Acua
Acua es un sustantia cimical transparente e cuasi sin color cual es la composada xef de la rios, lagos e mares de la Tera, e de la licuidas de la plu de organismes vivente. Sua formula cimical es H2O, indicante ce sua molecula conteni un atom de osijen e du de idrojen, cual es liada par lias covalente. Vera, la parola "acua" refere sola a la state licuida de acel sustantia, dominante a la temperatur e presa normal de la ambiente; ma lo refere comun ance a sua state solida (jelo) o sua state gasal (vapor). En natur, lo apare ance como neva, glasias, jelo vagante e isberges, nubes, nebla, rosio, acuiferes e umidia atmosferal.
Acua covre 71% de la surfas de la Tera. Lo es esensal per tota formas conoseda de vive. Sur la Tera, on trova 96,5% de la acua de la crosta en mares, 1,7% en locas suteran e la xapetas de jelo de Antartica e Calalitnunat, un frato peti en otra corpos grande de acua, e 0,001% en la aira como vapor, nubes (formida de jelo e acua licuida suspendeda en aira), e presipita. Sola 2,5% de esta acua es dulse, e 98,8% de acel es en jelo (estra jelo en nubes) e acua suteran. Min ca 0,3% de tota acua dulse es en rios, lagos e la atmosfera, e un cuantia an plu peti de la acua dulse de la Tera (0,003%) es contenida en corpos biolojial e produidas fabricada. On trova un cuantia plu grande de acua en la interna de la Tera.
Acua sur la Tera move sempre tra la sicle acual de vapori e transpira, condensa, presipita e supraflue surfasal, usual ateninte la mar. Vapori e transpira contribui a la presipita supra tera. Multe acua es ance cimical combinada o adsorbeda en minerales idratada.
La esiste de bon acua bevable es esensal per umanas e otra formas de vive, an si lo furni no calorias o nurintes organica. La asede a bon acua bevable ia crese en desenios resente en cuasi cada parte de la mundo, ma sirca bilion persones ancora no pote asede bon acua, e plu ca 2,5 bilion no ave ijenia sufisinte. Un corelata clar esiste entre la asede a bon acua e la produi interna bruta per persoon. An tal, alga comentores ia estima ce ante, la fini de 2025, plu ca un dui de la abitores de la mundo va fronti periles pertinente a bon acua. Un reporta publicida en novembre 2009 sujesta ce ante 2030, en alga rejiones developante de la mundo, la esije per acua va esede la furni par 50%.
Acua fa un rol importante en la economia mundal. Sirca 70% de la acua dulse usada par umanas vade a cultiva. La pexa en acua dulse e salosa es un fonte major de comeda per multe partes de la mundo. Multe benes como petrolio e gas natural e produidas fabricada es comun transportada par barcones tra mares, rios, lagos e canales. On usa cuantias grande de acua, jelo e vapor per fri e caldi en industria e casas. Acua es un disolvente eselente per sustantias cimical diversa; per esta razona lo es vasta usada en prosedes industrial, e en cosini e lava. Acua es ance fundal a multe sportes e otra formas de diverti, como nada, turi en barcon, corsa de barco, surfa, pexa sportal e tufa.