Orden de Cistels

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Orden de Cistels Ordo Cisterciensis
Escudo heraldico cisterciense
Información cheneral
Nombre latín	Ordo Cisterciensis
Nombre común	Cister
Siglas	O.Cist.
Fundador	Sant Roberto de Molesmes
Fundación	1098
Orichen	Abadía de Cistels
Habito	Blanco
Organización
Superior	Abad Cheneral Mauro Giuseppe Lepori
Relichiosos	1470
Mosens	717
Curia	Piazza del Tempio di Diana, 14, 00153 Roma, Italia
Personas destacatas	Sant Roberto de Molesmes, Benedet XII, Gregorio X, Uchenio III, Sant Remón de Fitero
Web	www.ocist.org

La Orden de Cistels, Orden d'o Císter u abreviando Cister, ye una orden relichiosa que fundó Roberto de Molesmes en 1098. Prene lo nombre suyo de la abadía francesa de Cistels (en francés moderno Cîteaux), a on que s'orichinó, que yera l'antiga Cistercium romana, cerca de Dijon).

Lis deciban en la Edat Meya "monches blancos" por la color d'o suyo habito, diferenciando-los de los "monches negros", que yeran los benedictinos.

Historia

Estando Roberto abat de lo monesterio cluniacense de Molesmes, él y una colla de monches de la suya comunidat se proposoron tornar a la observancia estreita de la primitiva regla de Sant Benedet, qui en 540 fundó la Orden de Sant Benedet. Pa ixo devantó una nueva badía en Cistels, a on que los monches blancos dedicoron as suyas vidas a lo treballo manual y a la contemplación ascetica con igual d'encerrinaus, posando en practica lo lema benedictino Ora et labora.

Lo suyo succesor, Sant Alberico, obtenió en 1100 lo reconoiximiento de la nueva orden por parte de lo papa Pascual II que atorgó a lo monesterio lo “privilechio romano”, lo que equivaleba a posar-lo de chos la protección de la Santa Seu; pero estió lo tercer abat, sant Esteban Harding, qui en 1119 dio a lo Císter una regla propia, la Carta de Caridat, en la que se establiban las normas comunitarias de total pobreza, d'obediencia a los bispes, de dedicación al culto divín con deixación de las ciencias profanas, y atros estatutos de la orden. En 1113 ingresa como novicio Bernal de Fontaine en unión d'una colla de familiars y amigos aplegaus en Châtillon. Cuan dos anyos dimpués l'abat Esteban decide ixamplar l'ambito monastico con nuevas fundacions, devantando los cenobios de La Ferté, Pontigny, Morimond y Claraval (Campanya), ninvió ta este zaguer a Bernal y la suya chent, en parte por las dotes que se veyeban en lo nuevo monche pa la dirección d'una badía como la que li acomandaban, y en gran parte tamién pa librar a Cistels de la presencia de lo “clan” de los Fontaine, que heban preso una importancia que podeba haber floriu a beluns de los que i yeran enantes.

Sant Bernal de Claraval pegó un buen empentón a lo creiximiento de la orden de Cistels, que en 1153 (38 anyos dimpués de la suya fundación només), teneba 343 monesterios. Destacaba lo treballo de los monches de Claraval que n'heban creyaus 68. Estos monesterios gosaban asentar-los en las landas que trobaban, pero heban de tener augua abundant, (por eixemplo en Escatrón teneban l'Ebro y en lo Monesterio de Piedra lo río Piedra). Los mesmos monches y chirmans combersos ixarticaban y cautivaban la tierra. Si en lo sieglo XI los monches de Cluñego heban preso un gran protagonismo dentro de la ilesia y ocuporon los cargos y dignidaz mes alteros, tenendo influencia en lo poder civil, en lo sieglo XII ixe papel lo prenioron los cistercienses, que i tenió los suyos millors tiempos.

La Orden de Cistels en la Corona d'Aragón

En la Corona d'Aragón, las relacions entre la monarquía y la Orden de Cistels se remontan dica lo sieglo XII, cuan Remón Berenguer IV de Barcelona, ye nombrau prencipe d'Aragón y recurre a los monches cistercienses pa que colonicen las tierras de Poblet. La familia Montcada en Santes Creus, y Berenguera de Cervera en Vallbona de les Monges, siguirán los suyos pasos. Con Pero lo Cerimonioso un d'estos monesterios, lo de Poblet se convertió en panteón reyal de los reis d'Aragón.