Advėnts

Advėnts īr čiesos posketvirtuos nedielės pėrm Kaliedu. Tas ī čiesos sositoriejėmou, Kaliedu laukėmou. Advents prasided Švėnta Andriejaus dėina – ana nie vėinuoda kuožnās metās, ale ėšpoul kor tās lapkristė pabonguo aba groudė pradiuo. Tou čiesou jau ožsibeng vėsi ūkė darbā, pamažo žmuonis jėm taisītėis Kalieduom. Par Advėnta žmuonis dėrb tap, ka nakeltom alasa, ba tap kėtās metās gal visuokės nelaimės nutiktė. Tūdie žmuonis liuob nekirs medės, nekirps aviū, nepils pagalviu ė kt. Pondielēs būtėn laikītėis pasninka – nejiestė mēsuos, vuo vėituo anuos tonkiausē jied žovi.

Par advėnta vierīta, ka vaikšta dūšės, vieliuokā, ė jēb anūs kap tas sotrikdīsi, ta anėi pridarīs ėškadas aba gausi numėrtė. Tou čiesou nagalam šuoktė, garsē dainiuotė, ožtatās dainiuo spakainas advėnta dainės, min mīslės, ēn ratalius.

So Kaliedu rīto advėnts bengias ė prasided jau linksmībės čiesos.