Olosene
La olosene es la epoca jeolojial corente. Lo ia comensa sirca 11,650 aa, pos la eda glasial final. La nom es derivada de la elinica antica parolas holos ("intera") e kainos ("nova"), per sinifia "resente completa". La olosene e la presedente epoca la plestosene composa la periodo cuaternia. La olosene es identifiada con la periodo calda corente. Algas vide esta como un periodo interglasial en la epoca plestosene.
Per detalias, vide la scala de edas jeolojial.
La olosene coresponde con la estende rapida, crese, e efetos de la spesie umana mundal, incluinte tota sua istoria scriveda, revoluis tecnolojial, developa de sivilias major, e la cambia sinifiante a abitas urban en la presente. La efetos de umanas sur Tera de la eda moderna e sua ecosistemes pote es videda de sinifia global per la evolui de spesies de viventes, incluinte la efetos sur la atestas siensal sur la litosfera, idrosfera, e atmosfera.
Animales e plantas no ia evolui multe en la olosene, ma on ave cambias major en la distribui de los. Un cuantia grande de animales grande, incluinte mamutes e mastodones, smilodones, e bradipos jigante ia desapare en la plestosene tarda e olosene temprana, spesial en America Norde, do animales cual ia survive en otra rejiones (como cavalos e cameles) ia deveni estinguida. Esta ia es esplicada par la ariva de la asendentes de la americanes orijinal, an si la plu siensistes dise ce la cambia de clima ia contribui ance.
La comensa de la olosene coresponde con la comensa de la eda mesolitica en la plu parte de Europa, ma en rejiones como Asia sude-ueste e Anatolia lo coresponde con la neolitica temprana, ance novida la epipaleolitica. En esta periodo, la locas abitada la plu vea cual ancora esiste sur Tera ia es prima colonida, como la Tell es-Sultan (Jerico) en Asia sude-ueste.