Cedro de California

Cedro de California
Estado de conservación
Pouco preocupante
Clasificación científica
Reino: Plantae División: Pinophyta Clase: Pinopsida Orde: Pinales Familia: Cupressaceae Xénero: Calocedrus Especie: C. decurrens
Nome binomial
'Calocedrus decurrens' (Torr.) Florin, Taxon, 5: 192, 1956

O cedro de California Calocedrus decurrens, é unha conífera da familia Cupressaceae, do xénero Calocedrus. De orixe norteamericana, atopáse en Galiza coma ornamental.

Etimoloxía

• Calocedrus: procede do grego: καλλος, "callos", fermoso e de χέδρος, "cedros", o cedro, significando logo "cedro fermoso".
• decurrens: epíteto latino que ten o mesmo significado que "decorrente" -do cal deriva- aludindo ás "escamas" das follas que se recobren unhas ás outras.

Nota: malia o seu nome, a árbore só ten un afastado parentesco co xénero Cedrus, pois é un membro da familia Cupressaceae, pertencendo os cedros a Pinaceae. O único en común, logo, é pertenceren á orde botánica Pinales.

Descrición

É unha grande árbore, que acada tipicamente alturas de 40–60 m e un toro cun diámetro de até 3 m (máximo, 69 m de alto e 4,5 m de diámetro), estreitamente cónico, de ramallada mesta. A casca é dunha cor parda alaranxada que co tempo se torna agrisada, macía ao principio e despois vai formando fendas e exfoliándose en longas fitas na parte baixa do toro nos exemplares máis vellos. Os acios das follas son aplanados en forma de abano. A follaxe é persistente, composta de follas en pseudoverticilos de 4, escuamiformes, de ápice agudo e incurvado, longamente decorrentes na base, de cor verde escura brillante e que teñen un recendo resinoso intenso e peculiar. A árbore é monoica, con flores masculinas de preto de 3 mm en grupos nos extremos das franzas, globulares e douradas con 3-5 sacos polínicos e con estróbilos femininos de 6 escamas: 2 estériles, 2 reducidas e 2 seminíferas. Ditos conos son pequenos (15–25 mm), estreitos, rematados en punta, e ovoides. Dunha cor verde intensa ao principio, estes conos tórnanse pardos na madureza (logo dun ano), ceibando 4 (ou menos) sementes alíferas cando abren.

Distribución

Nativo do oeste de América do Norte, estando o groso da súa área de distribución nos Estados Unidos, dende o centro-oeste de Oregón a través da maior parte de California e o extremo oeste de Nevada, e tamén no noroeste de México, na parte norte da Baixa California.

Medra desde os 50 deica os 2900 m de altitude, sendo a especie máis estendida do xénero.

Usos

A madeira lixeira da árbore utilízase para a elaboración de lapis, en particular nos Estados Unidos onde é a principal materia prima para a súa fabricación, por mor a que é macía e tende a se aguzar de xeito doado sen formar achas ou estelas, ou en marquetaría. Tamén é unha árbore ornamental popular, valiosa pola súa resistencia á seca. A madeira é moi aprezada polos escultores. A súa casca pode se queimar coma incenso.

Árbore senlleira en Galiza

O cedro de California do Pazo de Torrecedeira en Redondela, figura no catálogo de árbores senlleiras de Galiza elaborado pola Xunta de Galicia.

Sinónimos

• Abies cupressoides Poir.
• Heyderia decurrens (Torr.) K.Koch
• Libocedrus decurrensTorr.
• Thuja craigana A.Murray
• Thuja decurrens (Torr.) Voss

Galería de imaxes

• 
  Vista xeral dun exemplar mediano.
• 
  Unha póla "aplanada".
• 
  Folla e conos masculinos.
• 
  Póla con conos masculinos e femininos.
• 
  Cono feminino en frutificación incipiente.
• 
  Sementes alíferas inmaturas.
• 
  Conos femininos abertos in situ.
• 
  Conos e sementens maduros.
• 
  Froito chegado aberto con sementes alíferas in situ.
• 
  Sementes alíferas soltas.
• 
  Calocedrus decurrens

Véxase tamén

Ligazóns externas

• Arboretum de Villardebelle - fotos de los conos
• Calocedrus en The Gymnosperm Database
• USDA Plants Profile: Calocedrus decurrens
• Calocedrus decurrens en USDA, ARS/ GRIN. National Germplasm Resources Laboratory, Beltsville, Maryland.