Biosfere

In ecologjie si definìs biosfere (o ecosfere) l'insiemi des zonis dal planet Tiere che lis lôr cundizions ambientâls a permetin il disvilup de vite. Chestis zonis là che si disvilupe la vite, che si pense che e sedi nassude almancul 3,5 miliarts di agns indaûr, a cjapin dentri la litosfere (sot tiere e superficie terestre), la idrosfere (lis aghis di mâr, di lât e di flum), e i prins strâts de atmosfere (fin a une altitudin di plui o mancul 10 km). La vite e je fate possibile su la tiere par vie di ciertis cundizions trant che la presince di une atmosfere, che e difint di radiazions e meteorits; une temperadure idonie al mantigniment des struturis terziariis e cuaternaris des proteinis e la esistence di elements chimics juscj pal davuelziment dai procès vitâi.

Influencis significativis su la biosfere a son dadis dai moviments di aghe e aiar su di jê e de posizion e dai moviments de tiere rispiet al soreli.

La biosfere, viodude tant che sisteme, al à scambis impuartants di materie ponderabile dome cul interni de Tiere (ciclis biogjeochimics). Il so alt nivel di organizazion al è garantît dal fat che e à radiazion eletromagnetiche dal Soreli, che i permet di mantignî un alt nivel di energjie libare.

La biosfere e pues jessi scomponude in macrounitâts caraterizadis di uniformitât di cundizions dal clime, là che si son adatadis une flore e une faune specifichis, definidis biomis, che a lôr volte a puedin jessi scomponûts in microunitâts clamadis ecosistemis.

Il concet di biosfere, intindude intal so insiemi tant che un organisim vivent, al è cognossût tant che ipotesi Gaia o teorie di Gaia.

Lis modificazions gjeologjichis e climatichis de biosfere acjadudis dilunc de storie dal planet a àn influît in profonditât tai ecosistemis e tai organisims vivents, determinant procès evolutîfs e estinzions.

Une acelerazion di chestis modificazions al somee jessi dât ancje dal disvilup de popolazion umane, che al à influît in maniere direte, in particolâr de fin dal secul passât, su lis cundizions ambientâls e climatichis. I principâi fatôrs antropics che a puedin vê influence negative su la biosfere a son il disboscament, la urbanizazion, la agriculture, l'incuinament e la incressite de CO2 atmosferiche par vie dal ûs fis di combustibii fossii.