Saltar al conteníu

Bloquéu Continental

De Wikipedia
El Primer Imperiu Francés en 1812.      Territorios alministraos directamente por Francia     Estaos clientes      Territorios que participaron del Bloquéu Continental

El Bloquéu Continental (del francés Blocus continental) o Sistema Continental foi un embargu a gran escala decretáu escontra'l comerciu británicu por Napoleón Bonaparte, que tuvo en vigor ente'l 21 de payares de 1806 y el 11 d'abril de 1814, nel contestu de les Guerres Napoleóniques. El bloquéu foi decretáu por Napoleón el 21 de payares de 1806, nel nomáu Decretu de Berlín, como rempuesta al bloquéu naval de les costes franceses decretáu pol gobiernu británicu'l 16 de mayu de 1806[1][2]. L'embargu, que foi aplicáu de forma intermitente, finó'l 11 d'abril de 1814, tres de la primer abdicación de Napoleón. El bloquéu pretendía, amás de someter a Gran Bretaña, establecer la hexemonía industrial ya comercial de Francia n'Europa[3]. Dientru del Primer Imperiu francés los territorios recién adquiríos y los estaos clientes quedaben subordinaos a Francia, y formaben con ella un mercáu únicu, ensin fronteres internes o aranceles, que sí había por embargu nes fronteres esteriores d'estos territorios incorporaos al Imperiu[4].

El decretu de Berlín prohibía dafechu la importación de bienes británicos a dengún país dependiente de Francia o aliada con ella, ya creó'l nomáu Sistema Continental n'Europa. Cortáronse toles conexones con Gran Bretaña, inclusive la postal. Sicasí, hubo contrabandu de productos a gran escala, lo que convirtió'l bloquéu núna midida de guerra económica ineficaz[5]. El comerciu inglés resultó dañáu[6], especialmente en 1808 y 1812, pero'l control británicu de los mares permitió sustituyir el comerciu con Europa pol comerciu con América del Norte y del Sur. Y tamién la esistencia de contrabandu a gran escala; especialmente en Malta, posesión británica usada davezu pa introducir productos británicos na Italia meridional. Y la perda de Gran Bretaña como sociu comercial tamién perxudicó la economía de Francia y los sos aliaos[7]. Los gobiernos, engafentaos por esta perda, alcontraron nella un motivu pa ignorar el bloquéu, lo que al final acabó por debilitar la coalición napoleónica[8]. Y este, al decatase de qu'había un intensu comerciu con Gran Bretaña neto n'España qu'en Rusia, invadió esos dos países, sofriendo importantes derrotes en dambos.

Desarrollu del bloquéu

[editar | editar la fonte]

El gobiernu británicu foi l'actor principal na construcción d'aliances escontra la Francia napoleónica. L'emperador francés, pela so banda, taba frustráu polos sos repetíos intentos fallíos de derrotar a Gran Bretaña. Los ataques navales fracasaran enforma, cola derrota repetida de les flotes española y francesa combinaes. Tres de la decisiva derrota de Trafalgar Napoleón renunció a reconstruyir la so armada, y camudó la so estratexa hacia la guerra económica, col envís d'arruinar la economía británica. Creyíase na época que la prosperidá de Gran Bretaña dependía completamente del so comerciu con Europa, y que la interrupción total d'esi comerciu arruinaría al país y forciaría al so gobiernu a negociar la paz. Un bloquéu naval yera imposible, porque l'Armada británica controlaba los mares, pero como Napoleón controlaba los puertos d'Europa yéra-y posible evitar el desembarcu de productos d'esi país[9].

El 16 de mayu de 1806 l'Armada británica impunxo un bloquéu naval de les costes de Francia y los so aliaos. En rempuesta, Napoleón quixo dañar el papel central, no industrial y no financiero, de Gran Bretaña al traviés d'un embargu qu'habría causar, pensaba, inflación y una crisis de deuda que debilitaríen la potencia económica británica. La cayida de Berlín nes sos manes en ochobre de 1806, que punxo a Prusia embaxo'l so control, reforció la so posición nel continente. En payares, teniendo conquistao o siendo aliáu de toles principales potencies continentales Napoleón, como rempuesta al bloquéu británicu de tolos puertos dende Brest al ríu Elba, decretáu na Orde del Conseyu de 17 de mayu d'esi añu, emitió'l decretu de Berlín, nel que prohibía a los sos aliaos y a los territorios de so comerciar colos británicos[10]. Los británicos respondieron, pela so banda, con otres dos Ordes del Conseyu, emitíes el 10 de xineru y 11 de payares de 1807[11], que prohibíen el comerciu francés con Gran Bretaña y los sos aliaos y colos países neutrales, y que mandaben a la Royal Navy que bloqueara tolos puertos de Francia y los sos aliaos, impidiendo tou tipu de navegación, neutral o non. Napoleón retrucó otra vez: el decretu de Milán de 1807 estableció que tolos barcos neutrales qu'usaran puertos británicos o pagaran los aranceles británicos habíen ser consideraos británicos y, poro, confiscaos.

El plan napoleónicu pa derrotar a Gran Bretaña pasaba por destruyir la so capacidá pa comerciar. Como país insular, el comerciu yera vital pa la so actividá económica, y Napoleón creía que si podía aisllar a Gran Bretaña económicamente podría invadila tres del so colapsu económicu. Decretó tamién que tolos barcos que quixeran facer negocios n'Europa teníen que pasar primeru por un puertu francés p'asegurase de que nun diben comerciar con Gran Bretaña. Y ordenó a toles naciones europees y a los aliaos de Francia que nun comerciaran con Gran Bretaña, amenazando a Rusia con invadila si nun se xunía al bloquéu. El so intentu de bloquéu fracasó na Península Ibérica, y especialmente en Portugal, aliada británica, y esto foi la mecha que prendió la Guerra Peninsular. Nel otru estremu del continente les sos fuertes presiones sobre Rusia, pa que se xuniera al bloquéu y pa qu'aceptara'l so control d'una parte de Polonia, desembocaron na invasión del país en 1812. El intentu tuvo un resultáu desastrosu[12], y sentó les bases de la so cayida.

Efectos del bloquéu

[editar | editar la fonte]

Imperiu británicu

[editar | editar la fonte]
Viñeta política estauxunidense de 1807 ridiculizando l'embargu comercial decretáu cola Llei d'Embargu d'esi añu. La tortuga mordedora "Ograbme" ("Embargo" deletreáu al revés) persigue a un comerciante que quier llevar los sos productos a un barcu británicu.

El bloquéu tuvo efectos estremaos sobre'l comerciu británicu. El embargu, d'una banda, estimuló a los mercaderes ingleses a buscar agresivamente nuevos mercaos, y tamién a contrabandiar cola Europa continental. Los aduaneros franceses, ensin apoyu naval, nun foron quien a impedir el contrabandu, especialmente nos llugares nos qu'había connivencia ente los contrabandistes y les autoridaes, impuestes por Napoleón y teóricamente favorables a elli, d'España, Westfalia y otros estaos alemanes. Les esportaciones britániques, nostante, cayeron ente un 25% y un 55% con respectu a los niveles anteriores a 1806, pero esi descensu foi prácticamente compensáu pol importante aumentu del comerciu col restu del mundu[13][14].

Gran Bretaña, al traviés de delles Órdenes del Conseyu, prohibió a otros países, a los que comerciaben con elli, facelo con Francia, y amenazó con fundir cualesquier barcu que nun tuviera como destín un puertu británicu o que comerciara con Francia. Esta doble amenaza francobritánica punxo nuna situación difícil a les naciones neutrales. Asina, los Estaos Xuníos respondieron a Gran Bretaña adoptando la Llei d'Embargu de 1807, concebida pa dañar a Gran Bretaña en represalia poles sos restricciones al comerciu pero que acabó perxudicando más a los comerciantes americanos que a esi país. Esta tensión, xunto col alistamientu forzosu de marinos foriatos (ente ellos estauxunidenses) y'l sofitu británicu a los nativos americanos revoltosos del oeste del continente norteamericanu, acabaron llevando a una declaración de guerra d'Estaos Xuníos, dando aniciu a la Guerra de 1812. Y foi esta guerra, y non el bloquéu napoleónicu, la qu'amenorgó enforma'l comerciu británicu con Estaos Xuníos[15].

El bloquéu, en resume, nun dañó de forma importante'l comerciu británicu, que compensó la cayida del comerciu con Europa, que pasó de ser el 55% del total en 1802 al 25% en 1806, cola apertura y fortalecimientu d'otros mercaos[6]. Sí que hubo, nostante, dificultaes na economía británica ente 1810 y 1812, que causaron altos niveles de desempléu ya inflación. De resultes hebo un españíu de protesta violenta, resueltu pol gobiernu con firmeza: el sofitu de les clases medies y altes a una política de represión militar de les revueltes obreres permitió acabar con elles[16][17].

