Stan Lee

Stan Lee

Stan Lee árið 2014.
Fæddur:	28. desember 1922 New York, Bandaríkjunum
Látinn:	12. nóvember 2018 (95 ára)
Starf/staða:	Myndasöguhöfundur
Þjóðerni:	Bandarískur
Maki/ar:	Joan Boocock (g. 1947; d. 2017)
Undirskrift:
Heimasíða:	https://therealstanlee.com

Stan Lee (fæddur undir nafninu Stanley Martin Lieber; 28. desember 1922 – 12. nóvember 2018) var bandarískur myndasöguhöfundur, ritstjóri og útgefandi. Hann var ritstjóri Marvel-myndasögufyrirtækisins og síðar útgáfustjóri og stjórnarformaður þess. Undir stjórn Stans Lee þróuðust Marvel-myndasögurnar úr því að vera lítil undirdeild stærra útgáfufyrirtækis til þess að verða margmiðlunarrisi með veruleg umsvif í bandaríska myndasöguiðnaðinum.

Ásamt ýmsum samstarfsmönnum, sér í lagi Jack Kirby og Steve Ditko, tók Lee þátt í því að skapa fjölmargar frægar myndasöguhetjur, þar á meðal Köngulóarmanninn (enska: Spider-Man), Hulk og X-Mennina. Lee var frumkvöðull í raunsærri persónusköpun í ofurhetjugeiranum en hafði áður tíðkast og átti þátt í því að létta á ritskoðun á myndasögum fyrir börn og ungmenni í Bandaríkjunum með skrifum sínum.

Eftir að Lee settist í helgan stein var hann áfram nokkurs konar opinbert andlit Marvel-myndasagnanna og dundaði sér við ýmis sjálfstæð verkefni alveg fram á tíræðisaldur. Hefð myndaðist fyrir því að Stan Lee birtist í aukahlutverkum í kvikmyndum byggðum á Marvel-ofurhetjum eftir aldamótin. Lee var því tíð sjón á hvíta tjaldinu á efri árum og birtist í stuttum feluhlutverkum í fjölmörgum stórmyndum, þar á meðal öllum 20 myndunum í Marvel-kvikmyndaheimnum sem komu út fyrir dauða hans.