Mesen

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Mesen mèt aongrenzende (deil)gemeintes (zuug de hoofteks veur 'n verklaoring)

Mesen (Wes-Vlaoms: Meêsn; Frans en Ingels: Messines) is e stedsje in de Belzje provincie Wes-Vlaandere, arrondissemint Ieper, tege de grens mèt Wallonië. De stad besleit 'n oppervlak vaan 3,58 km² en had op 1 januari 2016 1.054 inwoeners.

Geografie

Mesen heet gein deilgemeintes en gein aander kerne binne zien grenze. E deil vaan wat de facto de plaots Mesen is, ligk binne de grenze vaan Wijtschate.

Aongrenzende (deil)gemeintes

Wijtschate (gemeinte Heuvelland)
Waasten (Warneton, gemeinte Komen-Waasten, Wallonië)
Ploegsteert (gemeinte Komen-Waasten, Wallonië)

Cultuur

Bezeensweerdeghede

In 't stedsje steit 'n Sinterklaoskèrk (oersprunkelek oonderdeil vaan 'n abdij, verweus in d'n Ierste Wereldoorlog, kèrk herbojd nao 't gebouw vaan d'n achtienden iew) mèt 'n romaanse crypte oet d'n èlfden iew wat de begraofplaots vaan Adela vaan Mesen is. 't Kerriljóng späölt eder kerteer meziek die aon d'n Ierste Wereldoorlog moot rappelere. 't Gief versjèllende begraofplaotse, boe-oonder ein veur de Iere (Island of Ireland) en ein groete veur de Britte (Messines Ridge British Cemetery), boe 1.500 soldaote begraove ligke.

Taol

De volkstaol vaan Mesen is Westelek Wes-Vlaoms mèt e paar continentaol kinmerke, liekend op 't dialek vaan Ieper. Mesen is 'n faciliteitegemeinte; de faciliteite zien veur Franstaolege.

Historie

Mesen, allewijl dörps en ingeslaope vaan karakter, waor in d'n èlfden en twelfden iew 'n belaankrieke stad mèt 'n bekinde abdij veur vrouwe. De abdis had de wereldleke mach euver de stad en zelfs zègkensjap euver e mannekapittel. Dit maakde 't bestuur vaan de stad oongebrukelek. Adèle vaan Fraankriek, 'n Franse prinses ouch wel bekind es Adela vaan Mesen, is hei gestorve en in de crypte (zuug bove) begraove. 't Waor in deen dage e centrum vaan de lake-industrie (same mèt mechtege stei wie Ieper en Brugge). Me tèlde in de vieftienden iew 2.000 heerde (de gebrukeleke belastingeinheid bij Franse volkstèllinge), wat neerkump op 6.000 tot 8.000 inwoeners. Nao 'ne groete brand in dezelfden iew góng 't stedsje achteroet. In de Napoleontischen tied verloor 't ziene stadstitel. In d'n Ierste Wereldoorlog is hei hel gevochte; hei woort de mijneslaag vaan Mesen oetgevochte. Bij Mesen waor 't ouch tot Adolf Hitler gewond raakde en e litteike opleep. In de jaore zesteg woort Mesen tot faciliteitegemeinte; door dee status oontkaom 't in 1977 aon herindeiling bij de gemeinte Heuvelland. In 1985 kraog Mesen ziene stadstitel trök.