Vesta

Vesta
instantia de: deitate roman[*]
parte de: Dii Consentes[*]
Commons: Vesta

In mythologia roman, Vesta es una del plus importante divinitates, patronisante le focar e assi le vita domestic de omne menages, in association con le Lares e Penates. Cata cena familial, consummate normalmente ante le focar, con oblationes, esseva assi un acto de adoration a Vesta e al Penates.

Le urbe de Roma possedeva, como un magne familia, su proprie Templo de Vesta (ronde, como un impluvio domestic) juxta cello del Penates public. Le romanos identificava Vesta con le Hestia grec; illa esseva le filia de Saturno e Cybele (Ops). Dea virgine, Vesta esseva servite per un corpore de prestressas celibe, le Virgines vestal.

Un del actos le plus celebrate de Eneas, in le Eneide de Vergilio, esseva de salvar le deos public de Troia – identificate con Vesta e le Penates public – e de conducer les salvemente al nove Troia in Latio. On adorava Vesta e le Penates public le 6 de martio. Omne pretores, consules e dictatores debeva sacrificar non solmente al Penates, ma anque a Vesta a Lavinio, ante assumer lor functiones official. Il habeva nulle statua de culto in le Templo de Vesta in le Foro; plus tosto, le dea esseva representate per un magne foco que flagrava eternalmente sub le intendentia del Virgines vestal. On renovava iste foco cata anno le 1 de martio. Le imperator Theodosio I ha extinguite le foco in 394. On festava le Vestales le 9 de junio; solmente feminas poterea alora visitar le templo, e mesme illas debeva ambular a pede nude. Le 15 de junio on nettava e purificava le Templo de Vesta.

Le grande asteroide 4 Vesta, que pote eventualmente esser designate como planeta nano, es nominate in honor de Vesta.

Bibliographia

• Smith, William (1867), Dictionary of Greek and Roman Biography and Mythology. Boston: Little, Brown & Company.