Зброя

Зброя, прыстасаванні і сродкі, прызначаныя для паражэння праціўніка ва ўзброенай барацьбе. Звычайна складаецца з сродкаў паражэння і сродкаў дастаўкі іх да цэлю, таксама ў склад зброі могуць уваходзіць сродкі кіравання і навядзення.

Класіфікацыі зброі

Паводле асноўных адметнасцяў зброя падзяляецца:

Паводле характару паражэння:

Зброя масавага паражэння
Звычайная (канвенцыйная) зброя (сродкі паражэння)

Паводле характару баявых задач:

Стратэгічная зброя (узбраенне)
Аперацыйна-тактычная зброя (узбраенне)
Тактычная зброя (узбраенне)

Паводле мэтавага прызначэння:

аднацэлевая (напр., проціпаветраная, процітанкавая, проціпадлодачная)
шматцэлевая (універсальная)

Паводле спосабу дастаўкі сродкаў паражэння:

Агнястрэльная зброя
Рэактыўная і ракетная зброя (напр., ракета, рэактыўны снарад)
Зброя, якая дастаўляецца з дапамогай іншых адмысловых носьбітаў, іншых відаў рухавікоў і камбінаванымі спосабамі (напр., авіяцыйная бомба, тарпеда, актыўна-рэактыўны снарад)
Дастаўка мускульнай сілай чалавека (напр., кап'ё, ручная граната)
Зброя, якая ўстанаўляецца ў месцах магчымых дзеянняў праціўніка (мінная зброя)

Паводле манеўранасці:

Стацыянарная з нерухомай асновай (напр., шахтныя ракетныя комплексы, казематныя гарматы)
Стацыянарная з рухомай асновай (напр., авіяцыйнае, танкавае, карабельнае і інш. узбраенні)
Самаходная
Цяганая
Вожаная (ношаная, трокавая)

Паводле колькасці абслугі:

Групавая
Індывідуальная

Паводле ступені аўтаматызацыі працэсу стральбы:

Аўтаматычная
Паў-аўтаматычная
Неаўтаматычная

Паводле магчымасці змянення траекторыі руху сродкаў паражэння да цэлю:

Некіраваная
Кіраваная

Гісторыя

Зброя з’явілася ў дагістарычную эпоху, першыя ўзоры яе вырабляліся з дрэва і каменю. Важнымі момантамі ў далейшым развіцці зброі былі адкрыцці якасцяў і выкарыстанне металаў (медзь, бронза, жалеза і інш.), выкарыстанне пораху і з’яўленне агнястрэльнай зброі (XIV стагоддзе), з’яўленне нарэзнай казназараднай (1860-я гады), з’яўленне бяздымнага пораху і распрацоўка хуткастрэльнай магазіннай і аўтаматычнай зброі (1880-я гады), стварэнне і выкарыстанне хімічнай зброі (Першая сусветная вайна), рэактыўнай зброі, крылатых і балістычных ракет, атамнай зброі (Другая сусветная вайна), распрацоўка і пастаноўка на ўзбраенне ракетна-ядзернай зброі (1950-я гады), развіццё электронікі і вылічальнай тэхнікі (1970-я гады).