Sainte-Capèle
El Sainte-Capèle, qu'in apèle itou Sainte-Capèle d'ech Palais, ch'est unne capèle palatinne (d'un palais) qu'o 'tè batite edseur chl’Ile d'el Chitè d’Paris à partir ed 1238 par saint Louis por abriter ches rlikes d'el couronne d'épinnes, un morcieu d'el vraie croés pi d'eutes rlikes d'el Passion à ch'Crisse eq saint Louis il o ieu in 1239.
Ch'est l'prunmière ed ches saintes-capèles, unne série d'capèles fort similoaires qu'étoétte pinsèes conme des gégantes casses à rlikes avuc plangne ed vitraus. El Sainte-Capèle ed Paris, conme ches eutes in Franche, al est rvoéïabe por esn'éléganche pi l'qualitè d'esn'arkitecture qui s'caractérise par unne heuteur pus importante pi unne suppression quasimint totale ed ches murs dins ches fnètes. Minme si qu'al o 'tè batite in seumint sèt ains, o n'o mie rlevè d'trakes ed défeuts dins l'construction. El décoracion à l'capèle a foait apèl à chou qui s'fzoét d'meilleur in art dins ch'Roéyaume ed Franche à ch'tans-lo : estchulpture, pinture pi vitraus. Ches gégants vitraus sont coér voéïabes dins l'capèle, is sont quasimint intacts. Ches rlikes a n's'truvtte pus dins l'capèle edpis l'Révolucion.