Laman Karibe

Laman Karibe
	Imagen di satelit (NASA) di Laman Karibe
Lokalisashon geográfiko
Oséano	Oséano Atlántiko
Koordinatonan	15°N 75°W / 15°N 75°W
Lokalisashon atministrativo
Pais	Mexico, Belize, Cuba, Guatemala, Honduras, Nicaragua, Costa Rica, Panama, Colombia, Venezuela, Jamaica, Haiti, Republika Dominikano, Puerto Rico, Grenada, Saint Lucia, Fransia, Dominica, Reino Uni, Saint Kitts i Nevis
Kurpa di awa
Tipo	laman
Área	2,754,000 km²
Profundidat máksimo ; ;	; 7,686 meter
Mapa detayá di Laman Karibe
	Imágennan riba Wikimedia Commons
	[Editá Wikidata] · [Manual]

E artíkulo aki ta skirbí na papiamentu. Lo ta apresiá si por mantené e artíkulo aki na estilo di papiamentu.

Laman Karibe (òf Laman Caribe) ta un laman tropikal pegá ku Oséano Atlántiko i sùit-ost di e Golfo di Mexico. E ta tuma gran parti di Plato Karibense i ta yega te Venezuela, Colombia i Panama den sùit, Costa Rica, Nicaragua, Honduras, Guatemala. Belize i e península di Yucatan di Mexico na parti wèst, i pa parti nort e islanan di Antia Mayor manera Cuba, Hispañola, Jamaica i Puerto Rico anto pa parti ost e Antia Menor.

Laman Karibe ta un di e lamannan salu mas grandi na mundu i tin un área banda di 2.754.000 km² (1.063.000 mia²). E laman su punto mas hundu ta e Trinchera Cayman, entre Cuba i Jamaica, na 7.696 meter (25.220 pia) bou di nivel di laman.

E área kompletu di e Laman Karibe, espesialmente e islanan numeroso, ta konosí komo Karibe. E kosta di Sur Amérika i Amérika Sentral tin yen golfo i bahia, por ehèmpel e Golfo di Venezuela, Golfo di Darien i e Golfo di Honduras.

Historia

E palabra "Karibe" ta derivá for di e Caribnan, un di e tribunan di indjan dominante ku tabata den e region ora e oropeonan a deskubri e área di Karibe i a haña kontakto ku varios indígena den e área aki durante e fin di e siglo 15. Despues di e deskubrimentu de Karibe pa Cristóbal Colón na aña 1492 e nòmber spaño "Antias" a wòrdu designá na e área, i derivá for di esaki a yama laman Oceano de las Antias i ta te ainda un nòmber alternativo pa Laman Karibe den varios lenga oropeo. Durante e promé siglo despues di deskubrimentun Spaña tabata e poder dominante.

E Laman Karibe tabata deskonosi pa oropeonan promé ku 1492. Ora Colon a yega einan e tabata buska un ruta alternativa pa yega India. Despues di su deskubrimentu Oropa a kolonisá e área lihé i Karibe a bira un basé pa komersio i transporte oropeo i e rikesa aki a atrae tambe hopi pirateria.

Awendia e área ta konsistí di 22 teritorio insular i e ta grens na 12 pais kontinental. Pasobra e tin un abundansia di solo, temperaturanan kayente henter aña ront i hopi playanan i otro destinashonnan pa bishita, durante e d dos parti di siglo 20 i sigui den siglo 21 Laman Karibe ta un área masha inportante pa turismo, i e mayor luga di turismo krusero.

Geologia

Laman Karibe ta situá riba e Plata Karibense. Ta estima e edat di e Laman entre 20.000 aña pa 570 mion aña bieu. Karibe ta separá den 5 basín aparte separá for di otro ku serunan marino. Oceano Atlantiko ta drenta laman karibe via di e Anegada Passage situá entre Antia Chiki i Islanan Birgen i na Windward Passage situá entre Cuba i Haiti. E kanál Yucatán ta konektá Laman Karibe ku Golfo di Mexico

E Plata Karibense tin hopi aktividat ku tin e efekto ku tin hopi riesgo di teremoto i maremoto ku por kousá tsunami ku por hasi hopi daño na Islanan Karibeño. Data sientífiko a mustra ku e delaster 500 aña tabatin mas ku 12 teremoto riba di 7.5 grado di eskala di Richter.

Ekologia

Laman Karibe ta kontene 9% di tur e ref di koral na mundu, kubriendo 52,000 km2 mayoria di nan ta situá banda di e islanan karibense i e kosta Sentro Merikano.

Durante e delaster 10 añanan e awanan di Laman Karibe a subi den temperatura i esaki ta forma peliger na su refnan. Refnan ta sostene un di e ekosistemanan mas riku na mundu pero tambe nan ta mashá fragil. Ora awa bira muchu kayente pa muchu largu sierto plankton yama zooxanthellae ku ta biba huntu ki e koral den e polipnan ta muri. E matanan aki ta duna kuminda na e koral i ta dun'é su koló. E resultado aki nos ta yama bleekmentu di koral anto por destui áreanan extenso di ref.

E habitatnan sosteni dor di koral ta di hopi importansia pa aktividatnan manera piskamentu i sambuyamentu i ta duna Karibe un balor ekstra di USD 3.1- 4.6 bion pa aña. Si sigui destrui e refnan esaki por daña e ekonomia di mayoria di e islanan.

Ekonomia i aktividat humano

E área di Karibe tin hopi aktividat humano for di tempu di kolonisashon. E laman ta e di 2 área di produsi zeta krudo mas grandi na mundu, aproksimadamente 170 míon ton pa aña. Tambe pa piska e área ta di gran importansia; tin un industria di piska masha grandi mes den Laman Karibe ku ta produsi aproksimadamente mei míon ton di piska pa aña.

E aktividat humano tambe ta trese hopi polushon, Organisashon di Kuido Pan Amerikano a deskubri ku solamente 10% di awa usá ta wòrdu purifiká promé ku e yega laman. E área di Karibe ta sostene un kantidat di turista masha haltu. Aproksimadamente 12 míon hende pa aña ta bishita e área, inkluyendo 8 míon turista krusero. Turismo basa riba sambuyamentu i snorkelmentu riba ref di koral ta un kontribuidó masha grandi mes di e ekonomia di sierto isla.