio Maria i contenpla el putèlo, so la destra de la conpoxision altri do pastori, el bo e el muso; tre puti i voltegia sol grupo incornixà da na luneta.

L'Oratòrio el ga anca altre statue de la botega del Cassetti, alegorie de le virtù teologali e figure de santi, financo el busto del comitente che varda l'aula da la controfasada del manufato. So la fasada de fora, sol tinpano sora la porta, ghe xe la statua del'Arcànxolo Michièl che inpira un demone, de fianco ghe xe do anxoli postà michelangiolescamente so la curvatura del tinpano.

Oratòrio de Santa Terexa de Jexù

Del 1772, rente Vila Vegre, la picola capela la ga na strutura co tinpano lineare; de fianco le tien su el tinpano de la fasada do lesene, in mexo ghe xe na finestra cuadra, anca el portale el ga el tinpano.

Architeture sivili

Vila Anti

Del XV secolo, in stile tardogotego la xe postà su na dolse calà in vista de l'Abasia de Sant'Agostin. La ga, vegnendo da la strada, na barchesa del XVII secolo (ricovero de le bestie e dei atresi da lavoro inte i canpi) co un gran arco a tuto sesto.

Vila Bornigni, Monxa, Vidi, Todescan, Goxi

De la metà del Siexento, el corpo sentrale de la vila el mostra al pian teren tre arcade cromategamente inpisà dal coto, tegnù su da pilastri a bugnato. Ben pi exile xe la logia balaustrada che ghe xe sora, divixa in tre luxi da colone tuscaneghe a fusto lisio. Costruida su un edificio del Cuatroxento che ghe xera xà prima. Doparà come abitasion privà.

Vila Colonexe, dita Vila Amelia

I ghe ga meso le man inte el 1681 e inte el 1803, so na baxe del Sinquexento. Ancò la xe in corso de ricualificasion secondo un projeto del architeto portogheze Alvaro Siza, dopo diversi interventi e slargamenti anca pexanti che i la gaveva trasformà in convento de clauxura dal 1961.

Vila Calvi

Del 1720 sirca, vila rurale setesentesca da la fasada tripartia, el bloco sentrale diviso da sete intercolumni. La ga drento stanse afrescà in stile arcadico co temi pitoreschi de la rovina e del paesagio selvadego, cupo.

Vila Franceschini Pasini Canera de Salasco

Vila neopaladiana del 1770 costruìa par el sedaiolo Girolamo Franceschini so progeto de Ottavio Bertotti Scamozzi, el xe el manufato pì inportante de Arcugnan. Dal 1854 la xe sta de propietà de Valentino Pasini. Po la xe pasà, fin a la metà dei ani otanta del Novesento a Giuseppe Canera de Salasco, de fameja nobile piemontexe. Canera el jera colesionista d'arte moderna sie-setensentesca e la vila la gheva na notevole colesion d'arte pitorica, finia a l'asta inte el 1986 dopo la morte del paron.

Vila Montanari

In stile neoclasego otosentesco, co influense neopaladiane, asè frecuenti inte le òpare de architeti setesenteschi vixentini, soratuto par la strutura simetrega e i materiali (laterisio e piera de Vicensa). El corpo sentrale el prexente, al pian nobile, tre fenestre balaustrae intervalae da do lesene ioniche. Inte le ale el ritmo che contradistingue la fasada el xe mantegnùo dal steso nùmaro de fenestre par porsion, sormontae da tinpani a arco o triangolari intervalai. Drento, al piano tera se cata un anpio atrio afrescà a monocromi e colone de cuarèli imaltae, i pavimenti i xe a tarsia. Inte el cortile se cata, come che testimonia xà le carte topografege de l'epoca napoleonega (1806), altri edifisi.

Architeture militari

Tore pentagonale

Del X secolo, a pianta iregolare; la dà el nome a la contrà de Tori de Arcunjan; secondo serte testimonianse del Siexento (Filippo Pigafetta) e primi del'Otoxento (Gaetano Maccà), gaveva da esarghe do tori de controlo e avistamento, afiancà a le do cuote del monte Croceta che el domina la Val de Bura e la Vale de la Fontega, andove che ghe gera el gran lago de Lòngara, ipotexi avalorà anca da vecie mape che le mostra, in loco, do tori. El stile el xe rùstego: el baxamento el xe a blochi de piera lavorà a cubo, verso el vertise la costrusion la xe a materiale misto (oltre a la piera trovemo el laterisio, intervalà a file orixontali). Da poco, xe sta postà na croxe de fero in sima a la tore.

Leteradura

Arcugnan el xe cità inte La tubia del Menon conponimento in pavan de la metà del Cincuesento, el scrito el xe comico, libertin e parodistico, de anbientazione bucolica e vagamente arcadica. L'òpara la jera asè conosua in tuto el Stato Vèneto.

Pì tardi, inte el canto VIII de La secchia rapita de Alessandro Tassoni (1622) se lexe:

XXXVII

Valmarana, Arcunjan, Pilla e Fimone,

Sacco e Spianzana guida; ove le chiome

de la Betia cantò su el Bachiglione

Begotto e el volto e l'acerbette pome,

e dove la sampogna di Menone

fe' risonar de la Tietta il nome;

e Montecchio e la Gualda, Olmo e Cornetto,

e trenta ville e più di quel distretto.

Tra i ultemi leterai a parlar de Arcunjan el poeta vixentin Giacomo Zanella, che inte la poexia Un mattino d'inverno sui colli Berici (1871) el descrive del pogio de Vila Malgarita e el picolo lagheto de la Fontega.

Toponomastega

El nome Arcunjan el xe de derivasion toponomastega antiga, ła ipotexi co pì credito ła dà na derivasion nominal a un fondo cołinar a sołatìo indove se coltiva ła vida: da sto fondo se połe ipotixar el nome del propietario, "Arcuiniano", pì in xeneral se połe parlar de un Fundus Arquinianus, e da sto cua el derivaria el nome de ancuo.