Geoffroy de Monmouth

Geoffrey de Monmouth (latina: Galfridus Monemutensis, Galfridus Arturus, cimrica: Gruffudd ap Arthur, Sieffre o Fynwy) (s 1095 – s 1155) ia es un eglesor brites e un de la figures la plu importante en la developa de la istoriografia brites, par causa de la popularia de sua naras de la Re Artur. El es conoseda per sua cronica La istoria de la res de Britan (latina: Historia regum Britanniae o De gestis Britonum), cual ia es multe popular en sua epoca e ia es traduida a linguas diversa de sua orijinal latina.

Biografia

Geoffrey probable ia nase entre 1100 e 1110 en Cimri. El ia ta ateni la majoria de eda en 1129, cuando el es rejistrada como atestor en un constitui.

En sua Historia, Geoffrey refere a se como Galfridus Monemutensis, "Geoffrey de Monmouth", cual indica un lia sinifiante con Monmouth, Cimri, e cual ta refere a sua loca de nase. Sua obras mostra alga conose de la nomes de locas en la rejion. Per contemporas, el ia es conoseda como Galfridus Artur(us) o otras varias. La "Arthur" en esta varias de sua nom ta indica la nom de sua padre o un nometa basida en sua interesas erudita.

Eruditas plu temprana ia suposa ce el ia es cimrica o ce el ia parla la lingua. Sua conose de la lingua pare es minor, e lo es reconoseda ce on no ave evidentia ce el ia es cimrica. On es razonada, par Frank Stenton entre otras, ce la padres de Geoffrey ta es entre la bresonicas ci ia vade con William la Concistor e ia coloni la sude-este de Cimri. Monmouth ta es propria de la seniores bresonica de 1075 o 1086 e la nomes Galfridus e Arthur ia es plu comun entre la bresonicas ca entre la cimricas.