कचाभाय्
कचाभाय् वा भाषिका धयागु छपुचः मनूतय्सं ल्हाइगु भाय्या छगू रुप खः। थ्व रुप भाषाया मू रुप स्वया पाःसां मू रुप व कचाभाय् ल्हाइपिंसं खँल्हाबल्हा यायेफु। भाषिका व भाषाया दथुइ छुं नं कथंया पूर्ण भिन्नता मदु। ब्रिटिश अंग्रेजी व अमेरिकन अंग्रेजी, अंग्रेजीया बिस्कं मानक भाषिका खः। इपिं च्वयेगु रुप, उच्चारण व खँग्वःधुकूइ भचा पाः। अथे जुसां इपिं " परस्पर बोधगम्य " ख, गुकिया अर्थ निगुलिं कचाभाय् ल्हाइपिं मनुतेसं मेगु कचाभाय् थुइकेफु।
दसुत
[सम्पादन]नेपालभासय् दुने येँ-यल-कीपू कचाभाय्, ख्वप कचाभाय्, द्वाल्खा कचाभाय् आदि थीथी कचाभाय् दु।
जापानी व ओकिनावान भाषाया स्वापू दु। थ्व नितां भाय् जापोनिक भाषा परिवारया दुने ला, तर इपिं परस्पर बोधगम्य मजू । मेइजी युगय् जापानं ओकिनावायात थःगु कब्जाय् काःबलय् जापानी सरकारं ओकिनावा भाषायात जापानी भाषाया भाषिका धाल।
न्हापा न्हापा क्याटालन व ग्यालिसियन भाय्यात स्पेनिश भाय् या भाषिकाया रुपय् कायेगु याःसां आः भाय्या रुपय् मान्यता प्राप्त जूगु दु। इपिं क्रमशः पोर्चुगिज व ओक्सिटनया लिक्कया भाय् खः।
हिन्दी व उर्दूयात थौंकन्हय् थी-थी भाषा धाइ, तर न्हापा थ्व छगू हे भाषा हिन्दुस्तानीया रुपय् दयाच्वन। पाकिस्तान भारतं अलग जुइधुंका पाकिस्तानय् हिन्दुस्तानीयात उर्दू व भारतय् हिन्दी धायेगु यात। न्ह्याथेसां, निगुलिं भाय् ल्हाइपिंसं परस्पर भाय् थुइकेफु।
अंग्रेजी निश्चित रुपं छगू भाषा खः, तर थ्व छगू इलय् एंग्लो-सैक्सनया कचाभाय् जुयाच्वन।
चिनियाँ भाषायात छगू भाषा धाइ, तर थ्व भाषा दुने सलंसः कचाभाय् दु, गथेकि म्यान्दारिन, क्यान्टोनीज , वु, व होक्कियन। इपिं मध्यय् यक्व कचाभासय् थःथवय् दथुइ खँ थुइके मफु।