Achoris

Achoris, ok Hakoris oder Hakor (König vun 392 bit 380 v. Chr.) weer de drüdde König vun dat 29. Königshuus in dat ole Ägypten. Dor hefft man veer Königen tohöört un Achoris weer de gröttste mank jem. Unner siene Regeerung hett Ägypten mol wedder ene grote Rull speelt in de Politik in de Länner, de in'n Osten um de Middellannsche See umto liggen döen. Dat is an to nehmen, dat Achoris en Söhn oder tominnst en Verwandten vun Nepherites I. is. Na den sien Dood un den Schandaal, de denn um den Throon utbreken dö, hett he de Macht 392 an sik reten. He wull dat Land unafhängig holen un boo en Söldnerheer up un en Flott. För de Suldaten unner den Befehl vun Chabrias ut Athen sünd de eersten Münten vun Ägypten slahn wurrn. He hett Verdräge slaten to'n Bündnis gegen dat Perserriek. Al 389 v. Chr. hett he en Bund mit Athen maakt. 385 v. Chr. sünd de Persers torüchslahn wurrn, as se in Ägypten inmarscheern wullen. As de Persers 380 v. Chr. Zypern innehmen, weer Achoris al doot. Sien Söhn Nepherites II. is de leste König ut dat 29. Königshuus ween un hett sik bloß veer Maande lang up'n Throon holen konnt.

Born

• Thomas Schneider, Lexikon der Pharaonen, Düsseldörp, 2002 ISBN 3-423-03365-7