Mindelo (Kap Verde)

Blick över de Bucht vun Mindelo mit de Stadt.

Mindelo is en Havenstadt op dat Eiland São Vicente in de Republiek Kap Verde. Na en Bereken ut dat Johr 2005 hebbt to de Tiet ruchweg 70.000 Minschen in Mindelo leevt, wat dormit de tweetgröttste Stadt vun de Kapverden is.

Mindelo hett Bedüden ok över at egene Land rut. Vun 1850 an weer de Stadt en wichtigen Versorgungshaven för Scheep, de över’n Atlantik schippern. Vundaag warrt de Haven vun Krüüzfohrtscheep anlopen. De Stadt is bekannt för ehrn Karneval un gellt as en Oort Kulturhööftstadt vun de Kapverden.

Geografie un Landschop

Mindelo liggt in’n Noordwesten vun’t Eiland São Vicente an de schulten Bucht vun Mindelo. Dat Eiland höört to de Ilhas de Barlavento (port.: „Eilannen över’n Wind“) un sünd, as all de kapverdschen Eilannen, dör Vulkanismus entstahn. De Bucht vun Mindelo is ok en olle Vulkankrater, de en Dörmeter vun ruchweg 4 km hett. De Haven gellt as de beste un sekerste vun den helen Archipel.

Historie

Mindelo mit sien Porto Grande, opnahmen in’t Johr 2005

Mindelo is to grote Bedüden kamen, as 1838 mit en Dekret vun de ne’e liberal orienteerte portugeesche Regeeren anordent worrn is, dat Mindelo to en Hannelshaven utboet warrn schüll. De Naam vun den Haven, Porto Grande, düüt dorop hen, dat Mindelo fröher mol de gröttste Haven twüschen Lissabon un’t Kap vun’t Gode Hapen weer. In’t Johr 1850 hett de britische Konsul Verlööf kregen, in Mindelo en Bunkerstatschoon för Kahl intorichten, wat mit Anfang vun de Dampschippfohrt en wichtige Versorgungsstatschoon sünners för de Schippfohrt vun un na Süüdamerika worrn is.

Ünner dat Regeer vun de Briten kemen gau wietere Inrichten dorto. För dat Eiland, op dat vörher blots en poor Harders leevt harrn, weer dat en grote Opswung. De Inwahnertall is gau in die Hööch gahn, vunwegen dat hier bannig veel Arbeit to finnen weer. Över mehrere Johrteihnten sünd in’n Haven vun Mindelo ruchweg twee Drüddel vun de Innahmen vun’t hele Archipel maakt worrn, wobi Portugal dör den Toll düchtig mitverdeent hett.

Af 1875, as sik de Firma Cory Brothers in Mindelo daallaten harr, güng de Kahlenpries düütlich rünner. Dormit steeg de Tall vun de Scheep, de jeed Johr in Mindela anleggen deen, op ruchweg 670 in’t Johr 1879. Enn vun’t 19. Johrhunnert kemen jeed Johr bit to 2.000 Scheep na Mindelo. Mit den Utbo vun de Havens in Dakar (Senegal) un op de Kanarischen Eilannen hett Mindelo an Bedüden verloren hatt. Intwüschen kregen ok jümmer mehr Scheep Dieselmaschienen, so dat sik Anfang vun de 1950er Johren de letzten britischen Kahlensellschoppen tosamendoon hebbt, üm nu blots noch Dieselkraftstoff (vun de Marke Shell, de op de Kapverden ok vundaag noch wiet verbreedt is) an de groten Dampers to verköpen.

De Haven is wieter in’n Noorden vun de Bucht denn utboet worrn un kann vundaag Schepp mit en Deepgang bit to 11,5 Meter opnehmen. Man, so richtig dull wedder in Gang kamen is de Haven vun Mindelo nich wedder in’n Vergliek to fröhere Tieten.

Bowarken in de Rua Lisboa in de Binnstadt vun Mindelo

Mit den Opswung vun’n Haven kemen ok vele Seelüüd, de sik op jemehrn Landgang vergnögen wulln. Dat weer de Grundlaag för de Musikszeen un de Kultur, de sik in Mindelo entwickelt hett. Bito hett dat aver ok de Prostitutschoon na Mindelo halt, wat Mindelo Enn vun’t 19. Johrhunnert den Roop vun de verdarvsten Stadt in de hele Welt inbröcht hett. Disse Roop hett sik bit vundaag halen, ok wenn dat mit de Realität nich mehr veel to doon hett. Ok vun de kapverdischen Musik is in Mindelo nich mehr veel torüchbleven. Liekers weer Mindelo 2003 de Kulturhööftstadt vun de portugeeschsprakigen Länner.

Söhn un Döchter vun Mindelo

• Sergio Frusoni (1901–1975), Dichter
• Ovídio Martins (1928–1999), Dichter
• Cesária Évora (1941–2011), Morna-Singersche
• Carlos Veiga (*1949), Politiker un Premierminister (1991-2000)

Weblenken

Mindelo. Mehr Biller, Videos oder Audiodateien to’t Thema gifft dat bi Wikimedia Commons.

• Stadtplaan vun Mindelo bi Lucete Fortes