West Betuwe

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Gemeinte West Betuwe
Provincie	Gelderland
Hoofplaats	Geldermalsen
Börgemeister (lies)	Harry Keereweer (PvdA, woernummend)
Opperflaakde – daovan water	229,12 km² 12,70 km²
Inwoeners – deechde:	50.515 233/km²

West Betuwe is 'n gemeinte in de Nederlandse provincie Gelderland, tösse de Lek en de Waal in, tege de grens mèt Utrech en Zuid-Holland. Wie de naom al suggereert nump ze e groet deil vaan de westeleke Betuwe in. Hoofplaots is Geldermalsen. De gemeinte oontstoont op 1 jannewarie 2019 oet 'n fusie tösse de opgelufde Geldermalsen, Lingewaal en Neerijnen.

Geografie

't Gebeed kinmerk ziech vaanajds door oetgebreide bóngerde. 't Groetste deil vaan de bevolking wèrk intösse neet mie in d'n tuinbouw, meh de fruitbuim (veural appelbuim) zien nog ummer in groete deile vaan de gemeinte te zien. Kortbij ligke de stei Culemborg en Tiel, die ouch bij de westeleke Betuwe hure meh boete de fusie zien gebleve.

West Betuwe heet 'n belaankrieke verkiersfunctie. D'n A2 en d'n A15 doorkruse de gemeinte, zoe good wie de Betuwelijn en 't spoor vaan Amsterdam nao Mestreech. Dees lijne kruse ziech bij Geldermalsen. Ouch de Betuweroute ('n goederelijn vaan d'n have vaan Rotterdam nao 't Roergebeed) löp door West Betuwe.

Kerne

De gemeinte umvat de volgende 26 kerne: Acquoy, Asperen, Beesd, Buurmalsen, Deil, Enspijk, Est, Geldermalsen, Gellicum, Haaften, Heesselt, Hellouw, Herwijnen, Heukelum, Meteren, Neerijnen, Ophemert, Opijnen, Rhenoy, Rumpt, Spijk, Tricht, Tuil, Varik, Vuren en Waardenburg.

Historie

Al in 1978 woort in de westeleke Betuwe heringedeild. Heibij oontstoonte de gemeinte Neerijnen en de vergroetde gemeinte Geldermalsen. Toen al wouw 't Ministerie vaan Binnelandse Zake hei 'n väöl groeter gemeinte make, meh umtot dao verzat tege waor, woort 'n aontal dörper aon de Waal in 'n apaarte gemeinte Neerijnen vereineg. In 1986 volgde de vörming vaan Lingewaal.

Oetindelek kraoge gemeinte ummer mie take vaan hoeger euverhede. Veural Lingewaard en Neerijnen, mèt allebei mer good tiendoezend inwoeners, kóste dat op de langen door minder good drage. Beslote woort daorum um de drei gemeintes te fusere. Op 26 aprèl 2017 woort de nuie naom bekind gemaak; neve West Betuwe waore ouch Betuwewaard en Waal en Linge in euverweging genome.

D'n oetindeleke naom waor neet zoonder controverse. Ton den Boon, d'n hoofredacteur vaan de Van Dale en inwoener vaan Varik, steurde 't oontbreke vaan e koppelteike. Heer weigerde zelfs veur de raodsverkezinge te stumme. Heibij woort opgemerk tot 't perceis in Gelderland mie vaan die fout gesjreve naome gief, wie West Maas en Waal en Oost Gelre.

Euverziech herindeilinge

• West Betuwe (sinds 2019)
  • Geldermalsen
    • Beesd (tot 1978)
    • Buurmalsen (tot 1978)
    • Deil (tot 1978)
  • Lingewaal (1986-2019; tot 1987 Vuren geneump)
    • Asperen (tot 1986 es gemeinte in Zuid-Holland)
    • Herwijnen (tot 1986)
    • Heukelum (tot 1986)
    • Vuren (tot 1986, meh zuug bove)
  • Neerijnen (1978-2019)
    • Est en Opijnen (tot 1978)
    • Haaften (tot 1978)
    • Ophemert (tot 1978)
    • Varik (tot 1978)
    • Waardenburg (tot 1978)

Politiek

Gemeinteraod

Op 21 november kóste de inwoeners stumme veur de gemeinteraod. Dit waor d'n oetslaag:

Partij	Zetele
Dorpsbelangen	5
SGP	5
CDA	4
VVD	3
ChristenUnie	3
Leefbaar Lokaal Belang	3
Verenigd West Betuwe	2
PvdA	2
D66	2
GroenLinks	2

Börgemeister

Harry Keereweer vaan de PvdA woort tot woernummende börgemeister vaan West Betuwe beneump.

Bron

Dit artikel is gebaseerd op, meh neet vertaold oet, 't corresponderend Nederlandstaoleg artikel, en wel in dees versie.