Olimpiala Ludi en Athina, 1896
L'Olimpiala Ludi en Athina (1896), od oficale la 1ma Olimpiala Ludi, esis internaciona plursporta konkurso, qua eventis en 1896 en Athina, Grekia. Quoniam l'anciena Grekia esis la naskoloko di l'Olimpiala Ludi, Athina selektesis kom eventeyo por l'unesma Olimpiala Ludi di la modern epoko.
Athina selektesis kom loko dum kongreso en Paris ye la 18ma di junio 1894. Pierre de Coubertin, aranjinto di la kongreso, esis Franca aristokrato e historiisto, qua havis intereso pri korpala edukado en skoli e pri anciena Grekia.
La Ludi komencis ye la 6ma di aprilo 1896. L'inauguro-ceremonio eventis en la modernigita stadio Panathinaikos (ube, en anciena ero, eventabis atletala konkursi). Li asistesis da cirkume 80.000 spektanti, inkluzite la Greka rejala familio. Muziko por l'okaziono pleesis da plura grupi de muzikisti e kori. Olimpiala himno, kompozita da Spyridon Samaras (muziko) e Kostis Palamas (texto) kantesis unesmafoye. Ta himno divenos oficala dum l'Olimpiala Ludi en Roma, 1960.
Esis nula Olimpiala flamo, qua aparis unesmafoye en la Ludi di Amsterdam, 1928. Dum la sequanta dii eventis konkursi pri non sporti, inkluzite biciklovehado, gimnastikado, teniso e pezajoelevado.
Malgre kelk obstakli, la Ludi judikesis kom granda suceso: 241 atleti de 14 landi partoprenis, ed esis 43 eventi de 9 sporti. To signifikis la maxim granda partopreno da internaciona atleti til ta yaro. La klozala ceremonio eventis ye la 15ma di aprilo 1896.
Kelka fakti
[redaktar | redaktar fonto]- Rejulo Georgios la 1ma di Grekia inauguris la Ludi. La rejulo dicis: Me deklaras l'inauguro di l'Unesma Internaciona Olimpiala Ludi en Athina. Longa vivo a la naciono. Longa vivo a la Greka populo.
- L'inauguro-ceremonio eventis en la dio di Greka nedependo (ye la 4ma di aprilo segun la Gregoriala kalendario, e ye la 25ma di marto segun la Juliala kalendario).
- John Pius Boland, Irlandana nacionalisto qua konkursis por l'Unionita Rejio, esis la championo di teniso en la Ludi.
- En teniso por dui, l'esquadi konsistis ek mixita nacionalesi. La duo konsistante ek Germana Friedrich Traun e Britaniana John Pius Boland vinkis la konkurso.
- La vinkinti ne recevis ora, ma arjenta medalii.
- Spiridon Louis divenis Greka heroo per lua vinko en la maratono.
- Usan atleto Thomas Edmund Burke vinkis la 100-metra kurado kun tempo di 12 sekundi. Il anke vinkis la 400-metra kurado, kun tempo di 54,2 sekundi.
- Germania vinkis 5 de 8 konkursi pri gimnastiko.
Medalii ganita
[redaktar | redaktar fonto]
Yen la listo di landi qui ganis adminime 1 bronza medalio en 1896.
| # | Lando | Ora | Arjenta | Bronza | Entote |
|---|---|---|---|---|---|
| 1 |  Usa |
11 | 7 | 2 | 20 |
| 2 |  Grekia |
10 | 17 | 19 | 46 |
| 3 |  Germania |
6 | 5 | 2 | 13 |
| 4 |  Francia |
5 | 4 | 2 | 11 |
| 5 |  Unionita Rejio |
2 | 3 | 2 | 7 |
| 6 |  Hungaria |
2 | 1 | 3 | 6 |
| 7 |  Austria |
2 | 1 | 2 | 5 |
| 8 |  Australia |
2 | 0 | 0 | 2 |
| 9 |  Dania |
1 | 2 | 3 | 6 |
| 10 |  Suisia |
1 | 2 | 0 | 3 |
| 11 |  mixita esquadi |
1 | 1 | 1 | 3 |
| Totali | 43 | 43 | 36 | 122 | |