Confiteor

O Confiteor (así chamado pola primeira palabra en latín, que significa 'eu confeso') é unha oración católica para a confesión xeral dos pecados ante Deus, usada no rito romano ao comezo da misa e noutras ocasións como preparación para a recepción dalgunha graza. Tamén se reza nos servizos luteranos e nos cultos anglicanos.

Historia

O texto aparece no Ordo Missæ do Misal romano. É dicir, forma parte fixa do rito romano da misa e da administración do sacramento da comuñón. Co Confiteor, tanto o sacerdote coma os acólitos e os fieis recoñecen pecaren e solicitan a misericordia e perdón de Deus.

Baixo diferentes fórmulas, a oración existe desde os inicios do Cristianismo. Santo Agostiño xa fai referencia ao costume de recitala batendo no peito coa man dereita en sinal de humildade. O xesto de se golpear un mesmo durante o arrepentimento aparece tamén en Xeremías 31, 19.

O Confiteor foi dende datas temperás unha das oracións privadas que dicía o celebrante na sancristía antes de comezar a Misa. Nas Regula Canonicorum de San Crodegango (s. VIII), as preguntas que lle fai sacerdote ao penitente denantes da confesión conteñen unha fórmula semellante ao Confiteor: “Primeiro de todo, próstrate humildemente ante Deus… e ora á Bendita Virxe María cos santos Apóstolos e mártires e confesores para que oren por ti ante o Señor". Tamén Egberto de York (s. VIII) dá unha forma curta que é o xerme da oración actual: “Dille a El a quen desexas confesar os pecados: pola miña culpa pequei abondo de pensamento, palabra e obra”.

No Micrologus, de Bernoldo de Constanza (s. XI), o Confiteor aparece por primeira vez como parte da introdución da Misa e a preparación facíase xa no altar.

A forma, e especialmente a listaxe dos santos invocados, varía considerablemente na Idade Media. No misal do papa Paulo III (1534-1549) engádese a san Pedro. Desde a edición de Pío V (1566-1572) só algunhas ordes teñen o privilexio de incluír o nome do seu fundador. Fóra diso, a oración debe dicirse sempre tal como está no Misal Romano de Paulo VI.

Texto

Latín	Galego
Confiteor Deo omnipotenti, et vobis, fratres; quia peccavi nimis cogitatione, verbo, opere et omissione: mea culpa, mea culpa, mea maxima culpa. Ideo precor beatam Mariam semper Virginem, omnes angelos et sanctos et vos, fratres, orare prol me ad Dominum, Deum nostrum. Amen.	Eu confeso ante Deus Todopoderoso e ante vós irmáns que pequei moito de pensamento, palabra, obra ou omisión. Pola miña culpa, pola miña culpa, pola miña gran culpa, por iso rogo a Santa María, sempre Virxe, aos Anxos, aos Santos e a vós irmáns que intercedades por min ante Deus o noso Señor. Amén.

Véxase tamén

Outros artigos

• Misa