Izegem

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Izegem mèt deilgemeintes en aongrenzende (deil)gemeintes (zuug de hoofteks veur 'n verklaoring).

Izegem is 'n stad en gemeinte in de Belzje provincie Wes-Vlaandere, in 't arrondissemint Roeselare. De gemeinte heet 'n oppervlak vaan 25,48 km² en had op 1 januari 2008 26.781 inwoeners.

Geografie

Deilgemeintes

Izegem heet drei deilgemeintes. De deilgemeinte Izegem zelf heet 'n oppervlak vaan 14,88 km².

I. Izegem
II. Kachtem
III. Emelgem

Aongrenzende (deil)gemeintes

a. Ingelmunster (gemeinte Ingelmunster)
b. Lendelede (gemeinte Lendelede)
c. Sint-Eloois-Winkel (gemeinte Ledegem)
d. Rumbeke (stad Roeselare)

e. Roeselare (stad Roeselare)
f. Ardooie (gemeinte Ardooie)
g. Meulebeke (gemeinte Meulebeke)

Ligking

Door de gemeinte Izegem struimp 't Roeselare-Leiekenaal. Izegem zelf ligk zuielek, Kachtem en Emelgem ligke noordelek vaan 't kenaal. De drei dörper weure verboonde door 'n oetgebreid industriegebeed wat ziech aon allebei de kante vaan 't kenaal oetstrek.

Economie

Izegem had tot haafweeg veuregen iew 'ne groetsjaolege industriele sector (sjeun, beurstele, olie). Dao is noe neet al te väöl mie vaan euver. Belaankrieker is allewijl 't Veujingsoliefebrik Vandemoortele.

Cultuur

Bezeensweerdeghede

In en bij Izegem vint me de neogotische Heileg Hartkèrk (foto) en de kestiele Blauwhuis en Wolvenhof. Bekinder zien de musea euver 't industrieel verleie vaan de plaots: 't Sjeunmuseum, 't Beurstelmuseum en 't Stoummachienemuseum.

Taol

't Izegems dialek is Continentaol (zuidoostelek) Wes-Vlaams en liekent väöl op 't Kortrijks. Dao zien versjèllende publicaties euver versjene, boe-oonder 'n idioticon (Balcaen, Bogaert, Cneut en Vercreysse, 1994). 't Dialek is bekind tot wied boete de provincie door 't werk vaan 't Hof van Commerce en Flip Kowlier.

Historie

Izegem, oontstande in de middeliewe, bleujde al in d'n daartienden iew es steidelek centrum. Wie mie Vlaamse stei heel 't ziech mèt lake-industrie bezeg. Daonao sleep 't stedsje in, tot d'n aonlègk vaan 't Roeselare-Leiekenaal de economie weer momentum gaof. Tösse 1850 en 1950 woort Izegem eint vaan de belaankriekste industrieel centra in de aanders zoe agrarische provincie. Nao 1950 veel de industrie lankzaam in. In 1965 (opmerkelek vreug) woort Emelgem bij Izegem geveug, in 1977 volgde Kachtem.