Koekelare

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Ligking vaan Koekelare in Wes-Vlaandere.

Koekelare mèt deilgemeintes en aongrenzende (deil)gemeintes (zuug de hoofteks veur 'n verklaoring).

Dörpsstraot vaan Koekelare.

Koekelare (Wes-Vlaams: Kookloare) is e dörp en 'n gemeinte in de Belzje provincie Wes-Vlaandere, arrondissemint Diksmuide. De gemeinte heet 'n oppervlak vaan 39,19 km² en had op 1 januari 2008 8.342 inwoeners.

Geografie

Deilgemeintes

Koekelare besteit oet drei deilgemeintes. Binne Koekelare ligk daobij nog e veerde dörp. Koekelare zelf is mèt 28,45 km² en (2006) 6.870 inwoeners wiedoet de belaankriekste deilgemeinte.

• I. Koekelare
  • IV. De Mokker
• II. Bovekerke
• III. Zande

Aongrenzende (deil)gemeintes

a. Handzame, kèrkdörp Edewalle (gemeinte Kortemark) b. Werken (gemeinte Kortemark) c. Vladslo (stad Diksmuide) d. Leke (stad Diksmuide) e. Sint-Pieters-Kapelle (gemeinte Middelkerke)

f. Zevekote (stad Gistel) g. Moere (stad Gistel) h. Eernegem (gemeinte Ichtegem) i. Ichtegem (gemeinte Ichtegem)

Historie

In Koekelare zien prehistorische, Keltische en Romeinse voondste gedoon. De zoegenaomde Brugse Heerweeg leep door 't groondgebeed, wie ouch de Vlaamse Steinstraot. De naom is evels neet Keltisch of Latiens meh Frankisch. In 847 kump 'r veur 't iers veur, es Coclars, wat ziech liet opbreke in coc 'heuvel' en lars 'loo', 'ope plaots in 't bos'. In de vreug middeliewe laog Koekelare zuielek vaan e groet oontoontgonne gebeed, d'n Utfanc. Ouch in de negenden iew vele de Noormanne binne. Tege die invalle woort 'ne vlöchbörch ingeriech, dee later d'n Oosthof woort. Dao hele de hiere vaan Koekelare residentie. Later deeg de sjepebaank vaan 't Brugs Vrije hei 'n leprozekolonie inriechte. In de zestienden iew raakde 't gebeed mèt de Tachtegjaoregen Oorlog versjäörd, wat de bevolking sterk verminderde. Daonao woort 't dao rösteg en naom 't aontal bewoeners lankzaamaon touw. 't Gehuch De Mokker (oersprunkelek 'nen herberg) greujde in d'n twintegsten iew oet tot e dörp (sinds 1925 'n eige parochie). In 't Interbellum woort de plaots sterk door de verzuiling getroffe. In 1971 woorte de klein gemeintes Bovekerke en Zande aon Koekelare touwgeveug.

Extern links

• Website vaan de gemeinte