ᱟᱥᱚᱠ
ᱟᱥᱚᱠ
ᱨᱟᱡᱽ ᱚᱠᱛᱚ :- ᱒᱖᱙ ᱵᱤᱥᱤ ᱠᱷᱚᱱ ᱒᱓᱒ ᱵᱤᱥᱤ ᱾
ᱨᱟᱡᱽ ᱢᱟᱹᱪᱤ ᱨᱮ ᱫᱩᱲᱩᱵ :- ᱒᱗᱐ ᱵᱤᱥᱤ ᱾
ᱡᱟᱱᱟᱢ :- ᱓᱐᱔ ᱵᱤᱥᱤ, ᱯᱟᱴᱤᱞᱤ ᱯᱩᱛᱨᱚ, ᱯᱟᱴᱱᱟ ᱾
ᱜᱩᱨ :- ᱒᱓᱒ ᱵᱤᱥᱤ, ᱯᱟᱴᱤᱞᱤ ᱯᱩᱛᱨᱚ, ᱯᱟᱴᱱᱟ ᱾
ᱟᱺᱜᱤᱵᱷᱟᱹᱨᱤᱭᱟᱹ :- ᱫᱚᱥᱚᱨᱚᱛᱷ ᱢᱚᱣᱨᱭᱟ ᱾
ᱮᱨᱟ :- ᱫᱮᱵᱤ ᱠᱟᱨᱩᱵᱟᱠᱤ ᱯᱚᱫᱽᱢᱟᱵᱚᱛᱤ ᱛᱤᱥᱭᱚᱨᱚᱠᱥᱤᱛᱟ ᱾
ᱵᱚᱝᱥᱚ :- ᱢᱚᱣᱨᱭᱚ ᱾
ᱵᱟᱵᱟ :- ᱵᱤᱱᱫᱩᱥᱟᱨ ᱾
ᱟᱭᱳ :- ᱥᱩᱵᱷᱚᱫᱨᱟᱝᱜᱤ (ᱨᱟᱱᱤ ᱫᱷᱚᱨᱢᱟ) ᱾
ᱩᱯᱨᱩᱢ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱪᱚᱠᱨᱚᱵᱚᱨᱛᱤ ᱟᱥᱚᱠ ᱥᱚᱢᱨᱟᱴ (᱓᱐᱔ ᱵᱤᱥᱤ ᱠᱷᱚᱱ ᱒᱓᱒ ᱵᱤᱥᱤ ᱫᱷᱟᱹᱵᱤᱡ) ᱡᱮᱜᱮᱛ ᱧᱩᱛᱩᱢᱟᱱ ᱟᱨ ᱵᱤᱨᱵᱷᱟᱱᱴᱟ ᱵᱷᱟᱨᱚᱛᱤᱭᱟᱹ ᱢᱚᱣᱨᱭᱚ ᱨᱟᱡᱽᱵᱚᱝᱥᱚ ᱨᱤᱱᱤᱡ ᱢᱟᱦᱟᱱ ᱥᱚᱢᱨᱟᱴ ᱮ ᱛᱟᱦᱮᱸ ᱠᱟᱱᱟ ᱾ ᱥᱚᱢᱨᱟᱴ ᱟᱥᱚᱠ ᱟᱜ ᱯᱩᱨᱟᱹ ᱧᱩᱛᱩᱢ ᱫᱚ ᱫᱮᱵᱟᱱᱟᱝᱯᱨᱤᱭᱚ ᱟᱥᱚᱠ ᱢᱚᱣᱨᱭᱚ ᱛᱟᱦᱮᱸ ᱠᱟᱱᱟ ᱾ ᱩᱱᱤᱭᱟᱜ ᱨᱟᱡᱽ ᱚᱠᱛᱚ ᱫᱚ ᱒᱖᱙ ᱵᱤᱥᱤ ᱠᱷᱚᱱ ᱒᱓᱒ ᱵᱤᱥᱤ ᱫᱷᱟᱹᱵᱤᱡ ᱵᱷᱟᱨᱚᱛ ᱨᱮ ᱛᱟᱦᱮᱸ ᱠᱟᱱᱟ ᱾ ᱢᱚᱣᱨᱭᱚ ᱨᱟᱡᱽ ᱵᱚᱝᱥᱚ ᱨᱤᱱᱤᱡ ᱪᱚᱠᱨᱚᱵᱚᱨᱛᱤ ᱟᱥᱚᱠ ᱥᱚᱢᱨᱟᱴ ᱫᱚ ᱯᱩᱨᱟᱹ ᱵᱷᱟᱨᱚᱛ ᱨᱮᱭ ᱨᱟᱡᱽ ᱠᱮᱜᱼᱟ ᱾ ᱟᱨ ᱟᱡᱟᱜ ᱢᱚᱣᱨᱭᱚ ᱥᱟᱢᱨᱟᱡᱽᱭᱚ ᱩᱛᱚᱨ ᱨᱮᱭᱟᱜ ᱦᱤᱱᱫᱩᱠᱩᱥ ᱠᱷᱚᱱ ᱫᱩᱠᱷᱤᱱ ᱨᱮ ᱜᱳᱫᱟᱵᱚᱨᱤ ᱜᱟᱰᱟ ᱨᱮᱭᱟᱜ ᱫᱩᱠᱷᱤᱱ ᱟᱨ ᱢᱚᱭᱥᱩᱨ ᱫᱷᱟᱹᱵᱤᱡ ᱟᱨ ᱯᱩᱨᱩᱵᱽ ᱨᱮ ᱵᱟᱸᱜᱽᱞᱟᱫᱮᱥ ᱠᱷᱚᱱ ᱯᱩᱪᱷᱤᱢ ᱨᱮ ᱟᱯᱷᱜᱟᱱᱤᱥᱛᱟᱱ, ᱤᱨᱟᱱ ᱫᱷᱟᱹᱵᱤᱡ ᱥᱮᱴᱮᱨ ᱞᱮᱱᱟ ᱾ ᱥᱚᱢᱨᱟᱴ ᱟᱥᱚᱠ ᱟᱜ ᱥᱟᱢᱨᱟᱡᱽᱭᱚ ᱛᱮᱦᱮᱧᱟᱜ ᱯᱩᱨᱟᱹ ᱵᱷᱟᱨᱚᱛ, ᱯᱟᱠᱤᱥᱛᱟᱱ, ᱟᱯᱷᱜᱟᱱᱤᱥᱛᱟᱱ, ᱱᱮᱯᱟᱞ, ᱵᱟᱸᱜᱽᱞᱟᱫᱮᱥ, ᱵᱷᱩᱴᱟᱱ, ᱢᱭᱟᱱᱢᱟᱨ ᱨᱮᱭᱟᱜ ᱵᱟᱹᱲᱛᱤ ᱠᱷᱚᱱ ᱵᱟᱹᱲᱛᱤ ᱴᱚᱴᱷᱟᱨᱮ ᱛᱟᱦᱮᱸ ᱠᱟᱱᱟ ᱾ ᱱᱚᱣᱟ ᱦᱟᱯᱲᱟᱜ ᱥᱟᱢᱨᱟᱡᱽᱭᱚ ᱩᱱ ᱚᱠᱛᱚ ᱫᱷᱟᱹᱵᱤᱡ ᱠᱷᱚᱱ ᱛᱮᱦᱮᱧ ᱫᱷᱟᱹᱵᱤᱡᱟᱜ ᱡᱚᱛᱚ ᱠᱷᱚᱱ ᱢᱟᱨᱟᱝ ᱵᱷᱟᱨᱚᱛᱤᱭᱟᱹ ᱥᱟᱢᱨᱟᱡᱽᱭᱚ ᱛᱟᱦᱮᱸ ᱟᱠᱟᱱᱟ ᱾ ᱪᱚᱠᱨᱚᱵᱚᱨᱛᱤ ᱥᱚᱢᱨᱟᱴ ᱟᱥᱚᱠ ᱡᱮᱜᱮᱛ ᱨᱤᱱ ᱡᱚᱛᱚ ᱢᱟᱦᱟᱱ ᱟᱨ ᱵᱤᱨᱵᱷᱟᱱᱴᱟ ᱥᱚᱢᱨᱟᱴ ᱟᱨ ᱨᱟᱡᱟ ᱠᱚᱣᱟᱜ ᱥᱟᱦᱴᱟᱨᱮ ᱞᱮᱛᱟᱲ ᱜᱮ ᱡᱚᱛᱚ ᱠᱷᱚᱱ ᱞᱟᱯᱷᱟᱝ ᱴᱷᱟᱶ ᱨᱮᱭ ᱛᱟᱦᱮᱸ ᱟᱠᱟᱱᱟ ᱾ ᱥᱚᱢᱨᱟᱴ ᱟᱥᱚᱠ ᱜᱮ ᱵᱷᱟᱨᱚᱛ ᱨᱤᱱᱤᱡ ᱡᱚᱛᱚ ᱠᱷᱚᱱ ᱫᱟᱲᱮᱯᱮᱨᱮᱡ ᱟᱨ ᱢᱟᱦᱟᱱ ᱥᱚᱢᱨᱟᱴ ᱮ ᱛᱟᱦᱮᱸ ᱠᱟᱱᱟ ᱾ ᱥᱚᱢᱨᱟᱴ ᱟᱥᱚᱠ ᱫᱚ "ᱪᱚᱠᱨᱚᱵᱚᱨᱛᱤ ᱥᱚᱢᱨᱟᱴ ᱟᱥᱚᱠ" ᱢᱮᱱᱛᱮ ᱠᱚ ᱢᱮᱛᱟᱭᱟ, ᱱᱚᱣᱟ ᱨᱮᱭᱟᱜ ᱢᱮᱱᱮᱛ ᱫᱚ ᱼ "ᱥᱚᱢᱨᱟᱴ ᱠᱭᱤᱡ ᱥᱚᱢᱨᱟᱴ " ᱾ ᱟᱨ ᱱᱚᱣᱟ ᱴᱷᱟᱶ ᱫᱚ ᱵᱷᱟᱨᱚᱛ ᱨᱮ ᱠᱷᱟᱹᱞᱤ ᱥᱚᱢᱨᱟᱴ ᱟᱥᱚᱠ ᱜᱮᱭ ᱟᱢᱮᱴ ᱟᱠᱟᱜᱼᱟ ᱾ ᱥᱚᱢᱨᱟᱴ ᱟᱥᱚᱠ ᱫᱚ ᱟᱡᱟᱜ ᱟᱴᱮᱫ ᱟᱠᱟᱱ ᱥᱟᱢᱨᱟᱡᱽᱭᱚ ᱨᱤᱱᱤᱡ ᱡᱚᱛᱚ ᱠᱷᱚᱱ ᱵᱮᱥ ᱥᱟᱥᱚᱱᱤᱭᱟᱹ ᱥᱟᱶᱼᱥᱟᱶᱛᱮ ᱵᱩᱫᱫᱷᱚ ᱫᱷᱚᱨᱚᱢ ᱪᱷᱟᱨᱟᱣ ᱮᱫᱤᱡ ᱞᱮᱠᱟᱛᱮ ᱦᱚᱸ ᱧᱩᱛᱩᱢ ᱛᱟᱭ ᱢᱮᱱᱟᱜᱼᱟ ᱾ ᱥᱚᱢᱨᱟᱴ ᱟᱥᱚᱠ ᱫᱚ ᱯᱩᱨᱟᱹ ᱮᱥᱤᱭᱟ ᱨᱮ ᱥᱟᱶᱛᱮ ᱛᱮᱦᱮᱧᱟᱜ ᱮᱴᱟᱜ ᱡᱚᱛᱚ ᱢᱟᱦᱟ ᱰᱷᱤᱯᱨᱮ ᱨᱮᱦᱚᱸ ᱵᱚᱣᱫᱫᱷᱚ ᱫᱷᱚᱨᱚᱢ ᱮ ᱯᱟᱥᱱᱟᱣ ᱟᱠᱟᱜᱼᱟ ᱾ ᱥᱚᱢᱨᱟᱴ ᱟᱥᱚᱠ ᱤᱫᱤᱠᱟᱛᱮ ᱠᱷᱩᱱᱴᱤ ᱟᱨ ᱫᱷᱤᱨᱤ ᱚᱞ ᱠᱚᱨᱮ ᱛᱮᱦᱮᱧ ᱦᱚᱸ ᱵᱷᱟᱨᱚᱛ ᱨᱮᱭᱟᱜ ᱟᱹᱰᱤ ᱴᱚᱴᱷᱟᱨᱮ ᱧᱮᱞᱚᱜᱼᱟ ᱾ ᱚᱱᱟᱛᱮ ᱥᱚᱢᱨᱟᱴ ᱟᱥᱚᱠ ᱟᱜ ᱱᱟᱜᱟᱢᱮᱛ ᱵᱟᱱᱟᱰᱟᱭ ᱟᱨ ᱮᱴᱟᱜ ᱡᱟᱦᱟᱸᱭ ᱥᱚᱢᱨᱟᱴ ᱟᱨ ᱨᱟᱡᱟ ᱠᱷᱚᱱ ᱟᱹᱰᱤ ᱵᱟᱹᱱᱛᱤ ᱞᱮᱠᱟᱛᱮ ᱧᱟᱢ ᱜᱚᱫᱚᱜᱼᱟ ᱾ ᱥᱚᱢᱨᱟᱴ ᱟᱥᱚᱠ ᱫᱩᱞᱟᱹᱲ, ᱥᱟᱦᱟᱣᱤᱭᱟᱹ, ᱥᱟᱹᱨᱤᱭᱟᱹᱛ, ᱵᱟᱝᱦᱤᱸᱥᱟᱹ ᱟᱨ ᱟᱲᱟᱜ ᱥᱟᱠᱟᱢ ᱡᱚᱢ ᱡᱤᱭᱚᱱ ᱛᱚᱦᱚᱨ ᱨᱮ ᱥᱟᱹᱨᱤ ᱛᱮ ᱟᱯᱱᱟᱨᱤᱭᱟᱹᱭ ᱛᱟᱦᱮᱸ ᱠᱟᱱᱟ ᱾ ᱚᱱᱟᱛᱮ ᱩᱱᱤᱭᱟᱜ ᱧᱩᱛᱩᱢ ᱫᱚ ᱱᱟᱜᱟᱢ ᱨᱮ ᱢᱟᱦᱟᱱ ᱩᱯᱠᱟᱹᱨᱤᱭᱟᱹ ᱥᱚᱢᱨᱟᱴ ᱨᱩᱯᱨᱮ ᱴᱷᱟᱶ ᱮ ᱟᱢᱮᱴ ᱦᱩᱭ ᱟᱠᱟᱜᱼᱟ ᱾