Francia y la Europa continental

[editar | editar la fonte]

El bloquéu dañó seriamente a Francia. La industria de construcción naval y otres asociaes a ella (construcción de maromes) escayeron, y tamién otres industries que trabayaben pal mercáu esterior, como la testil del llinu, obligaes en munchos casos a pesllar pol descensu de les esportaciones. Los puertos del sur de Francia, especialmente Marsella, Burdeos y La Rochelle, sufrieron especialmente por culpa d'una reducción del comerciu que provocó tamién un ascensu de los precios de los productos de primer necesidá na mayoría del continente[18].

El decretu de Saint Cloud, emitíu por Napoleón en xunetu de 1810, abrió'l suroeste de Francia y la frontera española a un comerciu limitáu colos británicos, y permitió tamién el comerciu de Francia con Estaos Xuníos. Foi'l reconocimientu de que'l bloquéu perxudicara más a la propia Francia que a Gran Bretaña, que tamién pudo caltener el sofitu financieru de los sos aliaos ensin problemes[19]. El perxuiciu, sicasí, nun foi xeneral: les industries de la fastera nororiental de Francia y de Valonia vieron medrar los sos beneficios al desapaecer la competencia británica. El sector agrícola italianu espolletó enforma[20], pero la economía de los Países Baxos, perdependiente del comerciu, sufrió, pa disgustu del rei del país, Lluis I d'Holanda, hermanu de Napoleón.

El vicealmirante James Saumarez foi'l comandante de l'Armada británica na campaña del Bálticu de 1808-14, qu'aseguró'l comerciu británicu na rexón.

Escandinavia y la rexón del mar Bálticu

[editar | editar la fonte]

La primer rempuesta británica al bloquéu foi llanzar un gran ataque naval escontra'l rival más débil de la coalición napoleónica, Dinamarca. Aunque declaradamente neutral, el país sofría grandes presiones franceses y ruses pa que punxera la so armada la serviciu de Napoleón. Gran Bretaña nun podía ignorar este riesgu, y na Segunda Batalla de Copenhague, n'agostu y setiembre de 1807, la Royal Navy bombardeó Copenhague y confiscó la flota danesa, asegurándose asina'l control de les agües del mar del Norte ya'l mar Bálticu[21][22]. La islla de Heligoland, na costa occidental del país, foi ocupada (setiembre de 1807) y usada como base pa controlar los puertos del mar del Norte y pa facilitar el contrabandu. Estos ataques escontra Copenhague y Heligoland supunxeron l'españíu de la Guerra de les Cañoneres, que nun finaría hasta 1814.

Suecia, aliada británica na Tercer Coalición, refugó cumplir coles desixencies de Francia, y foi atacada por Rusia en febreru de 1809 y por Dinamarca/Noruega en marzu. Al tiempu, tropes franceses amenazaron con invadir el sur del país, pero'l control británicu de los estrechos daneses impidió llevar alantre'l plan. L'Armada británica estableció, en 1808, una base nel puertu de Gotemburgu pa facilitar, con una flota dirixida pol almirante James Saumarez, les operaciones nel mar Bálticu. En payares de 1810 Francia desixió-y a Suecia que-y declarara la guerra a Gran Bretaña y dexara de comerciar con ella, y esto fizo españar una guerra, la Guerra Anglo-Sueca, que nun foi tal na realidá más que sobre'l papel. Dafechamente, Gran Bretaña abrió una segunda base naval na islla de Hanö, al sur del país, y aprovechola pa facer de la islla el destín últimu de convoyes qu'aportaben, dempués de parar en Gotemburgu, ellí. La mercancía desembarcada yera dempués reunviada de contrabandu a otros puertos del mar Bálticu. Pa reforzar inda más la seguridá de los convoyes ocuparon tamién la pequeña islla danesa d'Anholt, na que construyeron un faru que facía más cenciella la navegación polos estrechos.

Rusia tampoco taba mui a favor del embargu, y en 1810 reabrió'l comerciu con Gran Bretaña. Esti abandonu rusu del sistema foi ún de los factores que favorecieron la decisión napoleónica d'invadir Rusia en 1812.

Portugal y España

[editar | editar la fonte]

Portugal refugó abiertamente xunise al bloquéu. En 1793 Portugal firmara un tratáu d'asistencia mutua con Gran Bretaña[23]. Tres del tratáu de Tilsit (xunetu de 1807) Napoleón intentó capturar la flota portuguesa y a los miembros de la Casa de Braganza, y ocupar los puertos del país. Fracasó, porque la reina portuguesa María coló cola flota de so (y con una escolta de la Royal Navy) pa Brasil, aú asitió la corte. La población portuguesa rebelose escontra los ocupantes franceses, una xera na que tuvieron l'axuda del exércitu británicu al mandu d'Arthur Wellesley, nomáu posteriormente duque de Wellington. Napoleón intervino, y entamó la guerra na Península Ibérica. Primero d'ello Napoleón tamién obligara a la familia real española a abdicar del tronu en favor del so hermanu Xosé Bonaparte, qu'habría ser rei col nome de Xosé I y que tuvo que facer frente a la sulevación de la población escontra l'invasor foriatu.

