Cartas

Un carta per jua es un retangula de paper spesa o plastica magra, marcada par imajes variosa, comun sirca la grandia de la mano. Los es usada prima per juas de fortuna, juas de capasia, e juas de aposta. Los es ance usada per trucos de majia e per leje la fortunas.

Un grupo completa de cartas es nomida un paco, un grupo plu peti de cartas tenida par un juor es nomida un mano. La paco es acasida par misca, e es distribuida a la juores per crea la manos de cartas.

Un lado de cada carta ave un imaje cual indica la valua o rol de la carta en la jua. La reversa de la cartas ave un decora comun ma sin sinifia. La varia la plu comun internasional es la cartas franses. Los es divideda entre cuatro familias, indicada par esta simboles:

♠ spadas
♥ cores
♦ diamantes
♣ trefolias

En cada familia, ave 13 valuas: cartes numerida un a des, e tre cartes real:

la re
la rea o dama
la pajo

Istoria

Cartas per jua ia es inventada en Xina antica, con la esemplos prima de sentenio nove en la dinastia Tang. La refere prima a juas de cartas es de la mesma sentenio: Colie de miscadas a Duyang, par Su E, cual descrive prinsesa Tongchang (fia de imperor Yizong de Tang) juante la "jua de folias" en 868.

A la sentenio 11, cartas de jua ia esiste tra Asia. Los ia es introduida a Europa en la sentenio 14, probable par la Mameluces de Misre. En la cartas mameluc, la cartas real ia es la re, la visre, e la visre du. La cartas no ia ave imajes de esta persones, car la curan proibi los. Los usa la familias simil a la familias de la cartas de taroci: spadas, bastones, copas, e monetas. Esta familias es ancora usada en pacos tradisional en Italia, Espania, e Portugal.

La indica prima de la usa de cartas de jua en Europa ia es un proibi de la usa en 1367, en Bern, Suiz. Ma la juas de cartas estende tra Europa multe rapida de acel ora. Orijinal, la cartas ia es decorada par mano. Ma, comensante en 1418, primores comensa crea pacos par usa impresas de lenio siselida. Pronto pos esta, los comensa usa grava.

En Deutxland e Suiz, la familias ia cambia: spadas deveni folias o scermos, copas deveni cuercas o rosas, monetas deveni campanas de falcones. Sola cores resta cores. En Frans, la folias deveni la simbol per spadas, e la cuerca deveni la trefolia. La monetas de la paco orijinal deveni la diamantes, e la cores resta cores. En England, cartas ave la formas de los de Frans, ma la nomes reteni alga referes a la formas plu antica: spades de la italian per spadas e clubs (bastones) per trefolias.

Ance en la sentenio 15, europeanes ia cambia la cartes real per represente la real european. Prima, la cartes ia es la re, la pajo, e la "xico", cual pote es comprendeda como un prinse o un pajo per la cavalero. Pacos de 56 cartes, seguente la pacos de taroci, comun usa la re, la rea, la cavalero, e la pajo. La cartes de Rouen en Frans, desiniada en la sentenio 16, deveni la model per cartes en Frans, England, Nederland, e Scandinavia, e usa la formas de re, rea o dama, e cavalero o pajo. En Frans, la cartes real ia es asosiada con persones istorial e mitolojial:

re de spadas: David
re de cores: Carlo la grande
re de diamantes: Julio Cesar
re de trefolias: Alexandro la grande
rea de spadas: Atena
rea de cores: Judita
rea de diamantes: Racel
rea de trefolias: Argine (posible un anagram de Regina, latina per rea)
cavalero de spadas: Holger la dansce (un cavalero de Carlo la grande)
cavalero de cores: La Hire (comrada de Joana de Arc)
cavalero de diamantes: Hector
cavalero de trefolias: Judas Maccabeo o Lancelot

Ance, la familias ia es interpretada como la clases de la sosia:

la spadas = la nobiles
la cores = la pretes
la diamantes = la comersiores e artisanes
la trefolias = la cultivores

On ave inovas en la sentenio 19: Prima, la primores ia ajunta la valua de cada carta a la canto de la carta. Alora, juores pote ordina la cartas en un mano, estendeda per vide fasil la valua. Du, la primores ia comensa dupli la imajes la cartes real, con un a alta e un reversada a basa. Un inova peti ia es la usa de la nom as per la carta de la min valua. La parola es de la latina per la moneta la plu peti in la eda roman. En multe juas, la as ave un valua plu grande ce an la re. E final, la bufon - comun, du per paco - ia es introduida per usa como un carta con valua elejable.

Un comun mito sujeste ce la paco de cartas ave un sinifia astrolojial. Alga persones nota ce la paco ave 52 cartas - como la 52 semanas de la anio. Ance, lo ave cuatro familias, como la cuatro saisones. E cada familia ave 13 cartas, como la 13 menses de la anio lunal o la 13 semanas en cada saison. Posible, esta interprete es fortida par la usa de la cartas de la taroci per leje fortunas. Divertinte, esta es un de la sistemes sujestada par la ISO per descrive la data.

La familias relata comun a otra cosas en la leje de fortunas:

spadas = aira, la primavera, sangue, la figato, un person felis
cores/copas = acua, la inverno, flema, la serebro o pulmones, un person nonemosial
diamantes/monetas = tera, la autono, bile negra, la vesica bilal, un person melancolica
trefolias/bastones = foco, la estate, bile jala, la spleno, un person coler