Zainsk

Zainsk
Заинск (ven.)
Зәй / Zәy (tot.)
	Lidnanznam;
Valdkund	Venäma
Eläjiden lugu (2021)	39,739 ristitud
Pind	25 km²
Pämez'	Razif Karimov; (reduku 2015—)
Telefonkod	+7−85 558-xx-xxx
Avtokod	16, 116, 716
Aigvö	UTC+3 (MSK+0)

Zainsk (tot.: Зәй / Zәy, ven.: Заи́нск) om Venäman lidn da lidnankund Tatarstanan Tazovaldkundan keskuzpalan päivnouzmas. Se om Zainskan rajonan administrativine keskuz (vspäi 1935), mülüb Alakaman lidnaglomeracijha (1,1 mln rist.).

Istorii

Eländpunktan aluz om pandud vl 1656 kuti Zai-lidnuz. Vn 1978 5. päiväl sulakud ühtištadihe sidä Uz' Zai-radnikžilonke (zavottihe vl 1956 sauvomha GRES:ad) da anttihe lidnan statusad nügüdläiženke nimenke.

Zainskan ižandusen päsarakod oma elektroenergetik (Zainskan GRES) da sömtegimišt (sahar, maidproduktad, kreker), mugažo KAMAZ:an avtokezroiden tegim i savičun tegim oma saudud.

Geografijan andmused

Lidn sijadase Zai-jogen randal (ven.: Зай, tot.: Зәй / Zәy 219 km pitte, Kaman hura ližajogi), Step'zai- da Meczai-jogiden ühthejoksmusenno, 90 m ü.m.t. keskmäižel korktusel.

Matkad Kazanihesai om 246 km lodeheze orhal vai 287 km avtotedme. Lähembaine lidn om Nižnekamsk 35 km pohjoižhe orhal. Ühtennimine Zainsk-raudtestancii sijadase «Jarčalli — Al'met'jevsk»-keskustal.

Tobmuz

Pen' Karmalk-žilo (ven.: Кармалка, 256 rist. vl 2017) mülüi lidnankundha Zainskan ližaks. Vn 2023 29. elokud ühtištadihe žilod lidnanke.

Lidnankundan tobmuden pämez' om sen Nevondkundan ezimez'. Marsel' Huzin radoi edeližen ezimehen vn 2015 redukuhusai. Lidnan Radonoigendajan komitetan ohjandai om Natal'ja Pavlova vn 2023 kül'mkuspäi. Edeližed ohjandajad oma Petr Timas'kov (vn 2023 viluku-kül'mku), Aleksandr Čapkov (vn 2022 keväz'ku-reduku).

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 41 803 ristitud, rajonan koume nelländest, vn 2021 — 39 739 ristitud. Kaik 40 635 eläjad oli lidnas vl 2017. Kaikiš suremb lidnan ristitišt oli 42 900 eläjad vl 2001.

Rahvahad: totarlaižed — 51,4 %, venälaižed — 45,3 %, čuvašalaižed — 1,1 %, toižed rahvahad — 2,2 %.

Islaman kaks' mečetid oma avaitud: «Biläl'» i «Tiničlik». Ortodoksižen hristanuskondan nell' pühäpertid^[1] oma kaičenus i saudud lidnas: kaks' jumalanpertid i kaks' časounäd.

Lapsiden opendusen aluzkundad oma severz'-se päivkodid, aluzškol (nomer 5), kuz' keskškolad (nomer 1..4, 6, 7), tataran gimnazii R.Š. Fardievan nimed, škol lapsiden täht tervhuden röunatud voimusidenke (nomer 9), čomamahtoiden škol, «Zai»-sportškol. Zainskan politehnine kolledž^[2] om lidnan professionaližen opendusen aluzkundaks.

Galerei

Zainskan kodirandantedištandmuzei (2019, ende Beketov-torgovanan pert')
Ristan Zdviženjan jumalanpert' (letihe vl 1826), vn 2019 nägu
Zainskan GRES vl 2009
Istorine makundan škol (2019)

Homaičendad

↑ Zainskan pühäpertid sobory.ru-saital. (ven.)
↑ Zainskan politehnine kolledž edu.tatar.ru-saital. (ven.)

Irdkosketused

Lidnan da Zainskan rajonan oficialine sait (zainsk.tatarstan.ru) Tatarstanan Tazovaldkundan tobmuden municipaližiden aluzkundoiden portalal. (ven.) (tot.)

Zainsk Vikiaitas

	Tatarstanan Tazovaldkundan lidnad
	Agriz \| Al'met'jevsk \| Arsk \| Aznakajevo \| Bavli \| Bolgar \| Bugul'm \| Buinsk \| Čistopol' \| Innopolis \| Jarčalli \| Jelabug \| Kazan' \| Kukmor \| Laiševo \| Leninogorsk \| Mamadiš \| Mendelejevsk \| Menzelinsk \| Nižnekamsk \| Nurlat \| Zainsk \| Zelenodol'sk \| Tetüši

[1] Zainskan pühäpertid sobory.ru-saital. (ven.)

[2] Zainskan politehnine kolledž edu.tatar.ru-saital. (ven.)

[1]

[2]