Daryae Ganga, Urdu Nazam By Mohammad Shafi Uddin Nayyar

گنگا دریا کی لہروں کی رعنائی کا کیا کہنا

کیسا پیارا پیارا ہے اس کا بل کھا کھا کر بہنا

کوہ ہمالہ کی اونچی جھیلوں سے نکل کر آتا ہے

وادیوں اور نشیبوں میں تیزی سے چل کر آتا ہے

تڑتا مڑتا گرتا پڑتا آگے بڑھتا رہتا ہے

پگ پگ پر اس کا پل پل میں پانی چڑھتا رہتا ہے

جھرنا بن بن کر گرنے میں منظر خوب دکھاتا ہے

پگھلی ہوئی چاندنی کی چادر پتھر پر پھیلاتا ہے

میدانوں میں آ کر دھیمی دھیمی چال سے چلتا ہے

لہراتا ہے اٹھلاتا ہے بل کھاتا ہے مچلتا ہے

اس کی پیاری پیاری لہریں دیکھ کے دل لہراتا ہے

وہ بھی پانی کے دھارے کے ساتھ ہی بہتا جاتا ہے

اس کی پیاری شوبھا دیکھ کے سب نر ناری جیتے ہیں

آنکھوں ہی آنکھوں میں اس بہتے امرت کو پیتے ہیں

چھوٹے چھوٹے اور بھی دریا اس میں ملتے جاتے ہیں

جیسے بچے ہمک ہمک کر ماں کی گود میں آتے ہیں

یہ بھی اپنی گودی میں ان سب کو پیار سے لیتا ہے

چھوڑ کے وہ اس کو نہیں جاتے کچھ ایسا سکھ دیتا ہے

اس دریا سے نکلی ہیں ایسی پیاری پیاری نہریں

دل کو لبھانے والی ہیں جن کی بانکی بانکی لہریں

کرتی ہیں سیراب یہ نہریں بھارت کے میدانوں کو

طاقت یہ دے دیتی ہیں لاکھوں کمزور کسانوں کو

لاکھوں ہی بیگھے کھیتی ہوتی ہے ان سے ہری بھری

جنگل صحرا کھیت چمن بنتے ہیں ان سے سبز پری

ان نہروں کی حرکت سے زرخیز زمیں ہو جاتی ہے

ان نہروں کی برکت سے زر ریز زمیں ہو جاتی ہے

نہریں یہ لاکھوں ہی انسانوں کے دل کا سہارا ہیں

نہریں یہ سب ان کی آشاؤں کا بہتا دھارا ہیں

بہتے رہنا اس کا نت یہ بات بتاتا رہتا ہے

جو پیہم کچھ کرتا ہے پھل اس کا پاتا رہتا ہے

بھارت کی خدمت سے اس نے اتنی عظمت پائی ہے

خدمت کر کے خدمت کی خوب اس نے راہ دکھائی ہے

ہم بھی اپنی کوشش سے سرسبز بنائیں بھارت کو

پابندی کی ذلت سے آزاد کرائیں بھارت کو

گنگا دریا کیا ہے نیرؔ یہ اللہ کی رحمت ہے

گنگا دریا کیا ہے ہمارے دیس کے حق میں نعمت ہے