Jean Lannes

Jean Lannes, kentañ dug Montebello, ganet d'an 10 a viz Ebrel 1769 e Lectoure (Okitania) ha marvet d'an 31 a viz Mae 1809 war an enezenn Lobau, en Aostria, goude bout gloazet en emgann Essling, a oa ur jeneral gall eus an Dispac'h hag an Impalaeriezh a-raok bout lakaet da Varichal an Impalaeriezh e 1804. Beziet e voe er Pantheon e 1810.

Engouestlet e 1792, e stourmas e Brezel Rousilhon hag e-touez lu Italia evel jeneral Brigadenn, e-lec'h ma voe merzet gant Bonaparte en Emgann Pont Arcole. Diwezhatoc'h e kemeras perzh e brezeladenn Egipt a-raok bout lakaet da jeneral rannarme.

E-pad brezeliadenn Italia (1799-1800) e renas rakward al lu gall. Un trec'h bras a zeuas gantañ en emgann Montebello d'an 9 a viz Mezheven 1800. E spered hag e varregezh stourm a voe kadarnaet e-kerzh emgann Marengo pemp devezh goude. Maodiern hollc'halloudek e teuas da vout e Portugal. E 1804, e voe anvet marichal an Impalaeriezh gant Napoleon hag ar pempvet korf eus lu aodoù ar C'heinvor a voe renet gantañ.

E 1809 e kemeras perzh en eil brezeladenn Aostria, pa voe kemeret Vienna adarre gant ar C'hallaoued. Hogen d'an 22 a viz Mae 1809, e-pad emgann Essling, e tapas Lannes ur boled-kanon tri lur a bouez ouzh e zivc'har. Hag en desped da labour ar vedisined e varvas d'an 31 a viz Mae 1809 da 40 vloaz.