Referencies

[editar | editar la fonte]
  1. ↑ (2004) Naval Institute Press: Encyclopedia of the War of 1812. ISBN 978-1-59114-362-8.
  2. ↑ Jean Tulard, Napoléon, Hachette, 2008, p. 207
  3. ↑ Aaslestad, Katherine (2022), Forrest, Alan; Hicks, Peter, eds., «Blockade and Economic Warfare», The Cambridge History of the Napoleonic Wars: Volume 3: Experience, Culture and Memory (Cambridge University Press) 3: pp. 117–141, doi:10.1017/9781108278119.007, ISBN 978-1-108-41767-9, https://www.cambridge.org/core/books/cambridge-history-of-the-napoleonic-wars/blockade-and-economic-warfare/02B0F604D44A29B5720A6B651E51AD16 
  4. ↑ Marzagalli, Silvia (2022), Broers, Michael; Dwyer, Philip, eds., «Napoleonic Wars and Economic Imperialism», The Cambridge History of the Napoleonic Wars: Volume 1: Politics and Diplomacy (Cambridge University Press) 1: pp. 232–252, doi:10.1017/9781108334846.013, ISBN 978-1-108-42437-0, https://www.cambridge.org/core/books/cambridge-history-of-the-napoleonic-wars/napoleonic-wars-and-economic-imperialism/66CBC547B567D8CCDDB10DF0A52FB9B0 
  5. ↑ Paul W. Schroeder, The Transformation of European Politics 1763–1858 (1999) pp. 305–10
  6. ↑ 6,0 6,1 Alfred Fierro; André Palluel-Guillard; Jean Tulard (1995). Robert Laffont: Histoire et dictionnaire du Consulat et de l'Empire. ISBN 2-221-05858-5.
  7. ↑ Alexander Grab, Napoleon and the Transformation of Europe (2003) pp. 29–33
  8. ↑ François Crouzet, "Wars, blockade, and economic change in Europe, 1792–1815." Journal of Economic History (1964) 24#4 pp. 567–88 Plantía:JSTOR.
  9. ↑ Louis R. Gottschalk, The Era of the French Revolution. (1715–1815) (1929) p. 373.
  10. ↑ «Documents upon the ContinentaI System 1806».
  11. ↑ Holberg, Tom. The Acts, Orders in Council, &c. of Great Britain (on Trade), 1793–1812
  12. ↑ Society, National Geographic (2020-04-06). «Napoleon Invades Russia» (inglés). Consultáu'l 2021-08-19.
  13. ↑ J.M. Thompson,Napoleon Bonaparte: His rise and fall (1951) pp. 235–40
  14. ↑ François Crouzet, "A serious cause of social and economic dislocation," Frank Kafter and James Laux, eds., Napoleon and his times (1989) pp. 179–92.Plantía:ISBN?
  15. ↑ Knight, Britain against Napoleon (2013) pp. 433–36.
  16. ↑ Knight, pp. 410–12.
  17. ↑ Francois Crouzet, Britain Ascendant (1990) pp. 277–79.
  18. ↑ Eli Heckscher, The continental system: an economic interpretation (1922) pp. 266–94.
  19. ↑ Eric A. Arnold, Jr. "Napoleon's St. Cloud Decree, 3 July 1810: Text and Analysis," Proceedings of the Western Society for French History (1998), Vol. 25, pp. 49–54
  20. ↑ Alexander Grab and Charles F. Delzell, "The Kingdom of Italy and Napoleon's Continental Blockade," Consortium on Revolutionary Europe 1750–1850: Proceedings (1988), Vol. 18, pp. 587–604.
  21. ↑ A. N. Ryan, "The Causes of the British Attack upon Copenhagen in 1807." English Historical Review (1953): 37–55. in JSTOR
  22. ↑ Thomas Munch-Petersen, Defying Napoleon: How Britain Bombarded Copenhagen and Seized the Danish Fleet in 1807 (2007)
  23. ↑ (1857) Imprensa nacional: Supplemeto á Collecção dos tratados, convenções, contratos e actos publicos celebrados entre a corôa de Portugal e as mais potencias desde 1640.

Enllaces esternos

[editar | editar la fonte]
Sacáu de «https://ast.wikipedia.org/w/index.php?title=Bloquéu_Continental&oldid=4147922»