Richard S. Yeoman
| Biografía | |
|---|---|
| Nacemento | 15 de agosto 1904 Estados Unidos de América  |
| Morte | 9 de novembro de 1988 (84 anos) Tucson. Arizona Estados Unidos |
| País de nacionalidade | Estadounidense |
| Educación |  Universidade de Wisconsin-Madison. |
| Actividade | |
| Campo de traballo | Numismática. |
| Ocupación | coleccionismo de moedas, numismático |
| Familia | |
| Cónxuxe | Marion Junkerman |
| Premios | |
| (1952): Ao mérito (ANA). (1956): Farran Zerbe (ANA). (1977): Clemy (NLG). | |
Richard Sperry Yeoman, nado o 15 de agosto de 1904 e finado o 9 de novembro de 1988 en Tucson, Arizona, foi un coleccionista de moedas estadounidense e autor de catálogos numismáticos vinculado desde a década de 1930 á editorial Whitman Publishing.
Traxectoria
[editar | editar a fonte]O seu apelido de nacemento era Yeo, e Yeoman foi o pseudónimo que utilizou nas súas publicacións.[1]
Cando na súa infancia traballaba como repartidor de xornais, caeu nas súas mans unha moeda dun centavo tipo Indian Head que lle chamou a atención e foi o inicio da súa colección numismática.[1]
Yeoman cursou os seus estudos superiores na Universidade de Wisconsin en Madison e a continuación comezou a traballar na editora Whitman Publishing Company, en Racine, onde se ocupou do deseño e a comercialización dos expositores e álbums para coleccións de moedas que a empresa producía, ata que finalmente acabou por adquirir os dereitos de fabricación destes populares produtos, mantendo a marca primitiva.[1][2]
Na década de 1940 comezou a publicar en Whitman Publishing os seus propios catálogos de moedas dos EEUU e mundiais, que se fixeron moi coñecidos entre os coleccionistas e nos que introduciu un sistema de numeración propio.[1] A partir da súa xubilación en 1970 foi sucedido polo seu ata entón axudante Kenneth E. Bressett, na redacción dos catálogos, aínda que Yeoman segue a figurar como autor en todas as edicións posteriores actualizadas.
Yeoman formou parte da American Numismatic Association (ANA) e en 1946 ingresou no seu comité de dirección. En 1973 dooulle á ANA un conxunto de 1764 moedas da súa colección particular. Tamén foi un dos membros da Assay Commision dos EEUU en 1964.[1]
O 9 de novembro de 1988 morreu en tanto que conducía o seu automóbil preto da súa casa en Tucson, Arizona.[2]
Vida persoal
[editar | editar a fonte]Yeoman casou con Marion Junkerman, con quen tivo unha filla.
Recoñecementos
[editar | editar a fonte]- (1952): Medalla ao mérito, da American Numismatic Association (ANA).[3]
- (1956): Premio Farran Zerbe Memorial, da ANA.[3][4]
- (1977): Premio Clemy, do Numismatic Literary Guild.[5]
Publicacións
[editar | editar a fonte]Estas son os catálogos publicados por Ricrad S. Yeoman ao longo da súa carreira.[6]
- (1941). Handbookof United States Coins. Whitman, Racine (WI).
- (1947). A Guide Book of United States Coins. Whitman, Racine (WI).
- (1957). A Catalogue of Modern World Coins. Whitman, Racine (WI).
- (1961). Moneys of the Bible. An illustrated digest of the coinage of Biblical times with Scriptural references. Whitman, Racine (WI).
- (1966). Current Coins of the World. Whitman, Racine (WI).
Notas
[editar | editar a fonte]- ↑ 1,0 1,1 1,2 1,3 1,4 Smith, P. (2012).
- ↑ 2,0 2,1 Boye, R. (1988).
- ↑ 3,0 3,1 "ANA Past Award Recipients". American Numismatic Association.
- ↑ "Farran Zerbe Memorial Award Arquivado 03 de xuño de 2021 en Wayback Machine.". American Numismatic Association.
- ↑ "The Clemy Award Winners". Numismatic Literary Guild.
- ↑ "Yeoman, R. S. (Richard S.)". WorldCat Identities.
Véxase tamén
[editar | editar a fonte]Bibliografía
[editar | editar a fonte]- Boye, R. (1988). "A tribute to Richard S. Yeoman". En Chicago Tribune. 27 de novembro de 1988.
- Smith, P. (2012). "Yeoman, Richard S(perry)". En American Numismatic Biographies. Páxina 391.
