Nižnekamsk

Nižnekamsk
Нижнекамск (ven.)
Түбəн Кама / Tübän Kama (tot.)
Lidnanznam;	Flag;
Valdkund	Venäma
Eläjiden lugu (2021)	241,479 ristitud
Pind	116 km²
Pämez'	Ramil' Mullin; (reduku 2021—)
Telefonkod	+7−8555-xxx-xxx
Avtokod	16, 116, 716
Aigvö	UTC+3 (MSK+0)

Tramvaimaršrutad lidnan irdoiden shemal (2011)

Nižnekamsk (tot.: Түбəн Кама / Tübän Kama, ven.: Нижнека́мск) om Venäman lidn da lidnankund Tatarstanan Tazovaldkundan pohjoižpäivnouzmas. Se om tazovaldkundan koumanz' surtte lidn, mülüb Alakaman lidnaglomeracijha (1,1 mln rist.), om konurbacijas Jarčallinke, Nižnekamskan rajonan administrativine keskuz vspäi 1965, mülüb sihe vodespäi 2011.

Istorii

Eländpunktan aluz om pandud vl 1961 kuti Nižnekamskii-radnikžilo sauvomha kivivoin ümbriradmižkompleksad. Vl 1965 se sai lidnan statusad nügüdläiženke nimenke.

Nižnekamskan ižandusen päsarakod oma kivivoinümbriradmine, kivivoinhimine (PAÜ «Nižnekamskneftehim»^[1]), energetine (Nižnekamskan LEK-1 i LEK-2), mugažo sur' šintegim radab likkuimiden täht. Toižed sarakod oma sauvond, torguind, sömtegimišt (leibänkombinat, maidkombinat, likörvintegim).

Geografijan andmused

Lidn sijadase Kamanjogen hural randal läz Zai-jogensud, 120 m ü.m.t. keskmäižel korktusel.

Matkad Kazanihesai om 170 km päivlaskmha orhal vai 236 km avtotedme. Lähembaine lidn om Jelabug 15 km pohjoižpäivnouzmha orhal vai Kaman ülezjogen.

Tobmuz

Kaik kaks' pen't küläd mülüdas lidnankundha Nižnekamskan ližaks, niiden ühthine ristitišt om 53 eläjad. Ei ole jagandad administrativižikš rajonikš, om 41 lidnanlaptad, 14 eländfartalad da nell' žilod.

Edeline lidnan da rajonan pämez' om Aidar Metšin (2008 — sügüz'ku 2021).

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 234 044 ristitud, lidnankundan — 234 163 ristitud, rajonan viž kudendest, vn 2021 — 241 479 ristitud. Kaikiš suremb lidnan ristitišt om nügüdläine.

Rahvahad (enamba 0,7 % vn 2002 rahvahanlugemižen mödhe, ozutadud rahvahudenke): totarlaižed — 49,6 %, venälaižed — 42,7 %, čuvašalaižed — 2,7 %, baškiralaižed — 0,8 %, ukrainalaižed — 0,7 %, toižed rahvahad — 3,5 %.

Islaman koumetoštkümne pühäpertid om avaitud lidnas. Ortodoksižen hristanuskondan kaks'toštkümne^[2] da toižen hristanuskondan kaks' pühäpertid oma saudud lidnas.

Kaik nell' üläopendusen sijališt aluzkundad (institutad) da kümne professionaližen keskopendusen sijališt aluzkundad ratas lidnas.

Transport

Avtobusad, tramvaid da taksid oma kundaližeks transportaks lidnas. Ühtennimine raudtestancii om sarakon «Jarčalli — Al'met'jevsk»-keskustaspäi lopstancii. Järed jogiport sijadase kahtes kilometras lidnaspäi.

Rahvahidenkeskeine civiline Begiševo-lendimport (ven.: Бе́гишево, tot.: Бигеш Халыкара һава аланы, NBC / НЖК / UWKE, 777 tuh. passažiroid vl 2018) sijadase 19 km suvipäivnouzmha Nižnekamskan keskuzpalaspäi.

Galerei

Nižnekamskan pämečet', vn 2007 nägu (om saudud vll 1989−1996)
«Umet-Gul'sum»-mečet' (tot.: Өметгөлсем), vn 2008 nägu
Tegimištzon vl 2008, nägu Jelabugaspäi
Nižnekamskan himiž-tehnologine institut, päkorpus (2013)
Kul'turine «Džalil'»-bobuštuzkompleks (2019)
Kirjišt Gabdulla Tukain nimed (2021)
«Neftehim Arena»-jäpert'kulu (2010)
Nižnekamsk-päraudtestancijan sauvuz vl 2017

Homaičendad

↑ «Nižnekamskneftehim»-kompanijan sait (nknh.ru). (ven.) (angl.)
↑ Nižnekamskan pühäpertid sobory.ru-saital. (ven.)

Irdkosketused

Nižnekamsk-lidnan da sen rajonan oficialine sait (e-nkama.ru). (ven.) (tot.)

Nižnekamsk Vikiaitas

	Tatarstanan Tazovaldkundan lidnad
	Agriz \| Al'met'jevsk \| Arsk \| Aznakajevo \| Bavli \| Bolgar \| Bugul'm \| Buinsk \| Čistopol' \| Innopolis \| Jarčalli \| Jelabug \| Kazan' \| Kukmor \| Laiševo \| Leninogorsk \| Mamadiš \| Mendelejevsk \| Menzelinsk \| Nižnekamsk \| Nurlat \| Zainsk \| Zelenodol'sk \| Tetüši

[1] «Nižnekamskneftehim»-kompanijan sait (nknh.ru). (ven.) (angl.)

[2] Nižnekamskan pühäpertid sobory.ru-saital. (ven.)

[1]

[2]