Saqqara

Saqqara
	سقارة (ar)
Localización
	29°51′00″N 31°14′00″L / 29.85, 31.2333
Estado	Exipto
Gobernación	Governación de Guiza
Markas of Egypt (en)	Markaz al Badrashayn (en)
Xeografía
Parte de	Mênfis e a sua necrópole (pt)
Altitude	39 m
Identificador descritivo
Fuso horario	UTC+02:00

Saqqara é o lugar da necrópole principal da cidade de Menfis, a uns 17 quilómetros da periferia de Giza, na cidade do Cairo. Estivo en uso dende a Dinastía I (aproximadamente 3100 a.C.) ata época cristián (ano 540).

Situación

A importancia da necrópole débese a gran cantidade de tumbas presentes, mesmo continuamente reutilizadas. Case a totalidade foi saqueada dende tempos antigos. A tumba do monarca máis antigo do que se teñen testemuñas nesta necrópole son os de Narmer aínda que a súa tumba, case con total seguridade, sexa a B17 na necrópole de Umm el Qa´ab, en Abidos moi lonxe de Saqqara.

En Saqqara Imhotep deseñou para o seu faraón Zoser unha tumba cun deseño revolucionario, a pirámide de chanzos de Zoser, primeira na súa especie. Tamén se atopan moitas mastabas de membros da elite do Imperio Antigo, que adoitan dispoñerse en relación coas pirámides dos seus soberanos, dende Zoser ata Pepi II.

Acabado o Reino Antigo, abandonarase Saqqara como lugar principal de enterramento, non sendo ata o Imperio Novo cando volva a ser usado, non polos faraóns (que se enterraban no Val dos Reis) senón polas clases dirixentes.

A partir da Baixa Época entérranse no norte da necrópole un gran número de animais sagrados, sobre todo vacas (nais de Apis) así como babuínos, falcóns e ibis. No norte posiblemente pola relación que ten a zona con Imhotep. Un pouco máis cara ao leste sepulcros de cans e chacais e gatos, chegando ata época grecorromana.

Con posterioridade, xa en época copta, estableceuse o Mosteiro copto de Apa Xeremías e un pequeno asentamento, ao sur da estrada de Unas con materiais reutilizados de construcións máis antigas.

Últimas descubertas

A finais de febreiro de 2007 descubriuse a tumba, feita en ladrillos de barro, do escriba de arquivos de templos Kahai e da súa esposa Spri-Ankh, na necrópole vinculada ó faraón Teti, e que viviron a finais da Dinastía V ou principios da VI (aproximadamente no 2300 a.c.). Nela atopáronse unha serie de estatuíñas en madeira (cinco en total), así como unha porta falsa de madeira e dúas mesas de ofrendas. Destaca a estatua dobre da parella sentada, por non ser habitual que foran feitas en madeira.

Edificacións máis importantes

Necrópole con mastabas de adobe dos faraóns da dinastía I.
Tumbas dos faraóns da dinastía II.
Complexos funerarios piramidais de Zoser e Shepseskaf da dinastía III.
Pirámide de Sejemjet da dinastía IV.
Pirámides de Userkaf, Dyedkara-Isesi, Unis da dinastía V.
Pirámides de Teti, Pepi I, Merenra I e Pepi II da dinastía VI.
Mastabas dos cortesáns Ti, Nebet, Unisanj, Iynefert, Mehu, Ajethotep, Mereruka, Idut, Ptahhotep e Ajuthotep, Neferptah, Kagemni, Nianjnum e Jnumhotep.
O Serapeum, lugar de enterramento dos bois sagrados.

Notas

Véxase tamén

Outros artigos

Menfis

Ligazóns externas