ᱮᱛᱚᱦᱚᱵ ᱡᱤᱭᱚᱱ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱪᱚᱠᱨᱚᱵᱚᱨᱛᱤ ᱟᱥᱚᱠ ᱥᱚᱢᱨᱟᱴ ᱵᱤᱱᱫᱩᱥᱟᱨ ᱟᱨ ᱨᱟᱹᱱᱤ ᱫᱷᱚᱨᱢᱟᱭᱤᱡ ᱦᱚᱯᱚᱱ ᱮ ᱛᱟᱦᱮᱸ ᱠᱟᱱᱟ ᱾ ᱞᱚᱝᱠᱟ ᱨᱮᱭᱟᱜ ᱨᱤᱛ ᱨᱮᱫᱚ ᱵᱤᱱᱫᱩᱥᱟᱨ ᱨᱤᱱ ᱜᱮᱟᱨ ᱜᱚᱴᱟᱝ ᱨᱟᱹᱱᱤ ᱟᱨ ᱑᱐᱑ ᱦᱚᱯᱚᱱ ᱢᱮᱱᱛᱮ ᱥᱚᱫᱚᱨ ᱢᱮᱱᱟᱜᱼᱟ ᱾ ᱦᱚᱯᱚᱱ ᱨᱮᱫᱚ ᱠᱷᱟᱹᱞᱤ ᱯᱮ ᱦᱚᱲᱟᱜ ᱧᱩᱛᱩᱢ ᱜᱮ ᱥᱚᱫᱚᱨ ᱟᱠᱟᱱᱟ ᱾ ᱩᱱᱠᱩ ᱫᱚ ᱥᱩᱥᱤᱢ, ᱡᱟᱦᱟᱸᱭ ᱡᱚᱛᱚ ᱠᱷᱚᱱ ᱢᱟᱨᱟᱝ ᱦᱚᱯᱚᱱ ᱮ ᱛᱟᱦᱮᱸ ᱠᱟᱱᱟ, ᱟᱥᱚᱠ ᱟᱨ ᱛᱤᱥᱭᱚ ᱾ ᱛᱤᱥᱭᱚ ᱟᱥᱚᱠ ᱤᱡ ᱥᱚᱦᱳᱫᱚᱨ ᱵᱚᱭᱦᱟ ᱟᱨ ᱡᱚᱛᱚ ᱠᱷᱚᱱ ᱦᱩᱰᱤᱧᱤᱡ ᱮ ᱛᱟᱦᱮᱸ ᱠᱟᱱᱟ ᱾ ᱢᱤᱫ ᱫᱤᱱ ᱫᱷᱚᱨᱢᱟ ᱠᱩᱠᱢᱩᱭ ᱧᱮᱞ ᱠᱮᱜᱼᱟ ᱫᱚ, ᱟᱡᱤᱡ ᱦᱚᱯᱚᱱ ᱢᱤᱫ ᱟᱹᱰᱤ ᱢᱟᱨᱟᱝ ᱥᱚᱢᱨᱟᱴ ᱮ ᱵᱮᱱᱟᱣᱜᱼᱟ ᱾ ᱤᱱᱟᱹ ᱛᱟᱭᱚᱢ ᱩᱱᱤ ᱨᱟᱡᱟ ᱵᱤᱱᱫᱩᱥᱟᱨ ᱫᱚ ᱟᱡᱤᱡ ᱨᱟᱹᱱᱤᱭ ᱵᱮᱱᱟᱣ ᱠᱮᱫᱮᱭᱟ ᱾ ᱤᱱᱠᱟᱹ ᱛᱮᱦᱚᱸ ᱫᱷᱚᱨᱢᱟ ᱠᱷᱮᱛᱨᱤᱭᱚ ᱵᱚᱝᱥᱚ ᱨᱤᱱᱤᱡ ᱵᱟᱭ ᱛᱟᱦᱮᱸ ᱠᱟᱱᱟ, ᱚᱱᱟᱛᱮ ᱱᱟᱯᱟᱭ ᱴᱷᱟᱶ ᱫᱚ ᱨᱟᱡᱽ ᱵᱚᱝᱥᱚ ᱨᱮ ᱵᱟᱭ ᱧᱟᱢ ᱟᱠᱟᱫ ᱛᱟᱦᱮᱸᱫ ᱾ ᱟᱥᱚᱠ ᱨᱤᱱ ᱟᱹᱰᱤᱜᱟᱱ (ᱪᱷᱩᱴᱠᱤ ᱟᱭᱳ) ᱵᱚᱭᱦᱟ ᱵᱩᱦᱤᱱ ᱠᱚ ᱛᱟᱦᱮᱸ ᱠᱟᱱᱟ ᱾ ᱜᱤᱫᱽᱨᱟᱹ ᱨᱮ ᱩᱱᱠᱩ ᱥᱟᱶ ᱟᱹᱰᱤᱡᱩᱨ ᱮ ᱠᱷᱮᱞᱚᱸᱰ ᱦᱮᱯᱨᱟᱣ ᱛᱟᱦᱮᱸ ᱠᱟᱱᱟ ᱾ ᱟᱥᱚᱠ ᱚᱠᱛᱚ ᱨᱮ ᱵᱮᱱᱟᱣ ᱮᱱ ᱢᱤᱫ ᱩᱯᱨᱩᱢ ᱪᱤᱱᱦᱟᱹ, ᱡᱟᱦᱟᱸ ᱫᱚ ᱟᱵᱚ "ᱟᱥᱚᱠ ᱪᱤᱱᱦᱟᱹ" ᱧᱩᱛᱩᱢ ᱛᱮᱦᱚᱸ ᱵᱚ ᱵᱟᱰᱟᱭᱟ, ᱚᱱᱟ ᱛᱮᱦᱮᱧ ᱵᱷᱟᱨᱚᱛ ᱨᱮᱭᱟᱜ ᱡᱟᱹᱛᱤᱭᱟᱹᱨᱤ ᱪᱤᱱᱦᱟᱹ ᱠᱟᱱᱟ ᱾ ᱵᱚᱣᱫᱷᱷᱚ ᱫᱷᱚᱨᱚᱢ ᱨᱮᱭᱟᱜ ᱱᱟᱜᱟᱢ ᱨᱮ ᱜᱚᱣᱛᱚᱢ ᱵᱩᱫᱫᱷᱚ ᱛᱟᱭᱚᱢ ᱫᱚ ᱟᱥᱚᱠ ᱟᱜ ᱴᱷᱟᱶ ᱜᱮ ᱦᱮᱡ ᱟᱠᱟᱱᱟ ᱾
ᱠᱚᱞᱤᱝᱜᱚ ᱞᱟᱹᱰᱷᱟᱹᱭ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱪᱚᱠᱨᱚᱵᱚᱨᱛᱤ ᱟᱥᱚᱠ ᱥᱚᱢᱨᱟᱴ ᱫᱚ ᱟᱡᱟᱜ ᱨᱟᱡᱽᱡᱚᱵᱷᱤᱥᱮᱠ ᱨᱮᱭᱟᱜ ᱘ ᱟᱱᱟᱜ ᱥᱮᱨᱢᱟ ᱨᱮ (᱒᱖᱑ ᱵᱤᱥᱤ) ᱠᱚᱞᱤᱝᱜᱚ ᱨᱮᱭ ᱟᱠᱨᱚᱢᱚᱬ ᱞᱮᱜᱼᱟ ᱾ ᱵᱷᱤᱛᱨᱤ ᱵᱟᱝ ᱥᱟᱹᱱᱛᱤ ᱥᱩᱸᱵᱽᱨᱟᱹᱣ ᱠᱮᱫ ᱛᱟᱭᱚᱢ ᱒᱖᱙ ᱵᱤᱥᱤ ᱨᱮ ᱩᱱᱤᱭᱟᱜ ᱨᱤᱛ ᱞᱮᱠᱟᱛᱮ ᱨᱟᱡᱽ ᱴᱤᱠᱞᱤ ᱦᱩᱭ ᱮᱱᱟ ᱾ ᱜᱮᱞᱯᱮ ᱫᱷᱤᱨᱤ ᱚᱞ ᱞᱮᱠᱟᱛᱮ ᱠᱚᱞᱤᱝᱜᱚ ᱞᱟᱹᱰᱷᱟᱹᱭ ᱨᱮ ᱑ ᱞᱟᱠᱷ ᱢᱚᱜᱮ ᱜᱮᱥᱟᱭ ᱦᱚᱲ ᱦᱟᱹᱲᱤ ᱠᱟᱛᱮ ᱠᱚ ᱚᱰᱚᱠ ᱜᱤᱰᱤ ᱠᱟᱫ ᱠᱚᱣᱟ ᱾ ᱑ ᱜᱮᱥᱟᱥᱟᱭ ᱦᱚᱲ ᱠᱚ ᱜᱚᱡ ᱠᱮᱫ ᱠᱚᱣᱟ ᱾ ᱟᱥᱚᱠ ᱥᱚᱢᱨᱟᱴ ᱱᱩᱱᱟᱹᱜ ᱦᱚᱲᱟᱜ ᱥᱮᱸᱫᱽᱨᱟ ᱜᱚᱡ ᱟᱡᱟᱜ ᱢᱮᱫ ᱛᱮᱭ ᱧᱮᱞ ᱠᱮᱜᱼᱟ ᱾ ᱱᱚᱣᱟ ᱛᱮ ᱛᱚᱨᱲᱟᱣ ᱠᱟᱛᱮ ᱥᱚᱢᱨᱟᱴ ᱟᱥᱚᱠ ᱫᱚ ᱥᱟᱹᱱᱛᱤ, ᱥᱟᱶᱛᱟᱨᱤ ᱞᱟᱦᱟᱱᱛᱤ ᱟᱨ ᱫᱷᱚᱨᱚᱢ ᱮ ᱪᱷᱟᱨᱟᱣ ᱠᱮᱜᱼᱟ ᱾
ᱠᱚᱞᱤᱝᱜᱚ ᱦᱩᱞ ᱜᱮ ᱥᱚᱢᱨᱟᱴ ᱟᱥᱚᱠ ᱟᱜ ᱨᱤᱫᱟᱹᱭ ᱨᱮ ᱟᱹᱰᱤ ᱢᱟᱨᱟᱝ ᱟᱹᱨᱩᱯᱷᱮᱨᱟᱣ ᱠᱮᱜᱼᱟ ᱾ ᱩᱱᱤᱭᱟᱜ ᱨᱤᱫᱟᱹᱭ ᱢᱟᱹᱱᱢᱤ ᱠᱚ ᱞᱟᱹᱜᱤᱫ ᱫᱟᱭᱟ ᱟᱨ ᱫᱩᱞᱟᱹᱲ ᱛᱮ ᱱᱮᱢᱚᱥ ᱜᱚᱫ ᱮᱱᱟ ᱾ ᱩᱱᱤ ᱫᱚ ᱦᱩᱞᱥᱟᱹᱭ ᱫᱚ ᱡᱚᱛᱚ ᱫᱤᱱ ᱞᱟᱹᱜᱤᱫ ᱛᱷᱩᱠᱟᱹᱢ ᱞᱟᱹᱜᱤᱫ ᱠᱤᱨᱤᱭᱟᱹᱭ ᱦᱟᱛᱟᱣ ᱠᱮᱜᱼᱟ ᱾ ᱱᱚᱰᱮ ᱠᱷᱚᱱ ᱵᱚᱸᱜᱟ ᱵᱳᱨᱳ ᱟᱨ ᱫᱷᱟᱢ ᱡᱤᱛᱠᱟᱹᱨ ᱨᱮᱭᱟᱜ ᱡᱩᱜᱽ ᱮᱛᱚᱦᱚᱵ ᱮᱱᱟ ᱾ ᱩᱱᱤ ᱢᱟᱦᱟᱱ ᱵᱚᱣᱫᱷ ᱫᱷᱚᱨᱚᱢ ᱫᱚ ᱟᱡᱟᱜ ᱫᱷᱚᱨᱚᱢ ᱞᱮᱠᱟᱛᱮᱭ ᱟᱯᱱᱟᱨ ᱠᱮᱜᱼᱟ ᱾
ᱫᱷᱤᱨᱤ ᱚᱞ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱥᱚᱢᱨᱟᱴ ᱟᱥᱚᱠ ᱦᱚᱛᱮᱛᱮ ᱡᱚᱛᱚ ᱨᱮ ᱓᱓ ᱜᱚᱴᱟᱝ ᱚᱞᱼᱛᱚᱞ ᱧᱟᱢ ᱟᱠᱟᱱᱟ ᱡᱟᱦᱟᱸ ᱫᱚ ᱟᱥᱚᱠ ᱠᱷᱩᱱᱴᱤ, ᱪᱟᱴᱟᱱᱤ, ᱟᱨ ᱜᱚᱸᱜᱷᱚᱨ ᱨᱮᱭᱟᱜ ᱠᱟᱸᱛ ᱠᱚᱨᱮ ᱟᱡᱟᱜ ᱒᱖᱙ ᱵᱤᱥᱤᱹᱤ ᱠᱷᱚᱱ ᱒᱓᱑ ᱵᱤᱥᱤᱹᱤ ᱨᱮ ᱪᱟᱹᱞᱩ ᱞᱮᱱ ᱟᱡᱟᱜ ᱥᱟᱥᱚᱱ ᱚᱠᱛᱚ ᱨᱮᱭ ᱜᱚᱲᱦᱚᱱ ᱦᱚᱪᱚ ᱞᱮᱫ ᱠᱚᱣᱟ ᱾ ᱱᱚᱣᱟ ᱱᱮᱛᱟᱨ ᱦᱚᱸ ᱵᱟᱸᱜᱽᱞᱟᱫᱮᱥ, ᱵᱷᱟᱨᱚᱛ, ᱱᱮᱯᱟᱞ, ᱟᱯᱷᱜᱟᱱᱤᱥᱛᱟᱱ, ᱯᱟᱠᱤᱥᱛᱟᱱ ᱨᱮ ᱴᱷᱟᱺᱭ ᱴᱷᱟᱺᱭ ᱨᱮ ᱧᱟᱢᱚᱜᱼᱟ ᱟᱨ ᱚᱱᱟ ᱛᱟᱞᱟᱨᱮ ᱵᱚᱣᱫᱷ ᱫᱷᱚᱨᱚᱢ ᱨᱮᱭᱟᱜ ᱡᱚᱛᱚ ᱠᱷᱚᱱ ᱢᱟᱨᱮ ᱯᱚᱨᱢᱟᱱ ᱦᱚᱸ ᱢᱤᱫ ᱠᱟᱱᱟ ᱾
ᱱᱚᱣᱟ ᱫᱷᱤᱨᱤ ᱚᱞ ᱠᱚ ᱦᱚᱛᱮᱛᱮ ᱥᱚᱢᱨᱟᱴ ᱟᱥᱚᱠ ᱟᱜ ᱵᱚᱣᱫᱷ ᱫᱷᱚᱨᱚᱢ ᱯᱟᱥᱱᱟᱣ ᱨᱮᱭᱟᱜ ᱠᱩᱨᱩᱢᱩᱴᱩ ᱵᱷᱩᱢᱚᱫᱷᱭᱚ ᱥᱟᱜᱚᱨ ᱨᱮᱭᱟᱜ ᱴᱚᱴᱷᱟ ᱫᱷᱟᱹᱵᱤᱡ ᱡᱤᱭᱟᱹᱲ ᱛᱟᱦᱮᱸ ᱠᱟᱱᱟ ᱟᱨ ᱥᱚᱢᱨᱟᱴ ᱢᱤᱥᱨᱚ ᱟᱨ ᱭᱩᱱᱟᱱ ᱫᱷᱟᱹᱵᱤᱡᱟᱜ ᱨᱟᱡᱽᱼᱟᱹᱨᱤᱭᱟᱹ ᱦᱟᱞᱚᱛ ᱥᱟᱶ ᱟᱹᱰᱤ ᱵᱷᱟᱹᱜᱤ ᱞᱮᱠᱟ ᱩᱯᱨᱩᱢ ᱮ ᱛᱟᱦᱮᱸ ᱠᱟᱱᱟ ᱾ ᱱᱚᱣᱟ ᱨᱮ ᱵᱚᱣᱫᱷ ᱫᱷᱚᱨᱚᱢ ᱨᱮᱭᱟᱜ ᱵᱟᱧᱪᱟᱣ ᱨᱮ ᱡᱩᱨ ᱠᱚᱢ ᱟᱨ ᱢᱟᱹᱱᱢᱤ ᱠᱚ ᱱᱟᱯᱟᱭ ᱡᱤᱭᱚᱱ ᱡᱤᱣᱤᱫᱚᱜ ᱞᱟᱹᱜᱤᱫ ᱥᱮᱪᱮᱫ ᱵᱟᱹᱲᱛᱤ ᱧᱟᱢᱚᱜᱼᱟ ᱾
ᱜᱩᱨ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱟᱥᱚᱠ ᱫᱚ ᱢᱮᱱ ᱞᱮᱠᱷᱟᱱ ᱔᱐ ᱵᱚᱨᱥᱚ ᱞᱮᱠᱟᱭ ᱥᱟᱥᱚᱱ ᱠᱮᱜᱼᱟ ᱡᱟᱦᱟᱸ ᱛᱟᱭᱚᱢ ᱥᱩᱨᱥᱩᱯᱩᱨ ᱒᱓᱖ ᱵᱤᱥᱤ ᱨᱮ ᱟᱡ ᱮ ᱵᱚᱸᱜᱟ ᱫᱤᱥᱚᱢ ᱮᱱᱟ ᱾ ᱟᱡ ᱨᱤᱱ ᱟᱹᱰᱤ ᱜᱟᱱ ᱦᱚᱯᱚᱱ ᱟᱨ ᱮᱨᱟ ᱦᱚᱸᱠᱚ ᱛᱟᱦᱮᱸ ᱠᱟᱱᱟ, ᱤᱠᱷᱟᱹᱱ ᱩᱱᱠᱩ ᱤᱫᱤ ᱠᱟᱛᱮ ᱵᱟᱹᱲᱛᱤ ᱵᱟᱰᱟᱭ ᱫᱚ ᱵᱟᱹᱱᱩᱜᱼᱟ ᱾ ᱩᱱᱤᱭᱤᱡ ᱦᱚᱯᱚᱱ ᱢᱚᱦᱮᱸᱫᱨᱚ ᱟᱨ ᱦᱚᱯᱚᱱ ᱮᱨᱟ ᱥᱚᱝᱜᱷᱚᱢᱤᱛᱨᱟ ᱫᱚ ᱵᱚᱣᱫᱫᱷᱚ ᱫᱷᱚᱨᱚᱢ ᱯᱟᱥᱱᱟᱣ ᱨᱮ ᱥᱮᱞᱮᱫ ᱠᱤᱱ ᱛᱟᱦᱮᱸ ᱠᱟᱱᱟ ᱾
ᱟᱥᱚᱠ ᱟᱜ ᱜᱩᱨ ᱛᱟᱭᱚᱢ ᱢᱚᱣᱨᱭᱚ ᱨᱟᱡᱽ ᱵᱚᱝᱥᱚ ᱥᱩᱨᱥᱩᱯᱩᱨ ᱕᱐ ᱵᱚᱨᱥᱚ ᱜᱟᱱ ᱪᱟᱞᱟᱣ ᱮᱱᱟ ᱾
ᱥᱟᱹᱠᱷᱭᱟᱹᱛ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱵᱟᱦᱨᱮ ᱡᱚᱱᱚᱲ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]https://www.wisdomlib.org/buddhism/book/in-asokas-footsteps,
https://curlie.org/Society/History/By_Region/Asia/South_Asia/Personalities/Ashoka/
http://www.bbc.co.uk/programmes/b05tpy82
http://www.bbc.co.uk/programmes/b0511tm1
https://archive.org/details/InscriptionsOfAsoka.NewEditionByE.Hultzsch